მაშინ, როდესაც ბევრ ქვეყანაში კორონავირუსის ვაქცინების მწვავე დეფიციტია, სხვა ქვეყნებში მილიონობით დოზას ვარგისიანობის ვადის გასვლის გამო ნაგავში ყრიან.
ჰოლანდიელი ექიმის მარკო ბლინკერის თქმით, ქვეყნის მოქალაქეებს შორის აცრის მსურველთა რაოდენობა მკვეთრად მცირდება და მხოლოდ აფთიაქებში და ოჯახის ექიმების მარაგებში 200 000-ზე მეტი ჭარბი დოზა ინახება.
იმის ნაცვლად, რომ ეს პრეპარატების სხვა ქვეყნებში გადაიგზავნოს, სადაც დეფიციტია, მთავრობა მათ უტილიზებას გეგმავს - მისთვის ეს უფრო მარტივია, ვიდრე დროის, ენერგიის და ფულის დახარჯვა ვაქცინების უცხოეთში გადაგზავნაზე.
გაეროს ჯანდაცვის მსოფლიო ორგანიზაციის ინფორმაციით, უახლოეს პერიოდში ვადის გასვლის გამო გადაიყრება „ასტრა ზენეკას“ მილიონზე მეტი დოზა. ამ დროისთვის მხოლოდ ამერიკის შტატ ჯორჯიაში უტილიზებულ იქნა ვაქცინების 700 000 დოზა.
ექსპერტების პროგნოზით, აშშ-ში უახლოეს პერიოდში 13 მლნ ადამიანის აცრისთვის საკმარისი დოზა გახდება გადასაგდები.
პოლონეთს ივლისის ბოლოს 73 000 დოზის გადაგდება მოუწია, ჰონკონგში გამოუყენებელი ვაქცინების რაოდენობა იზრდება, გერმანიაში კი სავარაუდოდ გადასაყრელი ყოველი მეათე დოზა გახდება - 3,2 მლნ ერთეული.
საუბარია ვაქცინებზე, რომელიც სხვა, უფრო ღარიბ ქვეყნებში აკლიათ. ამ დროისთვის ნიგერიაში აცრილია მოსახლეობის მხოლოდ 1,4%, ჰაიტიში - 0, 01%. და ეს გამონაკლისი სულაც არაა.
საერთაშორისო ინიციატივა Covax-მა ვაქცინის განაწილების სამართლიანი საერთაშორისო სისტემა ვერ შექმნა - დღესაც პრეპარატების დიდი ნაწილი მდიდარ ქვეყნებში მიდის. სადღეისოდ გამოყენებული 5 მლრდ დოზიდან უდიდესი ნაწილი მდიდარ ქვეყნებზე მოდის.
Covax-ის მიზანი იყო 2021 წლის ბოლომდე ღარიბი ქვეყნებისთვის 2 მლრდ დოზის მიწოდება, თუმცა, რეალურად, სადღეისოდ მათ მხოლოდ 209 მლნ დოზა გადაეცათ.
ბევრ მთავრობას გულწრფელად სურს ჭარბი ვაქცინების ღარიბი ქვეყნებისთვის გადაცემა, თუმცა, მას შემდეგ, რაც პრეპარატების სხვადასხვა რეგიონებში, აფთიაქებში და კლინიკებში განაწილდა, მათი იდენტიფიცირება, შეგროვება და ტრანსპორტირება საზღვარგარეთ საკმაოდ რთული და ბიუროკრატიული პროცესია. სწორედ ამიტომ ყველა უფრო მარტივი გზით მიდის - გადაყარე ზედმეტი ვაქცინა და მორჩა პრობლემა!
ზოგჯერ ვაქცინების ჩუქება ხერხდება, თუმცა, ამ შემთხვევაში სხვა სირთულეები ჩნდება - ვადის გავლის პერსპექტივა.
ბრიტანეთმა კენიას 407 000 დოზა „ასტრა-ზენეკა“ გადასცა, თუმცა, ამ პარტიას ვადა სექტემბრის შუა რიცხვებში გასდის. შესაბამისად, მისი გამოყენებისთვის ძალიან მცირე დროა დარჩენილი. მაღალია იმის ალბათობა, რომ ამ ვაქცინების დიდი ნაწილი მაინც გადაიყრება, ოღონდ არა ინგლისში, არამედ უკვე კენიაში.
ვაქცინაციის აფრიკული კავშირის თავმჯდომარე აიოადე ალაკიჯა, ასეთ მიწოდებებს „ტროას ცხენი“ უწოდა - აგვისტოს დასაწყისში აფრიკაში უკვე განადგურდა 470 000 დოზა, რადგანაც მათ შენახვის ვადა გაუვიდა.
ნაჩუქარი ვაქცინები ძალიან გვიან შემოდის - მაგალითად, ლიბერიის მთავრობას მიღებული პრეპარატების გამოყენებისთვის მხოლოდ 15 დღე ჰქონდა, შესაბამისად 27 000 დოზა მაინც სანაგვეში აღმოჩნდა.
„ეს მოჯადოებული წრეა - არავინ იცის, რამდენი დოზა და როდის ჩამოვა, ამიტომაც შეუძლებელია ადამიანების საჭირო რაოდენობის მობილიზება. ზოგჯერ ადამიანებისთვის გვიწევს ვაქცინაციის შეთავაზება, შემდეგ კი უარის თქმა ვადის გასვლის გამო“, - ამბობს ალაკიჯა.
spiegel.de
ვაქცინაცია
