Deutsche Bank არის ბოლო ბანკი, რომელიც მსოფლიოში საბანკო კრიზისის და პანიკური გაყიდვების გამო დაზარალდა, მაგრამ ანალიტიკოსებმა განაცხადეს, რომ ეს ბაზრის მხრიდან ირაციონალური ნაბიჯია.
პარასკევს Deutsche Bank-ის აქციების ფასი 8,22%-ით დაეცა დეფოლტისგან დაზღვევის ხარჯების უეცარი ზრდის ფონზე. მაგრამ ნაკლებად სავარაუდოა, რომ გერმანული ბანკი - რომელსაც ჰქონდა მოგების 10 კვარტალი და ძლიერი გადახდისუნარიანობისა და ლიკვიდურობის პოზიციები - ისევე დაეცემა, როგორც Credit Suisse-ი, — წერს CNBC.
ფედერალური სარეზერვო მონაცემების თანახმად, აშშ-ში მომხმარებლებმა 15 მარტს ბანკებიდან 98.4 მლრდ დოლარი - ანუ მთლიანი დეპოზიტების დაახლოებით 0.6% გაიტანეს. მცირე ბანკებს 120 მლრდ დოლარის გადინება ჰქონდათ, ხოლო უფრო დიდ ინსტიტუტებში დეპოზიტები გაიზარდა 67 მლრდ დოლარით, — წერს CNBC წყაროზე დაყრდნობით.
პარასკევს, ევროპაში საბანკო კრიზისის გავრცელების საშიშროების მიუხედავად, აშშ-ს საბანკო ბაზრები გაიზარდა, მაგრამ ევროპის Stoxx 600 ბანკების 3.8%-იანი ვარდნის გამო, 1.4%-იანი კლებით დაიხურა. Deutsche Bank-ის გარდა, Societe Generale-მა დაკარგა 6,13%, Barclays-მა - 4,21%-ი და BNP Paribas-მა - 5,27%.
საერთაშორისო სავალუტო ფონდის ხელმძღვანელმა კრისტალინა გეორგიევამ განაცხადა, რომ ბანკების ბოლოდროინდელმა კოლაფსმა გაზარდა ფინანსური სტაბილურობის რისკი, მაგრამ ჩინეთის ეკონომიკურმა აღდგენამ შეიძლება გააძლიეროს მსოფლიო ეკონომიკა. სავალუტო ფონდის შეფასებით, ჩინეთის მშპ-ის ყოველი 1 პროცენტული პუნქტით ზრდა აზიის სხვა ეკონომიკების მშპ-ს 0,3 პროცენტულ პუნქტს უმატებს.
Deutsche Bank-ი, როგორც ჩანს, ბაზარზე არსებული პანიკის ბოლო მსხვერპლია. პარასკევს, მას შემდეგ რაც მისი საკრედიტო დეფოლტის სვოპების ფასი 2018 წლის შემდეგ უმაღლეს დონეზე გაიზარდა, ინვესტორებმა გერმანულ ბანკში გაყიდვები დაიწყეს.
ანალიტიკოსების აზრით, ეს ნაბიჯი ძირითადად ირაციონალურია. Deutsche Bank-ი არ არის კიდევ ერთი Credit Suisse, — წერს CNBC.
ბანკის IV კვარტლის ანგარიშების მიხედვით, Deutsche Bank-მა 1,8 მლრდ ევროს (1,98 მლრდ დოლარი) წმინდა მოგება გამოაცხადა, რაც მას წლიურ წმინდა შემოსავალს 2022 წლისთვის 5 მლრდ ევრომდე ზრდის. ამის საპირისპიროდ, Credit Suisse-ს IV კვარტალს 1,4 მლრდ შვეიცარიული ფრანკის (1,51 მლრდ დოლარი) ოდენობით ზარალი ჰქონდა და მთელი წლის განმავლობაში კი ზარალმა 7,3 მლრდ შვეიცარიული ფრანკი შეადგინა.
CNBC-ის ანალიტიკოსების აზრით, მეორე მიზეზი, რის გამოც ეს 2 ბანკი ერთმანეთს არ უნდა შევადაროთ, მათი ლიკვიდურობის დაფარვის კოეფიციენტების შედარებაა.
Deutsche Bank-ის ლიკვიდურობის დაფარვის კოეფიციენტი 2022 წლის ბოლოს 142% იყო, რაც იმას ნიშნავს, რომ ბანკს ჰქონდა საკმარისზე მეტი ლიკვიდური აქტივები, რათა დაფაროს ფულადი სახსრების მოულოდნელი გადინება 30 დღის განმავლობაში. მეორეს მხრივ, Credit Suisse-მა გაამჟღავნა, რომ 2022 წელს უნდა გამოეყენებინა „ლიკვიდურობის ბუფერები“, რადგან შვეიცარიის ბანკი ლიკვიდურობის მარეგულირებელ მოთხოვნებზე დაბლა დაეცა.
AllianceBernstein-ის შვილობილი კომპანია კვლევითი ფირმა Autonomous იმდენად იყო დარწმუნებული Deutsche Bank-ში, რომ გამოსცა კვლევითი ნოტა, სადაც აღნიშნულია, რომ Deutsche არ იქნება შემდეგი Credit Suisse.
„ჩვენ არ ვართ შეშფოთებული Deutsche-ის სიცოცხლისუნარიანობასთან ან აქტივების ნიშნებთან დაკავშირებით. უფრო ცხადად რომ ვთქვათ, Deutsche არ არის შემდეგი Credit Suisse“,- ნათქვამია Autonomous-ის ნოტაში.