„საქართველოს ახალგაზრდა იურისტთა ასოციაცია“ ავრცელებს ინფორმაციას იმის შესახებ, რომ თბილისის საქალაქო სასამართლოში მოიგო დავა, რომლითაც ითხოვდა ორი არასრულწლოვანისთვის ზიანის ანაზღაურებას. არასამთავრობო ორგანიზაცია აცხადებს, რომ სასამართლომ 2019 წლის 16 იანვარს თბილისში, დიდი დიღმის ერთ-ერთ კორპუსში გაზის გაჟონვით მომხდარ აფეთქებაში კომპანიის პასუხისმგებლობა დაინახა.
აფეთქებამ ოთხი ადამიანის სიცოცხლე შეიწირა. აფეთქება შენობაში გაზგამანაწილებელი კომპანიის თანამშრომლების წასვლიდან რამდენიმე საათში მოხდა. საიას თანახმად, მათ „არ შეასრულეს კანონმდებლობითა და სამსახურებრივი ინსტრუქციით მათთვის დაკისრებული ვალდებულება - სრულად შეემოწმებინათ როგორც მთლიანი სადარბაზო, ასევე, თითოეულ სართულზე არსებული ბინები, ლიფტის შახტა და სათავსო“.
„აღნიშნული განმარტება მნიშვნელოვანია იმდენად, რამდენადაც დადგინდა შპს „თბილისი-ენერჯის“, როგორც არა მხოლოდ კერძო დამსაქმებლის, არამედ როგორც სახელმწიფოს მიერ დელეგირებული უფლებამოსილების მქონე სუბიექტის - ლიცენზიანტი კომპანიის პასუხისმგებლობა, განახორციელოს მომხმარებლებისთვის ბუნებრივი აირის უსაფრთხო მიწოდება და სისტემატური შემოწმება“, - აღნიშნავენ ორგანიზაციაში.
საიას ინფორმაციით, სასამართლომ „თბილისი ენერჯის“ დაავალა:
„არასრულწლოვანი ბავშვებისთვის სარჩოს გადახდა დედის გარდაცვალებიდან სრულწლოვანების ასაკს მიღწევამდე“;
„ჯანმრთელობისთვის მიყენებული ზიანის ანაზღაურება 5 000 და 2 000 ლარის ოდენობით“;
„დედისა და ძმის გარდაცვალების გამო მიყენებული მორალური ზიანის ანაზღაურება თითოეული მოსარჩელისთვის 50 000 - 50 000 ლარის ოდენობით“.
რადიო თავისუფლება „თბილისი ენერჯიდან“ პასუხს ელოდება.
საგამოძიებო სამსახურმა 2019 წელს მომხდარი აფეთქების გამო გაზგამანაწილებელი კომპანიის ორი თანამშრომელი დააკავა. გამოძიების თანახმად, აფეთქებამდე რამდენიმე საათით ადრე სწორედ თორნიკე ტატიშვილი და ვაზელ მამადიანი მივიდნენ ავთანდილის ქუჩაზე მდებარე კორპუსში, სადაც ადგილობრივებს გაზის სუნი აწუხებდათ.
„თბილისის ენერჯის“ ვებგვერდზე გამოქვეყნებული ინფორმაციის მიხედვით, 2006 წლის მაისიდან თბილისში მოსახლეობას ბუნებრივი აირით კომპანია „ყაზტრანსგაზ-თბილისი“ ამარაგებდა, 2019 წლის 3 მაისიდან კი საქართველოს დედაქალაქს „თბილისი ენერჯი“ ემსახურება.
„საქართველოს ახალგაზრდა იურისტთა ასოციაცია“ 
