კორონავირუსის საწინააღმდეგო ვაქცინის ყიდვა შედარებით მარტივი საქმეა, მაგრამ შეძენის შემდეგ მისი მიწოდება მოსახლეობისთვის სათანადოდ გაყინულ პირობებში, ბევრად უფრო რთულია.
მსოფლიო ბანკმა ვაქცინირების კუთხით სხვადასხვა ქვეყნების შედეგები განიხილა და მოულოდნელ დასკვნამდე მივიდა - მდიდარი ქვეყნები ამ მხრივ განსაკუთრებული წარმატებით ხშირად სულაც არ გამოირჩევიან.
ყველა მთავრობის მთავარი ამოცანა სადღეისოდ არის ვაქცინის მოპოვება, მაგრამ როგორც კი პრეპარატი ქვეყანაში ჩადის, სხვა, თითქმის ასეთივე გადაუდებელი და აქტუალური პრობლემები ჩნდება, მაგალითად ცენტრალური საცავიდან ვაქცინის რეგიონებში განაწილება.
ჩამოტანილი ვაქცინა დიდ მაცივრებში ინახება, თუმცა, ბევრ, მათ შორის მდიდარ ქვეყანაში რეგიონებში ასეთი საცავები არ არსებობს. არა იმიტომ, რომ ფული არ ჰყოფნით, არამედ ხშირად იმიტომ რომ ამის საჭიროება არასდროს ყოფილა.
როგორ უნდა შეინახოთ პრეპარატი ვაქცინაციის პატარა ცენტრებში, თანაც -70%-ის პირობებში? თანაც იქ, სადაც ცხელა? თანაც თუ ქვეყანა ღარიბია და რეგიონებში ენერგომომარაგება ხშირად წყდება? — ეს საკითხები მსოფლიო ბანკმა შეისწავლა და საინტერესო დასკვნამდე მივიდა. მისი ავტორების აზრით, ძალიან მცირეა ურთიერთკავშირი ქვეყნის ეკონომიკურ სიმდიდრეს და ვაქცინაციის ჩატარების უნარს შორის.
ეს კი ნიშნავს, რომ ბევრმა საკმაოდ შეძლებულმა ქვეყანამ მოკლე ვადებში თავისი მოსახლეობის დაცვა, ანუ, ვაქცინების საკმარისი რაოდენობით შემოტანა და ადამიანების დროულად აცრა ვერ მოახერხა, ბევრმა ქვეყანამ კი პანდემიასთან ბრძოლის სტრატეგია არც კი შეიმუშავა.
საშუალო და დაბალი შემოსავლების მქონე ქვეყნების 85% ვაქცინაციას გეგმის მიხედვით ახორციელებს, სახელმწიფოთა 68% პრეპარატების ხარისხს და მის უკუჩვენებებს აკონტროლებს. თუმცა, 128 შესწავლილი ქვეყნიდან მხოლოდ 30% საკმარის ექიმებს ამზადებს და სამედიცინო პერსონალს ზრდის.
მოსახლეობაში ვაქცინისადმი ნდობის ზრდის მიზნით მიზანმიმართულ კამპანიებს ქვეყანათა მხოლოდ 27% ატარებს.
„ეს შეშფოთებას იწვევს, რადგანაც ვაქცინაცია წარმატებით მხოლოდ მაშინ ჩაივლის, როდესაც მას მოსახლეობის მხარდაჭერა ექნება. ამავე დროს ბავშვების აცრაში წარმატებული გამოცდილება, რომელიც განვითარებადი ეკონომიკის ბევრი ქვეყნისთვის დამახასიათებელია, კორონავირუსზე მასობრივი ვაქცინაციის წარმატების საწინდარიარაა. მაგალითად, ინდოეთი ბავშვების სხვადასხვა დაავადებებისგან აცრის კარგ ინფრასტრუქტურას ფლობს. მაგრამ, ზრდასრული ადამიანების მასობრივი ვაქცინაცია სულ სხვა ლოგიტისტიკას მოითხოვს“ - მიიჩნევს მსოფლიო ბანკი.
ფინანსური ინსტიტუტის აზრით, კორონავირუსი ბევრ ქვეყანას ჯანდაცვის სისტემის რეფორმის შანსს აძლევს, თუმცა, მას ბევრი არ იყენებს. ძირითადად კორონავირუსს საგანგებო მოვლენად და გამონაკლისად მიიჩნევენ.
უმნიშვნელოვანესი თემაა სამაცივრე მეურნეობის ფლობა. ქვეყნების 50%-მა ეს აღჭურვილობა უკვე იყიდა, თუმცა, ეს ნიშნავს, რომ მეორე 50% მაცივრებს ჯერაც არ ფლობს.
Spiegel.de
მოამზადა თენგიზ აბლოთიამ