დღის Top 10 საინტერესო ამბავი:
1.აპრილიდან ბანკები საპროცენტო განაკვეთებს ცალმხრივად მარტივად ვეღარ შეცვლიან
კომერციული ბანკების ნაწილმა დოლარში განთავსებულ დეპოზიტებზე საპროცენტო განაკვეთი შეამცირა, ამის პარალელურად კი საბანკო პროდუქტებზე საპროცენტო განაკვეთები არ შემცირებულა, შესაბამისად სპრედი გაიზარდა ანუ ბანკებმა უფრო მეტი მოგება ნახეს. ეს ცვლილება ბანკებმა ხელშეკრულებაში არსებული პუნქტის მიხედვით, თუმცა ცალმხრივად განახორციელეს.
2.საქართველომ რეგიონულ ციფრულ ჰაბად ქცევის შანსებიც დაკარგა
„კავკასუს ონლაინი“, რომელსაც მსოფლიო ციფრული პროექტის Digital Silk way-ს განხორციელებაში ერთ-ერთი საკვანძო როლი უნდა შეესრულებინა, საქართველოს მფლობელობაში აღარ არის. კავკასუს ონლაინის მფლობელმა ხვიჩა მაქაცარიამ კომპანიის მის მფლობელობაში დარჩენილი 51%-იანი წილიც აზერბაიჯანულ „ნექსოლ ჰოლდინგს“ მიჰყიდა. ტრანზაქციის შედეგად, კავკასუს ონლაინის 100%-ის მფლობელი აზერბაიჯანელი ბიზნესმენი ნასიბ ჰასანოვი გახდა.
3.„20 წელი ვცდილობდით სტაბილური ფასები გვქონოდა“ - არაგაზირებული სასმელი წყალი გაძვირდა
ჰორეკა სექტორის წარმომადგენლები სასმელი, არაგაზირებული წყლის ღირებულების ზრდაზე ალაპარაკდნენ. მათი თქმით, ქართული წყლის შეძენა მომხმარებელს და სექტორს დაახლოებით 10-15 პროცენტით უფრო ძვირად უწევს. წყლის კომპანიები „კომერსანტთან“ განმარტავენ, რომ მათი მხრიდან არაგაზირებულ წყალზე ფასის ზრდა გამოწვეულია დოლარის ფასის ცვლილებით, რამაც შემდგომში წყლის ჩამოსასხმელად აუცილებელი ნედლეულის, (ეტიკეტის, თავსახურის) გაძვირება გამოიწვია. ეს პროდუქცია საქართველოში ძირითადად თურქეთიდან შემოდის.
26 მარტის ვაჭრობის შედეგად ლარი დოლართან მიმართებით 2.45 თეთრით გაუფასურდა, რის შედეგადაც ერთი დოლარის ოფიციალური ღირებულება 3.3718 ლარი გახდა.
მთავრობის გადაწყვეტილებით, „ხორბლის ფქვილის სუბსიდირების“ სახელმწიფო პროგრამა 2021 წლის 30 ივნისამდე გაგრძელდა. პროგრამის ფარგლებში, ერთ 50 კილოგრამიან ტომარა პირველი ხარისხის ხორბლის ფქვილზე სუბსიდიის მოცულობა შეადგენს არაუმეტეს 20 ლარს.
6.ეპიდემიოლოგებმა შეიძლება მესამე ტალღის დასაწყისი ოფიციალურად გამოაცხადონ - ეკატერინე ტიკარაძე
„ჩვენ ახლა ვიმყოფებით იმ ფაზაში, რაც გარკვეულწილად მესამე ტალღის დასაწყისია. აქ მნიშვნელოვანია, ერთობლივი ღონისძიებები გატარდეს - ვაქცინაციის პროცესის თანმიმდევრული გამართვა, ასევე ჩვენი მოქალაქეების მოტივირება, რომ ვაქცინაციის პროცესი მნიშვნელოვანია“, — ეკატერინე ტიკარაძე.
7.მესამე ტალღა ბიზნესისთვის საკონტროლო გასროლა იქნება - ლევან ვეფხვაძე
ბიზნეს ასოციაცია მთავრობისგან კონკრეტული გეგმის წარდგენას ითხოვს. გაერთიანებაში ამბობენ, რომ კრიზისისგან თავის დასაცავად უნდა ჰქონდეს ბიზნესს ხედვა დაავადების რომელ მაჩვენებელზე რომელი ბიზნესი შეიზღუდება.
8.„რამდენიმე დღე კურსი იმერყევებს და მხოლოდ აპრილის პირველ რიცხვებში დაიწყებს შედარებით გამყარებას“
ეროვნულმა ვალუტამ 2021 წლის რეკორდი მოხსნა. ირაკლი ღარიბაშვილს პრემიერის რანგში დევალვაციის პირველ ტალღასთან მოუწევს თვალის გასწორება. „რეზონანსი“ შეეცადა გაერკვია, რამ გამოიწვია ეროვნული ვალუტის გაუფასურება და ახლანდელი ვარდნა დროებითია, თუ მომავალშიც უწყვეტად გაგრძელდება.
9.EBRD მცირე თანხებზე ონლაინ სასამართლოების შექმნას უჭერს მხარს
ბიზნესისთვის აუცილებელი საზოგადოებრივი მომსახურების დაცვის აუცილებლობის გათვალისწინებით, ევროპის რეკონსტრუქციისა და განვითარების ბანკი (EBRD) იწყებს საპილოტო პროექტს, რომელიც დაეხმარება ქვეყნებს მცირე სასამართლო პრეტენზიების მისაღებად ონლაინ სასამართლოების შემუშავებაში.
10.საუკუნის გარიგება - აზერბაიჯანული კომპანია მთელი აბრეშუმის გზის ინტერნეტს გააკონტროლებს
კომპანიათა საერთაშორისო ჯგუფმა NEQSOL Holding-მა რეგიონში საუკუნის გარიგების თაობაზე განცხადება გაავრცელა. გავრცელებული ინფორმაციის თანახმად, მსხვილმა ჰოლდინგმა, რომლის თანამფლობელიცაა აზერბაიჯანელი ბიზნესმენი ნასიბ გასანოვი, 2019 წელს დადებული ხელშეკრულების საფუძველზე ქართული ინტერნეტ-პროვაიდერი Caucasus Online იყიდა.