ბიზნესმენის, დავით ხიდაშელის განცხადებით, მის წინააღმდეგ ტყუილებს ავრცელებენ, მთავრობა კი იმდენად უსუსური და დაუცველია, რომ მას უსაფუძვლო თავდასხმებისგან ვერ იცავს. დავით ხიდაშელის განცხადებას „მთავარი არხი“ ავრცელებს.
„კომერსანტი“ ცდილობს ბიზნესმენთან დაკავშირებას და გავრცელებული განცხადების დადასტურებას.
როგორც „მთავარი არხის“ ვებგვერდზე გამოქვეყნებული განცხადებიდან ირკვევა, ბიზნესმენმა თავის ოჯახს შესთავაზა, რომ გამოცხადდეს ტენდერი, რომლითაც კვალიფიციურ მსურველებს მის მიერ შეძენილი ქონების 50%-ის ყიდვის საშუალება მიეცემათ, 20%-იანი ფასდაკლებით.
„რადგან კანონმდებლობა, მთავრობა იმდენად უსუსური და დაუცველია, რომ ღია ტენდერებში გამარჯვებული თავისი მოქალაქე ვერ დაუცავს ასეთი უსაფუძვლო თავდასხმებისა და სიყალბისგან, გამოსავალს იმაშიღა ვხედავ, რომ განზე გავდგე!
საკვირველია, ლამაზ სახელებს ამოფარებული ამდენი ცრუ, პროვოკატორი, ინფორმაციის დამახინჯებაში დაოსტატებული, ტყუილების გამავრცელებელი ერთად რამ შეკრიბა.
საზოგადოებისთვის ნათლად რომ გამოჩნდეს, რომ ეს ცრუ მქადაგებელნი ვერც ვერავის დამშინებლები და ვერც ვერაფრის გამკეთებელნი არიან, მე ვურჩიე ჩემს ოჯახს გამოვაცხადოთ ტენდერი 2022 წლის 31 დეკემბრამდე, რათა ყველა კვალიფიციურ მსურველს ჰქონდეს იმის შესაძლებლობა, რომ 20%-იანი ფასდაკლებით შეიძინოს იმ ქონების 50%-იანი წილი, რომელიც ჩემმა ოჯახმა შეიძინა — იქნება ეს დოქები თუ სანადირო მეურნეობის ლიცენზია რაჭაში … ერთი დაველოდები მსურველებს, რომ ვინ რისი მყიდველიამ ან საქართველოში რაიმე გარე ინვესტიციის მომტანი!,“ - ციტირებს ხიდაშელს ტელეკომპანია.
შეგახსენებთ, რომ გუშინ „საერთაშორისო გამჭვირვალობა - საქართველომ“ გამოაქვეყნა მასალა, სადაც აღნიშნული იყო, რომ დავით ხიდაშელისთვის რაჭაში სამონადირეო მეურნეობის მოწყობის 49 წლიანი ლიცენზიის გადაცემით ქვეყანამ ფინანსური ზიანი მიიღო.
დეტალურად იხილეთ აქ: