მსოფლიო ეკონომიკურმა ფორუმმა იანვარში გავრცელებული ომიკრონის შტამის გამო სტარტი 4 თვის დაგვიანებით 22 მაისს აიღო. უმთავრეს განსახილველ თემას უკრაინა წარმოადგენს. ფორუმიც სწორედ ვოლოდიმირ ზელენსკის მიმართვით გაიხსნა. Financial Times-ის ცნობით უკრაინის გარდა, მხარეები სასურსათო კრიზისსა და მწვანე ენერგიის მომავალზეც იმსჯელებენ.

უკრაინა. მეორე მსოფლიო ომის შემდეგ ევროპაში ყველაზე დიდ ომს დავოსშიც ყველაზე დიდი ადგილი დაეთმობა. ომმა 3 თვეში მშვიდობიანი მოქალაქეების ჩათვლით უკვე 50 000-ზე მეტი ადამიანი შეიწირა. რუსეთმა იმაზე მეტი დანაკარგი განიცადა ვიდრე ავღანეთში. უკრაინისთვის მიყენებულმა ეკონომიკურმა ზიანმა $600 მლრდ-ს, ზოგი გამოთვლით $1 ტრლნ-საც გადააჭარბა, ამ თანხაში შედის როგორც განადგურებული ინფრასტრუქტურა, ასევე გაჩერებული ბიზნესისა და მკვეთრად გაუარესებული საინვესტიციო გარემოს შედეგად მიღებული დანაკარგი. მსოფლიო ბანკსა და სხვა საერთაშორისო საფინანსო ინსტიტუტებს ჯერ კიდევ გასული წლის მიწურულს გაკეთებული ეკონომიკური ზრდისა და ინფლაციის პროგნოზების გადახედვა მოუხდათ. განახლებული პროგნოზი ორივე შემთხვევაში ნეგატიურისკენ გადახრას გულისხმობს.

სასურსათო კრიზისი. მეორე საკითხი - სასურსათო კრიზისი პირველთან პირდაპირ კავშირშია. უკრაინის პორტებში 22 მლნ ტონა ხორბალია ბლოკირებული. შედარებისთვის საქართველოს წლიური მოხმარება 27-ჯერ ნაკლები - 800 ათასი ტონაა. გამოდის რომ პუტინის ბრძანებით რუსულ გემებს 100 მლნ ადამიანისთვის 1 წლის სამყოფი ხორბალი აქვთ ბლოკირებული. გარდა ამისა, რუსეთმა მარცვლეულის რამდენიმე საწყობი საარტილერიო ცეცხლით გაანადგურა, 400 ათასი ტონა ხორბალი კი უბრალოდ მიითვისა და გასაყიდად სირიაში გაიტანა. იქ სადაც აქტიური საომარი მოქმედებები არ მიდის, უკრაინელი ფერმერები ჯავშანჟილეტებით მიწების დამუშავებას განაგრძობენ, თუმცა რამდენიმე ასეთი მცდელობა, მინდორში ჩატოვებული ნაღმის ამოქმედების შედეგად ფატალურად დასრულდა. უკრაინა ერთადერთი არაა. ხორბლის ექსპორტზე კიდევ ერთმა მსხვილმა ბეღელმა ყაზახეთმა შეზღუდვები დააწესა, ინდოეთმა კი საერთოდ აკრძალა. რაში ვლინდება სასურსათო კრიზისი? აპრილში საქართველოში პურის ფასი გასული წლის ანალოგიურ პერიოდთან შედარებით 30%-ით გაიზარდა, რაც დაბალშემოსავლიანი ადამიანისთვის მძიმე განაჩენია.

მწვანე ენერგია. მწვანე ენერგია დავოსში წინ წლებშიც ერთ-ერთ უმთავრეს განსახილველ თემას წარმოადგენდა. ახლა როცა რუსული ენერგორესურსებიდან თავის დაღწევის სურვილი გაჩნდა მწვანე ენერგიამ დამატებითი აქტუალურობა შეიძინა და წიაღისეულ საწვავთან დამშვიდობების პროცესი დააჩქარა. გლობალურ დათბობა, დაბინძურებულ ატმოსფეროს, დაბინძურებულ წყალსა და მათგან გამოწვეულ დაავადებებს, XXI საუკუნის პირველ 20 წელიწადში უფრო მეტი ადამიანი ემხვერპლა ვიდრე ორივე მსოფლიო ომში ერთად.

ბიტკოინი. ბიტკოინი ახლა $30 000 ღირს და მისი კაპიტალიზაცია $577 მლრდ-ს შეადგენს, თუმცა სულ რამდენიმე თვის წინ #1 კრიპტოვალუტის ფასი $69 000-ს ხოლო კაპიტალიზაცია $1.2 ტრლნ-ს აჭარბებდა. როგორია კრიპტოვალუტებისა და ზოგადად ბლოკჩეინ ტექნოლოგიების მომავალი? როგორ უნდა დარეგულირდეს სფერო? დავოსში შეკრებილები პასუხების გაცემას ამ კითხვებზეც შეეცდებიან.