დღის Top 10 საინტერესო ამბავი:

1.ფინანსთა მინისტრმა თანამდებობა დატოვა

ფინანსთა მინისტრმა და ვიცეპრემიერმა ივანე მაჭავარიანმა თანამდებობა დატოვა - ამის შესახებ მან სოცილურ ქსელში დაწერა.

2.„გაჭირვებისას როგორც ოჯახიდან გააქვთ უკანასკნელი ქონება, ისე გამოაქვს მთავრობას საპრივატიზაციო ობიექტები“

მასშტაბური საპრივატიზებო პროექტი „100 საინვესტიციო შეთავაზება ბიზნესის“ ფარგლებში მთავრობამ გუშინ დამატებით 150-ზე მეტი 350 მლნ ლარამდე ღირებულების ობიექტი გამოიტანა გასაყიდად. აღსანიშნავია რომ ობიექტების ჩამონათვალში მოხვდა: 50-ზე მეტი საბადოს ლიცენზია - საწყისი ფასი 50 მლნ ლარი; 50 სასოფლო-სამეურნეო მიწა - საწყისი საპრივატიზებო თანხაა 19 374 500 ლარი; ლოკაციები გზებზე გასაჩერებელი ინფრასტრუქტურისთვის და სხვა.

3.დოლარის ღირებულება 3.45-ს გადასცდა, ვარდნის ამ ტემპით წლის ბოლოს კურსი 4.00-იან ნიშნულს გადალახავს

ლარი მკვეთრ ვარდნას განაგრძობს და გაუფასურების ახალი ისტორიული რეკორდის მოსახსნელად ემზადება. Bloomberg-ის სავაჭრო პლატფორმაზე 1 აშშ დოლარის ღირებულება 31 მარტს დღის 12:00 სთ-ისთვის 3.4600-ს აღწევს, რაც ეროვნული ბანკის მიერ გამოცხადებულ ოფიციალურ კურსს - 3.4118-ს თითქმის 5 თეთრით აღემატება.

4.„ლარის კურსს შველის ზუსტად ის, რომ პრემიერი პრობიზნესურია“ - ლაშა პაპაშვილი

„ყველაზე მთავარი მესიჯი, არის ის, რომ ეს პრემიერი არის პრობიზნესური“, – ასე აფასებს ბიზნესმენი ლაშა პაპაშვილი პრემიერ ირაკლი რარიბაშვილსა და ბიზნესმენებს შორის შეხვედრას. პაპაშვილის განცხადებით, პრემიერის ხელმძღვანელობით შეიქმნება საბჭო, რომელიც კონკრეტული მიმართულებით სამოქმედო ნაბიჯებს დასახავს.

5.„2021 წლის დასაწყისში ეროვნული ვალუტის გამყარების ყველა წინაპირობა არსებობდა, დღეს სხვა ფაქტია“ - არჩილ გაჩეჩილაძე

საქართველოს ბანკის გენერალური დირექტორი, არჩილ გაჩეჩილაძე აცხადებს, რომ 2021 წლის დასაწყისში ეროვნული ვალუტის გამყარების ყველა წინაპირობა არსებობდა. როგორც გაჩეჩილაძემ პრემიერ-მინისტრთან შეხვედრის დასრულების შემდეგ განაცხადა, მთავრობისგან პრობლემის განხილვის პირობა მიიღეს.

6.ლარის კურსის 3.5-იანი ნიშნულის შემდეგ პროდუქციის გაძვირება მოგვიწევს - შარმ-ტრეიდინგი

სადისტრიბუციო კომპანია „შარმ-ტრეიდინგის“ ხელმძღვანელი ვახტანგ საძაგლიშვილის ინფორმაციით, პიკური კურსი, რის შემდეგაც რითეილ სექტორს ფასების გადახედვა მოუწევს, 3.5-იანი ნიშნულია.

7.საქართველოს ეკონომიკა თებერვალში 5.1%-ით შემცირდა

წინასწარი შეფასებით, 2021 წლის თებერვალში, წინა წლის შესაბამის პერიოდთან შედარებით, რეალური მთლიანი შიდა პროდუქტის (მშპ) კლებამ 5.1 პროცენტი შეადგინა, ხოლო იანვარი თებერვლის საშუალო მაჩვენებელი -8.3 პროცენტია.

8.ბიზნესისთვის ელექტროენერგია 40%-ით, გაზი 140%-ით, წყალი 1200%-ით ძვირია - სხვაობას მაინც მომხმარებელი იხდის

მთელი საქართველოს მასშტაბით იანვრიდან როგორც „თელასის“ ასევე „ენერგო-პრო ჯორჯიას“ აბონენტებს ელექტროენერგიის ტარიფი საშუალოდ 18-24 პროცენტით გაეზარდათ. მთავრობამ სხვაობის ბიუჯეტიდან 1 წლის ვადით სუბსიდირების ვალდებულება აიღო. შეღავათები არ შეხებია ბიზნესს, რომელიც იქამდეც ენერგომატარებლებში მოსახლეობასთან შედარებით ბევრად მეტს იხდიდა და შემდეგ ტარიფს მის მიერ გამოშვებულ საბოლოო პროდუქციის ფასში ასახავდა.

9.ფულადი გზავნილების ქართული კომპანია MASTERCARD-ის სისტემაში ერთვება - გახდება თუ არა „ინტელიექსპრესი“ Western Union-ის კონკურენტი?

საქართველოდან უცხოეთში, განსაკუთრებით საბერძნეთში ემიგრანტების ზრდამ წლების წინ არაერთი კომპანიის შექმნას ჩაუყარა საფუძველი, ერთ-ერთი მათგანი ინტელიექსპრესი იყო, რომელიც 2006 წელს შეიქმნა და კომპანიის საქმიანობა საქართველოსა და საბერძნეთს შორის ფულადი გზავნილების განხორციელებით დაიწყო. მათი მთავარი ორიენტირი ქართველი ემიგრანტებისთვის ფულის გადარიცხვის მარტივი და სწრაფი მომსახურების მიწოდება იყო, რომელიც საშუალებას აძლევდა ადამიანებს ბანკის გარეშე გაეგზავნათ და მიეღოთ თანხა.

10. „ლარი უფსკრულისკენ მიექანება, ორი არაადეკვატური პოლიტიკური ბანაკი კი საამისოდ ვერც იცლის“ - ვაჟა ბერიძე

„ლარი უფსკრულისკენ მიექანება. პანდემიის გამო ეკონომიკა გაჩერებულია. ორი არაადეკვატური პოლიტიკური ბანაკი ტაკიმასხრობითაა დაკავებული. ეუბნებიან, ევროპელები და ამერიკელები პანდემია და ეკონომიკაა ახლა მთავარი, იმას მიხედეთო, ესენი კი ჯიუტი თხებივით ერქაგრეხილებიან ერთმანეთს ბეწვის ხიდზე და უეჭველი სულ მალე ჩაცვივდებიან უფსკრულში, სამწუხაროდ, ჩვენთან ერთად“ — წერს ვაჟა ბერიძე.