დღის ტოპ 10 საინტერესო სიახლე

1. მშენებლობა განვადებით - დეველოპერული ბიზნესის ახალი შესაძლებლობა და გამოწვევები

„მშენებლობა განვადებით“ - ეს ერთი მთავარი საკითხია, რაზეც 17 თებერვალს,  მთავრობის ეკონომიკურ გუნდსა და სამშენებლო სფეროს წარმომადგენლების შეხვედრისას იმსჯელეს.  პრემიერ-მინისტრი ირაკლი ღარიბაშვილის ახალი ინიციატივის თანახმად, სამშენებლო ბიზნესს მთავრობა მისცემს გარანტირებულ დაკვეთას სხვადასხვა საჯარო ინფრასტრუქტურის აშენებისთვის, თანხას კი განვადებით, 5-6 წლის განმავლობაში გადაიხდის.

2. ციფრული ლარი ბრუნვაში წლის მეორე ნახევარში ჩაეშვება - შესაძლებლობა, ბანკებთან კონკურენცია და გამოწვევები

სებ-ის ინფორმაციით, მისი მანდატი ფასებისა და ფინანსური სტაბილურობის უზრუნველყოფაა, ხოლო ციფრული ტექნოლოგიების განვითარებამ ცენტრალური ბანკის ფულის განვითარებისა და ლარის ციფრული ვერსიის შექმნის აუცილებლობა გამოკვეთა, რათა ის უკეთ მოერგოს ციფრულ ეკონომიკას და ეკონომიკური პოლიტიკის ეფექტიანობა გაზარდოს. 

3. იანვარში ექსპორტი 47.6%-ით გაიზარდა

იანვარში ექსპორტი გასული წლის ანალოგიურ პერიოდთან შედარებით 47.6%-ით $331 მლნ-მდე გაიზარდა. პოზიტიური დინამიკა საექსპორტო პარტნიორი ქვეყნების პირველი ათეულიდან ათივეში და საექსპორტო პროდუქციის პირველი ათეულიდან ასევე ათივეში დაფიქსირდა. ამის შესახებ ინფორმაციას საქსტატი ავრცელებს.

4.„კომერსანტის“ ექსკლუზივი - შაორის განვითარება დაიწყო, პირველი ინვესტორი მინდია საბანაძეა

მრავალწლიანი უძრაობის შემდეგ შაორის განვითარება დაიწყო. „კომერსანტის“ ექსკლუზიური ინფორმაციით, კურორტს პირველი ინვესტორი ჰყავს. რეზორტის ტიპის სასტუმრო კომპლექსს ქვეყნის ერთ-ერთ მიმზიდველ ადგილზე მასშტაბური მულტიფუნქციური სავაჭრო ცენტრების მმართველი კომპანიის IG Development -ის დამფუძნებელი მინდია საბანაძე ააშენებს.

5. „რიყის დოქები“ აუქციონზე 10 მლნ ლარად გაიყიდება

„რიყის დოქების“ საწყისი ფასი აუქციონზე 10 მლნ ლარი იქნება — ამის შესახებ ეკონომიკისა და მდგრადი განვითარების მინისტრმა, ლევან დავითაშვილმა მთავრობის სხდომის დასრულების შემდეგ ბრიფინგზე განაცხადა.

6. დემპინგის რისკი – ვინ და როგორ დაიცავს სურსათის ბაზარს

კვების პროდუქტების ბაზარზე დემპინგი ერთ-ერთი მთავარი პრობლემაა, რაც ადგილობრივი წარმოებისთვის დიდი დაბრკოლებაა. ამ მხრივ პრობლემა კიდევ უფრო შეიძლება გამწვავდეს თურქეთში სასოფლო-სამეურნეო პროდუქტების წარმოებაზე დღგ-ს 8–დან 1%-მდე შემცირების გადაწყვეტილებამ.

7. 8 ეტაპად ჩატარებულ აუქციონზე 278 ობიექტი 236 მლნ ლარად გაიყიდა

8 ეტაპად ჩატარებული სახელმწიფო აუქციონის შედეგად, 2021 წელს 278 ობიექტი, რომელთა ჯამური საწყისი ღირებულება 159 მლნ ლარს შეადგენდა, 236 მლნ ლარად გაიყიდა. სიაში დიდი საერთაშორისო კომპანიები არ იძებნება, ყველაზე ძვირიანი ობიექტი ბათუმში ფიროსმანის ქუჩაზე მდებარე 7000 კვადრატულ მეტრი ფართობის არასასოფლო-სამეურნეო დანიშნულების მიწის ნაკვეთი აღმოჩნდა, რომელიც საწყის ფასზე 2.6-ჯერ მეტად 30 მლნ ლარად (2021 წლის კურსით $10 მლნ-ზე ნაკლებად) სს დე ჯგუფმა შეიძინა, მან იქ 48 თვის ვადაში 150 ნომრიანი სასტუმრო უნდა ააშენოს.

8.საწვავის იმპორტი გაორმაგდა

იანვარში იმპორტი გასული წლის ანალოგიურ პერიოდთან შედარებით 38.7%-ით $779 მლნ-მდე გაიზარდა. საიმპორტო პარტნიორებში პირველი ადგილი ტრადიციულად თურქეთმა დაიკავა, საიმპორტო პროდუქციაში მსუბუქმა ავტომობილებმა, მაგრამ ზრდის უფრო მაღალი - 97.7%-იანი ტემპი ნავთობ-პროდუქტების მიმართულებით დაფიქსირდა.

9. ლონდონის საფონდო ბირჟაზე ქართული კომპანიების კაპიტალიზაცია £113 მლნ-ით შემცირდა

ლონდონის საფონდო ბირჟაზე სამი ქართული კომპანიის კაპიტალიზაცია 1.869 მლრდ გირვანქა სტერლინგია — გასულ კვირასთან შედარებით 113 მლნ-ით ნაკლები. Galt and Taggart-ის მიმოხილვის მიხედვით, გასულ კვირასთან შედარებით, შემცირებულია ყველა ქართული კომპანიის აქციების ფასი.

10. რუსული ენერგოკომპანიებისა და ბანკების აქციების ღირებულება ორნიშნა პროცენტული მაჩვენებლით შემცირდა

რუსეთ-უკრაინის ახალი დიდი ომის მოლოდინში რუსული ენერგოკომპანიებისა და ბანკების აქციები ორნიშნა პროცენტული მაჩვენებლით მცირდება. ბოლო 5 დღეში გაზპრომის კაპიტალიზაცია 12%-ით შემცირდა, ინტერ რაოსი 13%-ით, როსნეფტის 18%-ით. აბსოლუტურ გამოხატულებაში ეს $28 მლრდ-იანი დანაკარგია.