2022 წელს, გაერთიანებული სამეფოს ავტომობილების წარმოება 9,8%-ით 775,014 ერთეულამდე შემცირდა. ამასთან, 2019 წლის პანდემიამდელ პერიოდთან შედარებით კლება 40.5%-ია. მონაცემებს საავტომობილო მწარმოებელთა და მოვაჭრეთა საზოგადოება (SMMT) ავრცელებს.
ექსპერტები ამის მიზეზად ნახევარგამტარული კომპონენტების გლობალურ დეფიციტსა და მიწოდების ჯაჭვის პრობლემებს ასახელებენ, რაც ჩინეთის ჩაკეტვამ და ორი ბრიტანული ავტოსაწარმოს შეჩერებამ გამოიწვია.
2022 წლის დეკემბერში ბრიტანეთმა 51168 ავტომობილი აწარმოვა, რაც 17,9%-ით ნაკლებია წინა წელთან შედარებით.
ელექტრომობილებისა და ჰიბრიდების წარმოება 2022 წელს 4,5%-ით გაიზარდა და რეკორდულ 234 066 ავტომობილს მიაღწია.
ელექტრომანქანები სულ უფრო მნიშვნელოვან როლს ასრულებს დიდი ბრიტანეთის ეკონომიკაში, აღნიშნავს SMMT. მათი ექსპორტი 2017 წლიდან 7-ჯერ გაიზარდა და გასულ წელს 10 მილიარდ ფუნტს გადააჭარბა. მანქანების მთლიან ექსპორტში წილი 4.1%-დან 44.7%-მდე გაიზარდა.
2022 წელს შიდა ბაზრისთვის 168 176 ავტომობილი (ზრდა 9,4%) დამზადდა, საექსპორტოდ - 606 838 (კლება 14%-ია). ამრიგად, დიდ ბრიტანეთში წარმოებული ათი ავტომობილიდან რვა ექსპორტზე გავიდა. ძირითადი მიმართულებები ევროკავშირის ქვეყნებია, სადაც მანქანების 57,6%-ია მიწოდებული, ასევე აშშ (13,3%) და ჩინეთი (8,7%). ევროკავშირში მიწოდება გასულ წელს 10%-ით შემცირდა, შტატებში - 31,6%-ით, ჩინეთში - 8,3%-ით. იაპონიაში ექსპორტი 5,7%-ით გაიზარდა, სამხრეთ კორეაში - 32,8%-ით, ავსტრალიაში - 4,7%-ით, სამხრეთ აფრიკაში - 23%-ით. მოხსენებაში ნათქვამია, რომ რუსეთში მიწოდება 78,3%-ით დაეცა, მაშინ როცა 2021 წელს ქვეყანა საექსპორტო ბაზრების ათეულში იყო.
Nissan-მა ბრიტანეთში წარმოება გასული წლის განმავლობაში 16,5%-ით - 238 330 მანქანამდე გაზარდა, Bentley - 8,6%-ით - 15,640 მანქანამდე. Jaguar Land Rover-ის წარმოება 8,1%-ით შემცირდა და 202,790 მანქანა შეადგინა, Mini-მ 0.3%-ით შეამცირა - 2206 მანქანამდე, Toyota-მ -19,2%-ით - 105,590 მანქანამდე, Vauxhall-მა (Citroen და Peugeot-ის ჩათვლით) - 70,3%-ით - 9,51 ათას მანქანამდე.
Honda-მ ქვეყანაში ავტომობილების წარმოება სვინდონში ქარხნის დახურვის შემდეგ შეწყვიტა, სადაც 2021 წელს თითქმის 54,5 ათასი მანქანა იწარმოებოდა.