დღის Top 10 საინტერესო ამბავი:
1. მთიან ყარაბაღში ომი დასრულდა
დღეს დილიდან რუსეთმა მთიანი ყარაბაღის კონფლიქტის ზონაში სამშვიდობო კონტინგენტის განლაგება დაიწყო, სომხეთის შეიარაღებული ძალების გაყვანის პარალელურად. ამის შესახებ რუსული სააგენტოები თავდაცვის სამინისტროზე დაყრდნობით იუწყებიან.
2. „საქართველომ უნდა გამოიყენოს უნიკალური შესაძლებლობა გამოიმუშაოს წყალბადი და არსებული გაზსადენით ის ევროპას მიაწოდოს“ - გიორგი ქობულია
ენერგეტიკული სექტორის გამოწვევებსა და განვითარების პერსპექტივებზე „კომერსანტთან“ საქართველოს ეკონომიკის ყოფილმა მინისტრმა გიორგი ქობულიამ ისაუბრა.
„ენერგეტიკული სექტორი არის ჩვენი ერთ-ერთი დიდი უპირატესობა, რომელიც გაგვაჩნია, როგორც ქვეყანას’
3. ყარაბაღის ამ შეთანხმებით ჩვენი გეოპოლიტიკური ფუნქცია საგრძნობლად სუსტდება
ამით ჩვენი გეოპოლიტიკური მნიშვნელობა რეგიონში დაიკლებს და იქნება ეკონომიკური დანაკარგებიც - ამის შესახებ, ანალიტიკოსმა გია ხუხაშვილმა ,,ბიზნესპრესნიუსს“ განუცხადა.
მისი თქმით, თუ შეთანხმების შედეგად კონფლიქტი ნამდვილად ამოიწურა და სომხეთში შიდა დაძაბულობა ფართომასშტაბიან სახეს არ მიიღებს, პარალელურად, უნდა ველოდოთ სამხრეთ კავკასიის საინვესტიციო მომხიბვლელობის ზრდას.
4. საქართველოს მოქალაქეებს საფრანგეთში შესვლა აეკრძალათ
საფრანგეთის ხელისუფლებამ საფრანგეთის ტერიტორიაზე საქართველოდან მიმავალ მგზავრთა შესვლასთან დაკავშირებულ რეგულაციებში ცვლილებები შეიტანა. საქართველოს საგარეო საქმეთა სამინისტროს ინფორმაციით, შეზღუდვები დაწესდა საქართველოდან და ევროკავშირის შენგენის ზონის სხვა არაწევრი ქვეყნებიდან საფრანგეთის მეტროპოლიაში შესვლაზე.
5. „ავერსი ფარმას“ მოგება წინა წლებთან შედარებით 77%-ით შეუმცირდა
საქართველოს ფარმაცევტული ბაზრის ერთ-ერთმა უმსხვილესმა მოთამაშემ შპს „ავერსი ფარმას“ 2019 წლის კონსოლიდირებული ფინანსური ანგარიშგებები გამოაქვეყნა, რომლის მიხედვითაც კომპანიის საოპერაციო წლის მოგება 77%-ით შემცირდა.
6. ``ბიოლი`` ადგილობრივ მომხმარებელს ერგება, მაგრამ ქართველი მაინც ვერ ხვდება ამ ადგილის ფასს - თამაზ მჭედლიძე
სამედიცინო ველნეს კურორტი დაბა კოჯორში „ბიოლი“ , რომელიც თითქმის სრულად უცხოელ მომხმარებელზე იყო გათვლილი, პანდემიის შემდეგ, ქართველების დასვენების სტილზე მორგებას ცდილობს, თუმცა პრემიუმ ხარისხის სერვისებზე კურორტის ხელმძღვანელობამ ფასების განახევრება გადაწყვიტა. როგორ ერგება შიდა ტურიზმს პირველი სამედიცინო ველნესი საქართველოში, ამის შესახებ „კომერსანტს“ Bioli Medical Wellness Resort-ის დამფუძნებელი თამაზ მჭედლიძე ესაუბრა.
7. 15 საათი 5-ის ნაცვლად - რა აფერხებს საბორნე გადაზიდვებს ქართული პორტებიდან
მაღალი ტარიფები და საზღვაო ბორნების მოცდენის დიდი დრო საქართველოში და შავ ზღვაზე საბორნე გადაზიდვების განვითარებას მნიშვნელვნად აფერხებს. როგორც საქართველოს „სატრანსპორტო კვლევის ცენტრის“ ანგარიშშია აღნიშნული, საბორნე გადაზიდვების ეფექტიანობას განსაზღვრავს ნავსადგურის მოსაკრებლის ჯამური ოდენობა, რომელიც შავი ზღვის აუზის ქვეყნებში 5- ჯერ აღემატება ბალტიის ნავსადგურის ანალოგიურ ტარიფებს.
8. Glovo-მ საპროტესტო აქციის ტერიტორიაზე შეკვეთების მიტანა შეზღუდა
Glovo-მ საპროტესტო აქციის მონაწილეებისთვის რუსთაველის გამზირზე შეკვეთის მიტანა შეზღუდა. როგორც კომპანიის მიერ კურიერებისთვის გაგზავნილ წერილშია ნათქვამი, პარლამენტის ტერიტორია დროებით აღარ იქნება აქტიურ ზონაში
9. ბაიდენმა გაიმარჯვა - ევროპამ შვებით ამოისუნთქა
ევროპამ კოლექტიურად შვებით ამოისუნთქა - ბრიუსელის და ევროკავშირის დედაქალაქების თბილმა რეაქციამ დაადასტურა, რომ ევროპელებს ბაიდენის გამარჯვებაზე მეტად ტრამპის დამარცხება უხარიათ. თუმცა, ყველა თანხმდება, რომ ტრამპის პერიოდში ჩრდილოეთ ატლანტიკურ ურთიერთობებში იმდენი რამ შეიცვალა, რომ ძველი რეალობის აღდგენა საკმაოდ რთული იქნება.
10. ვაქცინის იმედი და ინვესტორების ოპტიმიზმი - pfizer-ის დადებითმა შედეგებმა, საბირჟო ინდექსების ზრდა გამოიწვია
ამერიკულ ბირჟებზე ინდექსების ზრდა დაიწყო და ეს დაკავშირებულია ფარმაცევტულ კონცერნ Pfizer-ის მიერ გავრცელებულ ინფორმაციასთან იმის შესახებ, რომ კომპანიის მიერ შექმნილი კორონავირუსის საწინაამღდეგო ვაქცინამ ცდების მე-3 სტადიაზე 90%-ანი ეფექტურობა აჩვენა.