დიდი ბრიტანეთის მთავრობამ ვიზები არ მისცა რუსეთის დელეგაციის წევრებს, რომლებსაც მონაწილეობა უნდა მიეღოთ ეუთოს საპარლამენტო ასამბლეის ყოველწლიურ სესიაში. ამის შესახებ, როგორც რუსეთის სახელმწიფო საინფორმაციო სააგენტოები წერენ, დღეს, 22 ივნისს განაცხადა რუსეთის ფედერაციის საბჭოს საერთაშორისო საქმეთა კომიტეტის თავმჯდომარის მოადგილემ, ვლადიმირ ჯაბაროვმა.
ეუთოს საპარლამენტო ასამბლეის სესია 2-6 ივლისს გაიმართება დიდი ბრიტანეთის ქალაქ ბირმინგემში.
უკრაინაზე რუსეთის თავდასხმის გამო, დიდი ბრიტანეთის მიერ დაწესებული პერსონალური სანქციების სიაშია ფედერაციის საბჭოს ყველა წევრი. ჯაბაროვის განცხადებით, სანქციების გათვალისწინებით, ლონდონს მიმართეს, რომ რუსეთის დელეგაციისთვის მიეცა „უმნიშვნელოვანეს საპარლამენტო ღონისძიებაში“ მონაწილეობის შესაძლებლობა, თუმცა, მიიღეს „აღმაშფოთებელი პასუხი“, რომ რუსეთის დელეგაციის წევრებს ვერცერთი მიზნით ვიზებს ვერ მისცემენ.
სენატორმა ჯაბაროვმა დიდი ბრიტანეთის მთავრობა დაადანაშაულა ამ „დისკრიმინაციული მოქმედებით“ ეუთოს საპარლამენტო ასამბლეის დეკლარაციის დარღვევაში. ჯაბაროვის თქმით, დეკლარაციით სავალდებულოა ეუთოს წევრი ქვეყნების წარმომადგენლების შეუფერხებელი მონაწილეობა ორგანიზაციის ნებისმიერ, ოფიციალურ ღონისძიებაში. სენატორმა ჯაბაროვმა დღეს ისიც თქვა, რომ ეუთოს საპარლამენტო ასამბლეის სესიაზე შესაძლოა, დადგეს ასამბლეიდან რუსეთის დელეგაციის გარიცხვის საკითხი.