კიევში, რუსეთის სარაკეტო თავდასხმას, უკრაინიდან მარცვლეულის ექსპორტზე შეშფოთება გამოიწვია, რის გამოც ხორბლის ფიუჩერსები 7% - მდე გაიზარდა - ამის შესახებ ინფორმაციას გამოცემა Financial Times ავრცელებს. მათივე ინფორმაციით, ჩიკაგოს ბირჟაზე ხორბლის ფასმა ბუშელზე 9,448 დოლარს მიაღწია, რაც  ივნისის შემდეგ უმაღლესი მაჩვენებელია.

როგორც „კომერსანტთან“ საუბრისას “ საქართველოს ხორბლისა და ფქვილის მწარმოებელთა ასოციაციის აღმასრულებელმა დირექტორმა  ლევან  სილაგავამ აღნიშნა, მსოფლიო ბაზრებზე სიტუაცია ძალიან დაძაბული და გაურკვეველია. ასევე საუბარია იმაზეც, თუ როგორ გაგრძელდება „მარცვლეულის დერეფნის“ მუშაობა, რომელსაც ვადა ნოემბერში გასდის.

„შესაბამისად აქ არის მექანიზმი, რომ უნდა გაგრძელდეს „მარცვლეულის დერეფნის“ მუშაობა და ამას უნდა დაეთანხმოს  ოთხი მხარე: რუსეთი,  უკრაინა,  გაერო  და თურქეთი. შესაბამისად, ბოლო სიტუაციას თუ  შევხედავთ ძალიან გაურკვეველი ვითარებაა. გაგრძელდება თუ არა უკრაინის ხორბლის დერეფნის მუშაობა გაურკვეველია. შესაბამისად ეს ყველაფერი მსოფლიო ბაზრებზე ძაბავს სიტუაციას. დღეს ასტანაში ერდოღანი და პუტინი ხვდება ერთმანეთს, სადაც პოლიტიკურ თემასთან ერთად  განხილული იქნება ხორბლის თემა, პირველი საკითხი დერეფნის მუშაობის გაგრძელება იქნება, ასევე  მეორე საკითხი არის ის, რომ რუსული  ხორბალი მსოფლიო  ბაზრებზე ვერ გადის ან შეფერხებებით  გადის.  ასევე პრობლემურია ევროკავშირში რუსული გემების შესვლაც. შესაბამისად ამ კონტექსტს თუ  გავითვალისწინებთ და პლუს კიევთან დაკავშირებულ ამებებსაც შევხედავთ, შეიძლება მსოფლიო ბაზრებზე ფასების მატება ვიხილოთ“,- აღნიშნა ლევან სილაგავამ.

სილაგავას  განმარტებით, დღეს საქართველოში წისქვილკომბინატები მუშაობენ, თუმცა როგორც  ჩვენთან ასევე  მსოფლიოში ხვალინდელი დღის გარანტია არ არსებობს. შესაბამისად  გადაწყვეტილებას შემოიტანონ თუ არა ხორბალი ვერ იღებენ, შესაბამისად თუ მცურავი ბაჟი გაიზარდა ფქვილი ისევ დომინანტი იქნება.

„ამიტომ ვფიქრობ, რომ სახელმწიფომ  ჩვენ მიერ  შეთავაზებული ნაბიჯები უნდა გადადგას, რაც  გულისხმობდა მცურავი  ბაჟის საპირწონედ საქართველოში შემოსულ  ფქვილზე გადასახადის  შემოღებას. იმიტომ რომ მაშინ როდესაც ერთ წლის წინაც მცურავი ბაჟი  შემოვიდა, საქართველოს მთავრობას ძალიან მოკლე დრო ჰქონდა გადაწყვეტილების მისაღებად და არჩია, რომ  წისქვილების გაჩერება და ფქვილის იმპორტი ჯობდა, იმისთვის რომ ფქვილის ფასი შენარჩუნებულიყო. მაგრამ  ჩვენ  შევხედეთ წლის  ჭრილში, რომ ჯობდა რომ უფრო ეფექტური იქნებოდა წისქვილების მუშაობა და პურის ფასიც  და სასურსათო უსაფრთხოებაც უფრო უფრო  დაცული იქნებოდა.  ჩვენ კიდევ ერთხელ მოვუწოდებთ საქართველოს მთავრობას და პრემიერს, რომ ახლა მაინც მიიღოს  გადაწყვეტილება.  დღეს სტაბილური სიტუაციაა, დაძაბულობა ბაზარზე არ  გადმოსულა და ახლა მაინც  ფქვილის იმპორტზე შემოღებულ იქნას სარკისებური  გადასახადი. ამით  წისქვილკომბინატები  პურის ფასის დაჭერას უზრუნველყოფენ ამის გარანტიას ვიღებთ და ბიუჯეტიდანაც ერთი თეთრი არ გვჭირდება. ჩვენ გვექნება გარანტია, რომ ვიმუშავებთ, რომ ხორბალსაც მეტი რაოდენობით შემოვიტანთ და სტაბილურობას უზრუნველვყოფთ“, - აღნიშნა ლევან სილაგავამ.

დღეს ხორბლის შესასყიდი ფასი არის 320 დოლარი. 

 თაკო კვაჭანტირაძე