საქართველოს აეროპორტების გაერთიანების ხელმძღვანელის თამარ არჩუაძის შეფასებით, 2022 წელი სექტორისთვის საკმაოდ მძიმედ დაიწყო, რადგან თებერვლის თვეში, რუსეთის მიერ უკრაინაში დაწყებული ომის გამო საჭირო გახდა ყველა არსებული პროგნოზის გადახედვა. თუმცა როგორც წლის მიწურულს თამარ არჩუაძე „კომერსანტთან“ ამბობს, 2022 წელს მაინც წარმატებულად შეაფასებდა.
„ვინაიდან უკრაინის ბაზრის წილი საქართველოს ავიაბაზარზე იყო 15%-ი, სასწრაფოდ გადავერთეთ ამ დანაკლისის კომპენსაციის გზების ძიებაზე. შესაბამისად მოგვიწია უფრო მეტად და აქტიურად მუშაობა არსებულ ავიაკომპანიებთან და იმ მოლაპარაკებების დაფუშინგება, რომელიც მიმდინარეობდა 2021 წელს და 2022 წლის ზაფხულის სეზონზე.
მიუხედავად არსებული გამოწვევებისა, წელს მაინც წარმატებულად შევაჯამებდი იმიტომ, რომ 2021 წელთან შედარებით მგზავრთნაკადი გაზრდილია და 2022 წელს ვასრულებთ 80-85%-იანი აღდგენით. კონკრეტული აეროპორტები, როგორიცაა ბათუმის და ქუთაისის საერთაშორისო აეროპორტები პრაქტიკულად 100%-იანი აღდგენით ამთავრებს,“ — ამბობს თამარ არჩუაძე.
საქართველოს აეროპორტების ხელმძღვანელს პოზიტიური მოლოდინები აქვს 2023 წლისთვისაც.
„ასევე საკმაოდ პოზიტიურად ვუყურებთ 2023 წელს. ავიაკომპანია Wizz Air-მა 2023 წლისთვის 5 ახალი მიმართულების დაწყება დააანონსა. იმავდროულად საქართველოში მოხდება უფრო დიდი ხომალდის ბაზირება. პირველად საქართველოში Airbus A320neo იქნება ბაზირებული და ეს მნიშვნელოვანი ფაქტია.
რაც შეეხება მგზავრთნაკადის აღდგენას სამივე აეროპორტში 2023 წლისთვის ესეც პოზიტიურ ჭრილში შეგვიძლია შევაფასოთ. ახალი მიმართულებების თუ არსებულ მიმართულებებზე სიხშირეების ზრდაზე მოლაპარაკებები მიმდინარეობს, არამხოლოდ ქუთაისის აეროპორტზე, ასევე თბილისის საერთაშორისო აეროპორტზეც. ჩვენ ძალიან აქტიურად ვმონაწილეობთ სხვადასხვა ფორუმებში, სადაც 500 აეროპორტი და 1000 ავიაკომპანია იკრიბება. სადაც რამდენიმე დღის განმავლობაში საშუალება გვაქვს მოლაპარაკებები ვაწარმოოთ მათთან, ჩვენი პოტენციალის წარმოჩინება მოვახდინოთ და გავაცნოთ ჩვენი ახალი საფასო პოლიტიკა, რომელიც 2021 წლიდან მოქმედებს“, - აცხადებს არჩუაძე.
მისი თქმით, პანდემიის შემდეგ ავიაციამ აღდგენა სწრაფად დაიწყო და გაზრდილი მოთხოვნის ფონზე, სხვა პრობლემებმა იჩინა თავი, რაც გარკვეულწილად საქართველოსაც შეეხო, რადგანაც ევროპაში რეისების გაუქმება თუ გადადება შესაბამისად იმ რეისებზეც აისხა, რომლებიც საქართველოს ევროპასთან აკავშირებდა.
„შეიძლება ითქვას, რომ ბოლო წუთებში ბილეთს ვეღარ იშოვი. ძალიან კარგი აღდგენის დინამიკაა. ძალიან კარგად მიმდინარეობს თავად მიმართულებების აღდგენა. დღეს შეგვიძლია იმის თქმა, რომ პანდემიამდელი მიმართულებები ფაქტობრივად სრულად გვაქვს აღდგენილი. ავიაკომპანიები გვემატება, მგზავრთნაკადის, თვითმფრინავების დატვირთულობის კოეფიციენტი გაზრდილია. ზოგი ავიაკომპანია თითქმის 100%-იანი დატვირთულობით დაფრინავს ჩვენს ბაზარზე.
მოგეხსენებათ, რომ წლის განმავლობაში მსოფლიოში იყო ძალიან ბევრი შეფერხება იმის გამო, რომ აეროპორტებს ან ნავიგაციას არ ჰყავდა შესაბამისი პერსონალი. საქართველოში ამ მხრივ რეალობა სხვაა, საქართველოს აეროპორტების გაერთიანებამ, TAV Georgia-მ და ისევე როგორც საქაერონავიგაციამ მოახერხეს და შეინარჩუნეს აბსოლუტურად ყველა თანამშრომელი და ამგვარი პრობლემები ჩვენს წინაშე არ დამდგარა, თუმცა იმის გამო, რომ კონკრეტულ სხვა ქვეყანაში იყო პრობლემა, შესაბამისად ეს რეისები ჩვენთანაც იგვიანებდა“,- აცხადებს თამარ არჩუაძე.