დარგობრივი ეკონომიკისა და ეკონომიკური პოლიტიკის კომიტეტის თავმჯდომარემ, დავით სონღულაშვილმა მონაწილეობა მიიღო „რეფორმეტრის“ მიერ გამართულ საჯარო და კერძო სექტორების დიალოგში, რომელიც ელექტრონული კომერციის რეფორმას მიეძღვნა. ინფორმაციას პარლამენტის პრესსამსახური ავრცელებს.
როგორც შეხვედრაზე აღინიშნა, ელექტრნული კომერციის ინდუსტრია სწრაფად ხდება ერთ-ერთი ყველაზე მნიშვნელოვანი ინსტრუმენტი საერთაშორისო ვაჭრობაში. COVID-19-ის პერიოდში ონლაინ ვაჭრობის წილი მთლიან გაყიდვებში მნიშვნელოვნად გაიზარდა. თუმცა, აღნიშნული სექტორი საქართველოში ფრაგმენტირებულია და ჯერ კიდევ განვითარების საწყის ეტაპზეა.
დღევანდელ შეხვედრაზე შეკრებილმა მხარეებმა სწორედ ელექტრნული კომერციის სფეროს რეფორმასთან დაკავშირებით იმსჯელეს.
„ჩვენი, როგორც დარგობრივი ეკონომიკისა და ეკონომიკური პოლიტიკის კომიტეტის უმთავრეს მიზანს ქვეყნის ეკონომიკური განვითარების ხელშეწყობა წარმოადგენს. სწორედ ამიტომ, დღეს ქვეყანაში შექმნილი პანდემიური ვითარებიდან გამომდინარე პრიორიტეტს საკანონმდებლო დონეზე ბიზნესის პოსტკრიზისული აღდგენისა და განვითარების ხელშეწყობა წარმოადგენს. შესაბამისად, ვფიქრობ, ელექტრონული კომერციის რეფორმა საშუალებას მოგვცემს დამატებითი სტიმულები შევქმნათ ეკონომიკური განვითარებისთვის. მით უფრო, როცა ელექტრონული კომერციის ინდუსტრიის, როგორც ერთ-ერთი მნიშვნელოვანი ინსტრუმენტის სწრაფი ინტეგრირება საერთაშორისო ვაჭრობაში, სწრაფად ვითარდება და ამ პროცესში საქართველოს ჩართვა და გაძლიერება მნიშვნელოვანი ცვლილებების წინაპირობა იქნება ეკონომიკური განვითარების თვალსაზრისით. აღნიშნული საკითხის ასეთ ფორმატში განხილვა კი მნიშვნელოვანია იმიტომ, რომ ჩამოყალიბდეს ერთიანი ხედვა, როგორც საჯარო ისე კერძო სექტორის, როგორ უნდა განვითარდეს ელექტრონული კომერცია საქართველოში, მხოლოდ ამ შემთხვევაში შეიძლება მივაღწიოთ წარმატებას“, - განაცხადა დავით სონღულაშვილმა შეხვედრაზე.
კომიტეტის თავმჯდომარემ მზადყოფნა გამოთქვა პარლამენტის დარგობრივი ეკონომიკისა და ეკონომიკური პოლიტიკის კომიტეტის რეფორმის პროცესში აქტიურ ჩართვასთან დაკავშირებით.
შეხვედრა ISET-ის კვლევითი ინსტიტუტის და USAID -ის მხარდაჭერით გაიმართა.