როდესაც ჩვენ ახალი კოდექსი მივიღეთ 2018 წელს, სრულად შეიცვალა მიდგომებიც, გზშ-ს დაქვემდებარებული საქმიანობების ჩამონათვალი გაფართოვდა, - ამის შესახებ გარემოს დაცვისა და სოფლის მეურნეობის სამინისტროს გარემოს ეროვნული სააგენტოს უფროსის მოადგილემ მაია ბერაძემ რადიო „კომერსანტის“ ეთერში გადაცემა „აგროსექტორში“ სტუმრობისას განაცხადა.
მაია ბერაძის თქმით, დაახლოებით 400 საქმიანობა მოექცა რეგულაციების ქვეშ და შესაბამისად უწყებაშიც მოიმატა სააგენტოში შემოსულმა განაცხადებმა.
„ის საქმიანობები, რომელიც არ იყო დაქვემდებარებული შესაბამის პროცედურებს გარემოს დაცვითი შეფასების კუთხით დღეს უკვე რეგულირებას ექვემდებარება: ეს იქნება სხვადასხვა ინფრასტრუქტურული პროექტები, ეს იქნება სოფლის მეურნეობის ნაწილი, რომელიც მანამდე ასეთი ინტენსივობით არ იყო წარმოდგენილი ჩვენს კანონმდებლობაში. ძალიან ბევრი მიმართულება დაემატა და დღეს უკვე რეგულირების ქვეშაა“, - აცხადებს გარემოს ეროვნული სააგენტოს უფროსის მოადგილე.
მისივე განმარტებით, ეს საქმიანობები, რომელიც დღეს შეფასებას ექვემდებარება, ნამდვილად სამსჯელოა და უნდა მოხდეს მათი შეფასება ექნება თუ არა კონკრეტულ პროექტს ზემოქმედება გარემოზე.
„რატომ დადგა დღის წესრიგში ამ საქმიანობების გაფართოების საკითხი? იმიტომ რომ ჩვენ შევიმუშავეთ გარემოს დაცვის კოდექსი, რომელიც სრულად ჰარმონიზებულია საერთაშორისო მოთხოვნებთან, შესაბამის დირექტივებთან და სწორედ ამ დირექტივების ჩამონათვალში იყო იმ საქმიანობების ჩამონათვალი, რომლებიც უნდა ექვემდებარებოდეს გარემოს დაცვით შეფასებებს“, - ამბობს მაია ბერაძე.
გარემოს ეროვნული სააგენტოს უფროსის მოადგილე სააგენტოში შესული დოკუმენტაციის ხარისხზეც ამახვილებს ყურადღებას და აცხადებს, რომ ასეთი დოკუმენტაცია შესაძლოა ერთხელ ან ორჯერაც კი დახარვეზდეს, რაც საბოლოო ჯამში გადაწყვეტილების მიღების ვადებს ზრდის. მაია ბერაძე სააგენტოში კადრების დეფიციტზეც ამახვილებს ყურადღებას და ამბობს, რომ დარგობრივი მიმართულებით კადრების დეფიციტია.
„ასევე ძალიან მნიშვნელოვანი და მტკივნეულია როგორც საჯარო სექტორისთვის ასევე კერძო სექტორისთვის - კადრების დეფიციტი. მით უმეტეს დარგობრივი მიმართულებით. დღეს რთულია დარგობრივი სპეციალისტი იპოვო. მიუხედავად ამისა ჩვენ ჩვენი რესურსებით შესაბამის სამეცნიერო და სასწავლო დაწესებულებებთან თანამშრომლობით ვცდილობთ, რომ წამოვიყვანოთ სტუდენტები. დღეს ისეთ სიტუაციაში ვართ, რომ ხშირად საჯარო სექტორი ვერ უწევს კონკურენციას კერძო სექტორს, თავისი დატვირთულობიდან გამომდინარე, იგივე სახელფასო განაკვეთებიდან გამომდინარე. კერძო სექტორი არ მიმართულებით უფრო მოქნილია და აქვს საშუალება გაზარდოს ხელფასი. გადინება არის დიდი“- ამბობს მაია ბერაძე.