უკრაინის პრეზიდენტმა ვოლოდიმირ ზელენსკიმ საშობაოდ გავრცელებულ ვიდეომიმართვაში უკრაინელებს გამარჯვება კიდევ ერთხელ უსურვა და განაცხადა, რომ უკრაინული ოჯახი ერთიანია როგორც არასდროს,
„გულწრფელად ვულოცავ მილიონობით უკრაინულ ოჯახს, რომელიც დღეს წმინდა საღამოს გასატარებლად და ქრისტესშობის მაუწყებელი პირველი ვარსკვლავის შესახვედრად ერთად იკრიბება.
ეს არის ჰარმონიისა და ოჯახის ერთიანობის დღესასწაული. ჩვენ ერთად - დიდი უკრაინული ოჯახი ვართ. სადაც არ უნდა ვიყოთ ახლა - სახლში, სამსახურში, სანგარში, გზაში, უკრაინაში თუ საზღვარგარეთ - ჩვენი ოჯახი ერთიანია, ისე როგორც არასდროს. თავის გამბედაობით, გაუტეხელობით, ურთიერთპატივისცემით და ურთიერთდახმარებით.
ერთიანი გამარჯვების რწმენაში.
ჩვენ ამას თანმიმდევრულად ვუახლოვდებით. ყოველ დღე. ერთნაირად ვდგავართ ერთმანეთის მხარდამხარ. ყოველდღე ვიცავთ ჩვენს მიწას, ჩვენს კულტურას, ტრადიციებს, რწმენას. როგორც ამას ჩვენი წინაპარი კაზაკები აკეთებდნენ - რწმენისა და ქრისტეს ეკლესიის მცველები. ისევე როგორც ამას აკეთებდნენ მათი შთამომავლები და ჩვენი ჯარისა და ხალხის ტრადიციების გამგრძელებლები.
ჩვენს წინაპრებს სჯეროდათ, რომ შობის ღამეს გარდაცვლილი ნათესავების სულები ზეციდან მიწაზე ახლობელი ადამიანების სანახავად ჩამოდიან. დღეს ჩვენი წინაპრების სულები გვეხმარებიან ყოველდღიურად ჩვენს მიწაზე მომხდურის წინააღმდეგ ბრძოლაში.
ჩვენ განსაკუთრებულ დროში ვცხოვრობთ. ჩვენი ყველა დღესასწაული განსაკუთრებულია. ჩვენ უნდა დავარღვიოთ ჩვენი ზოგიერთი ტრადიცია, რათა დავიცვათ ჩვენი ტრადიციები.
დღესასწაულზე მუქი და ძველი სამოსი არ შეიძლება, რომ სახლში უბედურება არ შევიდეს. მაგრამ 2022 წლის 24 თებერვალს ჩვენ სახლში უბედურება მოვიდა, ამიტომ მას შემდეგ თეთრ სამოსში აღარ ვართ და შავ ძალებს ვებრძვით.
სტუმრებს განსაკუთრებული სიფრთხილითა და პატივისცემით უნდა მოეპყროთ. სტუმრებს - კი, მაგრამ არა ოკუპანტებს. წმინდა დღეს არ შეიძლება სახლის დალაგება და ნაგვის გატანა, მაგრამ ჩვენ ეშმაკებს ვებრძვით და ჩვენი სახლიდან 300 დღეზე მეტია ნაგავი ყოველდღიურად გაგვაქვს.
აკრძალულია კერვა და ქსოვა, მაგრამ ჩვენ ვქსოვთ შენიღბვის ბადეებს და ვკერავთ ჯავშანს, ბოროტების დასაძლევად. ამ დღეებში ჩვენი წინაპრები სანადიროდ არ დადიოდნენ, მაგრამ ჩვენ ვიბრძვით, რომ მტაცებელი დავამარცხოთ და მისი ნადავლი არ გავხდეთ.
ამას ხედავს ღმერთი, ამას ხედავს სამყარო. უკრაინული "შჩედრიკი" საშობაო სულს ანიჭებს მთელ პლანეტას. იმედის სული, სიკეთის სული და საოცრება. წელს მსოფლიოს ამ სულისკვეთებას მხოლოდ ჩვენი მუსიკა არ აძლევს, არამედ უკრაინული სიმამაცე, დაუმარცხებლობა, დაუმორჩილებლობა, უძლეველობა. ჩვენს წინაპრებს სჯეროდათ, რომ შობის ღამეს ცა იხსნება და თუ ამ დროს ზეციურ ძალებს შესთხოვთ, თქვენი ოცნება აუცილებლად ახდება.
დღეს ჩვენ ყველას ერთი ოცნება გვაქვს. დაე ყველა ოჯახში იყოს ჰარმონია, ყველა სახლში კეთილდღეობა, უკრაინულ მიწაზე - გამარჯვება და ამასთან ერთად ათასწლოვანი მშვიდობა და აყვავება.
ყველას გისურვებთ ბედნიერ შობას და გემრიელ კუტიას.
გაუფრთხილდით საკუთარ თავს, თქვენს ოჯახებს, გაუფრთხილდით ჩვენს უკრაინას!
ქრისტე დაიბადა! მოდით ვადიდოთ იგი!“- განაცხადა ვოლოდიმირ ზელენსკიმ.