გერმანიის ეკონომიკის მინისტრმა და ვიცე-პრემიერა რობერტ ჰაბეკმა განაცხადა, რომ რუსული გაზსადენის „ჩრდილოეთის ნაკადი-2“ მშენებლობა გეოპოლიტიკური თვალსაზრისით შეცდომა იყო.
„ევროპის ყველა ქვეყანა ამ გაზსადენის წინააღმდეგი იყო - გერმანიის და ავსტრიის გარდა. და აი გაზსადენი აშენდა, თუმცა, საკითხი მისი ამუშავების თაობაზე ღია რჩება და ის ევროპული კანონმდებლობის შესაბამისად უნდა გადაწყდეს, - მიიჩნევს ჰაბეკი.
მისი თქმით, ყველას უნდა ახსოვდეს, რომ არსებული კანონმდებლობის თანახმად, მილსადენის მფლობელი არ შეიძლება პარალელურად მისი მმართველი იყოს.
„ჩვენი პოლიტიკა კონკურენციის სტიმულირება და მონოპოლიების შექმნის თავიდან აცილებაა. ამავე დროს დემონოპოლიზაცია ნიშნავს დამოკიდებულების შემცირებას. გერმანიის ქსელების რეგულირების სააგენტო „ ჩრდილოეთის ნაკადი-2“-თან დაკავშირებულ ყველა საბუთს შეისწავლის და მიიღებს კანონიერ გადაწყვეტილებას გაზსადენის ამუშავების, ან არამუშავების თაობაზე“, - განაცხადა ჰაბეკმა.
ვიცე-პრემიერი ასევე რუსეთის მხრიდან უკრაინის მიმართ აგრესიის შემთხვევაში „ჩრდილოეთის ნაკადი-2“-ის ფუნქციონირების საკითხს შეეხო.
მისი თქმით, აგრესია მკაცრი რეაგირების გარეშე არ დარჩება და ამ კუთხით მსჯელობისთვის დახურული თემები არ უნდა იყოს. თუმცა, ამადე დროს, მან ღიად და ცალსახად „ჩრდილოეთის ნაკადი-2“ არ უხსენებია.
ევროკავშირის ბევრი პოლიტიკოსი რუსეთის აგრესიის შემთხვევაში გაზსადენის მუშაობის დაბლოკვას აუცილებლად მიიჩნევს, მაგრამ გერმანიაში ეს საკითხი წინააღმდეგობრივ დისკუსიებს იწვევს.
მაგალითად, გერმანიის ახალმა კანცლერმა ოლაფ შოლცმა გაზსადენის ფუნქციონირების და უკრაინის ირგვლივ დეესკალაციის საკითხები გაყო - მისი თქმით, მათ შორის არავითარი კავშირი არ არსებობს.
„ჩრდილოეთის ნაკადი-2“ - ეკონომიკური პროექტია, და მის ირგვლივ არსებული პრობლემები, მათ შორის სერტიფიცირების კუთხით, ასევე ეკონომიკური ხასიათისაა“, - მიიჩნევს კანცლერი.
ნოემბერში გერმანულმა რეგულატორმა გაზსადენის სერტიფიცირების პროცესი შეაჩერა და განაცხადა, რომ მილსადენის ამუშავება შესაძლებელი იქნება მხოლოდ იმის შემდეგ, რაც ოპერატორი Nord Stream 2 AG, რომელიც შვეიცარიაშია დარეგისტრირებული, გაზსადენის მართვისთვის კომპანიას გერმანიაში დააარსებს.
გაზსადენის სერტიფიცირების პროცესი, რომელიც 2021 წლის იანვარში უნდა დასრულებულიყო, გაურკვეველი პერიოდით გადაიდო, კომპანიამ კი განაცხადა, რომ მზადაა რეგულატორის ყველა მოთხოვნის შესრულებისთვის.
გარდა ამისა, თუ ქსელების ფედერალური სააგენტო მილსადენს მუშაობის უფლებას მიანიჭებს, გადაწყვეტილება განსახილველად ევროკომისიას გადაეცემა - მისი შესწავლის ვადა 4 თევა.
საბოლოო ჯამში, თუ ევროპული რეგულატორი სერტიფიცირებას დაამტკიცებს, გერმანიის ფედერალურ სააგენტოს საბოლოო გადაწყვეტილების მიღებისთვის კიდევ 2 თვე ექნება.