2022 წლის ნოემბერში, საბანკო სექტორის სადეპოზიტო ვალდებულებები წლიურად 6.89 მლრდ ლარით (თვიურად 280.7 მლნ ლარით) გაიზარდა და 42.6 მლრდ ლარი შეადგინა.
„სადეპოზიტო ვალდებულებები წლიურად 19.28%-ით გაიზარდა, ძირითადად ეროვნული ვალუტის დეპოზიტების მატების გავლენით. კერძოდ, ნოემბერში წინა თვესთან შედარებით, ეროვნული ვალუტის სადეპოზიტო ვალდებულებები 346.7 მლნ ლარით (1.9%-ით) გაიზარდა და 18.4 მლრდ ლარი შეადგინა. აღნიშნული ზრდა, ძირითადად იურიდიული პირების დეპოზიტების მატებამ გამოიწვია. რაც შეეხება უცხოური ვალუტის დეპოზიტებს, წინა თვესთან შედარებით, 170.8 მლნ დოლარით გაიზარდა, რაც ძირითადად ფიზიკური პირების დეპოზიტების ზრდას უკავშირდება. ნოემბერში, სამთავრობო სექტორის დეპოზიტები 179.4 მლნ ლარით შემცირდა“, — აღნიშნავენ ეროვნულ ბანკში.
2022 წლის ნოემბერში დეპოზიტების საშუალო შეწონილი საპროცენტო განაკვეთები (მთავრობის გარეშე) წინა თვესთან შედარებით 0.1 პპ-ით გაიზარდა და 5.74% შეადგინა. ეროვნული ვალუტით დეპოზიტებზე საშუალო შეწონილი წლიური საპროცენტო განაკვეთი 0.04 პპ-ით გაიზარდა და 8.2% შეადგინა, ხოლო უცხოური ვალუტით გაცემულ დეპოზიტებზე - 0.11 პპ-ით, 0.9%-მდე გაიზარდა.
რეზიდენტების ვადიანი დეპოზიტების საპროცენტო განაკვეთები გაიზარდა, რაც მეტწილად ლარისა და ევროს ვადიანი დეპოზიტების საპროცენტო განაკვეთის ზრდამ განაპირობა. კერძოდ, ლარის დეპოზიტების საპროცენტო განაკვეთი წინა თვესთან შედარებით 0.4 პპ-ით გაიზარდა და 12.2% შეადგინა, ხოლო ევროს დეპოზიტების საპროცენტო განაკვეთი წინა თვესთან შედარებით, 0.2 პპ-ით, 0.78% -მდე გაიზარდა. დოლარის ვადიანი დეპოზიტის საპროცენტო განაკვეთი 0.1 პპ-ით, 1.1%-მდე გაიზარდა.
„უცხოური და ეროვნული ვალუტის დეპოზიტების ზრდის ტემპებიდან გამომდინარე, დეპოზიტების დოლარიზაცია, 2022 წლის ნოემბერში წინა თვესთან შედარებით 0.3 პპ-ით გაიზარდა და 57.1% შეადგენს. ნოემბრის ბოლოს, იურიდიული პირების დეპოზიტების დოლარიზაცია, წინა თვესთან შედარებით, 0.8 პპ-ით შემცირდა და 43.9% შეადგინა, ხოლო ფიზიკური პირების დეპოზიტების დოლარიზაცია 0.6 პპ-ით, 72.4%-მდე გაიზარდა. თუმცა აღსანიშნავია, რომ ნოემბრის თვეში ფიზიკური პირების ვადიანი დეპოზიტების დოლარიზაცია წინა თვესთან შედარებით 1.9 პპ-ით, 66.8%-მდე შემცირდა“, — ნათქვამია ეროვნული ბანკის იანვრის თვის მიმოხილვაში.