ვიცე-პრემიერის, საგარეო საქმეთა მინისტრის დავით ზალკალიანის განცხადებით, საქართველო არა მხოლოდ შეუერთდა უკრაინის საკითხზე გაეროს რეზოლუციას, არამედ დაასპონსორა კიდეც. როგორც მან აღნიშნა, საქართველომ მკაფიო პოზიცია დააფიქსირა, რომ ამ რთულ სიტუაციაში უკრაინის გვერდით დგას და საერთაშორისო სამართლის პრინციპების დაცვის მომხრეა.
„პირველ რიგში, მინდა ვთქვა, რომ ჩვენ არა მხოლოდ შევუერთდით, არამედ დავასპონსორეთ ეს რეზოლუცია. საქართველო იყო იმ ქვეყნებს შორის, ვინც თავდაპირველად, ეს რეზოლუცია დაასპონსორა იმისთვის, რომ გაეროს უშიშროების საბჭოზე მიღებული ყოფილიყო. ვიცოდით რა, რომ რუსეთის ფედერაცია მაინც ვეტოს დაადებდა და როგორი მწვავე რეაქცია ექნებოდა რუსეთის ფედერაციას, ჩვენ, ჩვენი ეროვნული ინტერესებიდან გამომდინარე, უკრაინაში მიმდინარე აგრესიის ფონზე, ჩვენი მკაფიო პოზიცია დავაფიქსირეთ, ამ სიტუაციაში უკრაინის გვერდით ვართ, ჩვენ ვართ საერთაშორისო სამართლის პრინციპების დაცვის მომხრე და ამით ჩვენი მკაფიო პოზიცია გამოვხატეთ.
მას შემდეგ, რაც მას რუსეთმა ვეტო დაადო, მოგეხსენებათ, განსახილველად გენერალური ასამბლეის ფარგლებში გადმოვიდა, ჩვენ აქაც ვიყავით ჩვენი პოზიციის, უკრაინის მხარდაჭერის მიმართ თანმიმდევრული. ჩვენთვის ძალიან მნიშვნელოვანია, რომ მართალია, 144-მა ქვეყანამ დაუჭირა მხარი მთლიანად, მაგრამ საქართველო იყო იმ ქვეყნებს შორის, ვინც ეს რეზოლუციაა დაასპონსორა. ეს ნიშნავს იმას, რომ ჩვენ თანამონაწილე ვართ. ჩვენ აბსოლუტურად ვიზიარებთ ამ რეზოლუციის პათოსს, შინაარსსა და სულისკვეთებას“,- განაცხადა ზალკალიანმა.
ცნობისთვის, გაეროს გენერალურმა ასამბლეამ მიიღო რეზოლუცია სახელწოდებით „აგრესია უკრაინის წინააღმდეგ“, რომელიც გმობს რუსეთის შეჭრას უკრაინაში და მოითხოვს რუსეთისგან, დაუყოვნებლივ გაიყვანოს ჯარი უკრაინის ტერიტორიიდან. რეზოლუციას მხარი არ დაუჭირეს რუსეთმა, ბელარუსმა, ჩრდილოეთ კორეამ და ერიტრეამ.
IPN.GE