რუსეთის საგარეო საქმეთა მინისტრმა, სერგეი ლავროვმა დაადასტურა მედიით გავრცელებული ცნობები, რომ ინდონეზიის კუნძულ ბალიზე, „დიდი ოცეულის“ წევრი ქვეყნების საგარეო საქმეთა მინისტრების ოფიციალურ მიღებას და ვახშამს არ დაესწრნენ მინისტრები „დიდი შვიდეულის“ სახელმწიფოებიდან.
დღეს, 8 ივლისს, რუსულ სააგენტო „ტასს“ მოჰყავს ლავროვის სიტყვები, რომ „როგორც ჩანს, მათ ასე ესმით პროტოკოლი და უბრალოდ, ზრდილობა და ეთიკის წესები“.
მანამდე, იაპონურმა სააგენტო „კიოდო“-მ გაავრცელა ინფორმაცია, რომ მასპინძელი ქვეყნის, ინდონეზიის მიერ 7 ივლისს ორგანიზებულ ოფიციალურ მიღებას, ლავროვის გამო არ დაესწრნენ „დიდი შვიდეულის“ წევრი სახელმწიფოების: იაპონიის, აშშ-ის, დიდი ბრიტანეთის, გერმანიის, საფრანგეთის, იტალიის და კანადის საგარეო საქმეთა მინისტრები.
სააგენტოს ცნობითვე, „დიდი ოცეულის“ მინისტრების შეხვედრაზე, რომელიც 7 ივლისს გაიხსნა, გაუქმდა ერთობლივი ფოტოს გადაღების ტრადიციული ცერემონიაც, რადგან ზოგიერთმა მონაწილემ არ ისურვა ლავროვთან ერთად ფოტოს გადაღება. ამ ყველაფრის მიზეზია რუსეთის ომი უკრაინის წინააღმდეგ.
დიდ ოცეულში, რუსეთის და დიდი შვიდეულის წევრი სახელმწიფოების გარდა, არიან: არგენტინა, ბრაზილია, მექსიკა, ინდოეთი, ინდონეზია, ჩინეთი, სამხრეთი კორეა, თურქეთი, სამხრეთ აფრიკის რესპუბლიკა, საუდის არაბეთი, ავსტრალია და ევროკავშირი.
დიდი შვიდეული
