კვების პროდუქტების ბაზარზე დემპინგი ერთ-ერთი მთავარი პრობლემაა, რაც ადგილობრივი წარმოებისთვის დიდი დაბრკოლებაა. ამ მხრივ პრობლემა კიდევ უფრო შეიძლება გამწვავდეს თურქეთში სასოფლო-სამეურნეო პროდუქტების წარმოებაზე დღგ-ს 8–დან 1%-მდე შემცირების გადაწყვეტილებამ. სპეციალისტები ფიქრობენ, რომ ანალოგიური ნაბიჯის გადადგმაზე უნდა იზრუნოს ადგილობრივმა ხელისუფლებამ და გადასახადები შეამციროს, ნაწილიც ერთწლიანი კულტურების განვითარებაზე აკეთებს აქცენტს და ამბობს, რომ ქვეყანას აქვს პოტენციალი იმპორტი დიდწილად ჩაანაცვლოს და არ იყოს უცხოურ პროდუქტზე დამოკიდებული, რაც სასურსათო უსაფრთხოების თვალსაზრისითაც დიდი გამოწვევაა.

სოფლის მეურნეობის სფეროს ექსპერტი ანზორ მესხიშვილი ქართული ბაზრის განვითარების ყველაზე დიდ დაბრკოლებად დემპინგს მიიჩნევს.

,,სოფლის მეურნეობა უნდა ეხმარებოდეს ხალხს. როცა თურქეთიდან შემოტანილი პროდუქტი 80 თეთრი ღირს, ქართული - 1,40 ლარი, ცხადია, მომხმარებელი იაფიანს იყიდის. მარტო კარტოფილის წარმოება რომ ავიღოთ, თვითღირებულება 1 ლარზე ნაკლები არ ჯდება, ვერც ამაზე  ნაკლებად გაყიდიან. ახლა თურქეთმა დღგ შეამცირა.  ფერმერების ნაწილმა შეიძლება ვერც გაყიდოს პროდუქცია, რადგან დიდი რისკია, თურქეთიდან სურსათი დემპინგურ ფასში შემოვიდეს.  როცა ჩვენ ვაწარმოებთ საქართველოში გარკვეულ პროდუქციას და ანალოგიური შემოგვაქვს სხვა ქვეყნიდან, კონკურენციის გაწევა ფასის გამო საკმაოდ ძნელია. ამიტომ მეტი შეზღუდვა უნდა დაწესდეს იმპორტზე,  ყურადღება და მხარდაჭერა უნდა სოფლის მეურნეობას, ასე შორს ვერ წავალთ“, - ამბობს მესხიშვილი ,,კომერსანტთან“.

დემპინგის საფრთხეზე საუბრობს აგრარული სფეროს ექსპერტი ბადრი რამიშვილი. რაც შეეხება თურქეთის ფაქტორს, ქართულ ბაზარზე ამ მხრივ ცვლილებას  რამიშვილი ნაკლებად ელოდება.

გარდა ამისა, ექსპერტი აქცენტს ერთწლიანი კულტურების წარმოებაზე აკეთებს და დასძენს, რომ დარგის ხელშეწყობა სასიცოცხლოდ მნიშვნელოვანია, რომ იმპორტზე დამოკიდებულება შემცირდეს. 

ერთწლიანი კულტურების საწარმოებლად არსებული პოტენციალის გამოყენების პრობლემაზე საუბრობს სოფლის მეურნეობის სპეციალისტი ბადრი რამიშვილიც. 

,,საქართველოს მრავალფეროვანი ბიო-კლიმატი შესაძლებლობას გვაძლევს, რომ ერთწლიანი კულტურები დიდი რაოდენობით ვაწარმოოთ. ეს პოტენციალი ქვეყანაში საკმაოდ მაღალია.  მნიშვნელოვნად უნდა განვავითაროთ მთლიანად აგროსექტორი თავისი გადამამუშავებელი მრეწველობის ჩათვლით, სხვა ვერაფერი გამოგვიყვანს ამ სიტუაციიდან. თურქეთის მთავრობის მხრიდან დღგ-ს შემცირების გადაწყვეტილება საუკეთესო მაგალითია, როგორ უფრთხილდება ქვეყანა საკუთარ ბაზარს. მართალია, მსოფლიო სავაჭრო ორგანიზაციის წევრობა პროტექციონისტური პოლიტიკის გატარებას გვიზღუდავს, მაგრამ გადასახადთან დაკავშირებით გარკვეული ზომების მიღება აუცილებელია. კრიტიკულ სიტუაციაში ვიმყოფებით და ადგილობრივ წარმოებას მაქსიმალურად უნდა დავუჭიროთ მხარი“, – აცხადებს ბადრი რამიშვილი ,,კომერსანტთან“.

ცნობისთვის, ინფლაციის შემცირებისა და საექსპორტო ბაზრებზე კონკურენტუნარიანობის ზრდის გამო თურქეთი საკვებ პროდუქტზე დღგ-ს 8%-დან 1%-მდე ამცირებს. ქართველი მეწარმეები ფიქრობენ, რომ ასეთ ვითარებაში საქართველოს სახელმწიფოს უნდა ჰქონდეს შემაგებებელი ნორმა, რომელიც ადგილობრივ მეწარმეს დაიცავს.

მარი ჩიტაია