დღის Top 10 საინტერესო ამბავი:
„კომერსანტის“ ექსკლუზიური ინფორმაციით, 2021 წლის ერთ-ერთი უმსხვილესი ბიზნეს გარიგება შედგა. „თი ბი სი“ ბანკმა საკუთრებაში (უნივერსიტეტის 2 ნომერში) არსებული ობიექტი, რომელიც მრავალი წელია უფუნქციოდაა დარჩენილი, რითეილ ბაზრის ლიდერ „IG Development“-ს მიჰყიდა. ამის შესახებ ინფორმაცია „კომერსანტანს“ კომპანიის დამფუძნებელმა მინდია საბანაძემ დაუდასტურა, თუმცა გარიგების ღირებულების დასახელება არ ისურვა. ბიზნესმენი გვიყვება, რომ ახლა ქონების გადაფორმების პროცესი მიმდინარეობს.
2.„თიბისი დაზღვევამ“ ავტოდაზღვევაში პირველობა „ალდაგს“ დაუთმო
2021 წლის 3 თვის განმავლობაში 18 სადაზღვევო კომპანიის ავტოდაზღვევამ მომხმარებლებს 22,520,829 ლარი აუნაზღაურა. ამის შესახებ ინფორმაცია დაზღვევის ზედამხედველობის სამსახურის მიერ გამოქვეყნებულ ანგარიშშია მოცემული.
3.600-მდე რესტორნის სესხის სუბსიდირებაზე 9 მლნ ლარზე მეტი დაიხარჯა
პანდემიისა და კოვიდრეგულაციებით გამოწვეული ზარალის შემცირების მიზნით, 2020 წლის დეკემბერში საქართველოს მთავრობამ სარესტორნო ინდუსტრიის თანადაფინანსების სახელმწიფო პროგრამა დაამტკიცა, რომლის ფარგლებში 6 თვეში 600-მდე რესტორნის სეხის პროცენტის სუბსიდირებაზე 9 მლნ ლარზე მეტი დაიხარჯა.
4.„ინფლაციის დამარცხებაზე“ ორიენტირებული ინვესტირება საპენსიო ფონდიდან - ლევან სურგულაძე
გაცხადებული, ინფლაციის დამარცხებაზე ორიენტირებული საინვესტიციო პოლიტიკა არ არის საპენსიო ფონდის მონაწილეეების საუკეთესო ინტერესების შესაბამისი.
5.ბიძინა ივანიშვილის ოფშორში რეგისტირებული ორგანიზაციები საქართველოში 26 კომპანიას ფლობენ - TI
არასამთავრობო ორგანიზაციის საერთაშორისო გამჭვირვალობა საქართველოს კვლევის მიხედვით, ბიძინა ივანიშვილთან დაკავშირებული 10 ოფშორული კომპანია საქართველოში 26 -ს კომპანიას ფლობს.
6.15–მილიონიანი სასტუმრო Golden Tulip თბილისში შემოდგომაზე გაიხსნება (ფოტოები)
თბილისში სასტუმრო Golden Tulip-ი შემოდგომაზე გაიხსნება. როგორც „კომერსანტს“ საინვესტიციო კომპანია „ბლოკ ინვესტის“ აღმასრულებელმა დირექტორმა თორნიკე ჯანაშვილმა განუცხადა, ქეთევან წამებულის გამზირზე 4-ვარსკვლავიანი სასტუმროს შიდა სამუშაოები თითქმის დასრულებულია, თუმცა ტურისტების სიმცირის გამო მისი გახსნა შემოდგომამდე არ იგეგმება.
7.ნასესხების თანხების აუთვისებლობის გამო საქართველო 9.6 მლნ ლარით დაჯარიმდა
ეკონომიკური ვარდნის ფონზე სახელმწიფოს 2020 წელს დაგეგმილზე 5.1 მლრდ ლარით მეტის სესხება მოუწია, შედეგად ქვეყნის საგრეო ვალმა მშპ-სთან მიმართებაში 2002 წლის შემდეგ პირველად სახიფათო 60%-იან ზღვარს გადააჭარბა. პრობლემები შეიქმნა ნასესხების თანხების ათვისებაშიც. გეგმის ჩამორჩენისა და შეუსრულებელი ვალდებულებების გამო საქართველოს დამატებით 9.6 მლნ ლარის გადახდა მოუწია.
8.საქართველოს რკინიგზა $500 მლნ–ის 7–წლიანი ევრობონდების განთავსებას გეგმავს
„საქართველოს რკინიგზა“ 7–წლიანი მწვანე ობლიგაციების განთავსებას გეგმავს, რომლის მოცულობაც, სავარაუდოდ, $500 მლნ–ს შეადგენს. ობლიგაციების წლიური შემოსავლიანობა 4,875% იქნება. ამის შესახებ სააგენტო როიტერი საბანკო წრეებში საკუთარ წყაროებზე დაყრდნობით წერს.
9.ზურაბ ნოღაიდელი: „საქართველო უნდა გახდეს ენერგეტიკულად თვითკმარი ქვეყანა“
ენერგეტიკული კომპანია „ელ გრინის“ სამეთვალყურეო საბჭოს წევრმა, ყოფილმა პრემიერ–მინისტრმა ზურაბ ნოღაიდელმა განაცხადა, რომ „საქართველო უნდა გახდეს ენერგეტიკულად თვითკმარი ქვეყანა. საამისოდ მცირე და საშულო ენერგოპროექტები საკმარისი ვერ იქნება. საამისოდ საჭიროა მსხვილი ენერგეტიკული პროექტების, მათ შორის, პირველ რიგში, ჰიდროპროექტების, ნამახვანის, ხუდონის და ნენსკრას მსგავსი ჰიდროპროექტების, მარეგულირებელი სადგურების პროექტების განხორციელება“.
10.ოქროს მომპოვებელი კომპანია EMPIRE METALS საქართველოდან გადის
ოქროს მომპოვებელი კომპანია Empire Metals-ი საქართველოდან გადის. კომპანია 2018 წლიდან, საქართველოში გაუარესებულ გარემოზე აცხადებს და Georgian Copper and Gold-ში 50%-იან წილს ყიდის. მყიდველი ამავე კომპანიაში მისი პარტნიორი „კავკასიის სამთო ჯგუფია“ ( CMG ), რომელიც ამ გარიგებით Georgian Copper and Gold-ში წილს 100%-მდე შეივსებს.
Top 10
