ბელარუს-პოლონეთის საზღვარზე მიგრაციული კრიზისის შესახებ, როგორც ჩანს, ყველას ნელა-ნელა ავიწყდება, თუმცა, კრიზისი ჯერ დასრულებისგან შორსაა - მიგრანტები პოლონეთში შეღწევას კვლავ ცდილობენ, მეზობელ ქვეყნებშიც სიმშვიდემდე ძალიან შორსაა.
ორი კვირის წინ, როდესაც ათობით ათასი აზიელი მიგრანტი პოლონეთის საზღვრის გარღვევას ცდილობდა, ვითარება დაიძაბა - საქმე არალეგალებს და პოლონელ მესაზღვრეებს შორის შეტაკებამდეც მივიდა.
ვარშავა და ევროკავშირი მინსკელ დიქტატორს ალექსანდრ ლუკაშენკოს მიგრანტების პოლიტიკურ იარაღად გამოყენებაში ადანაშაულებს. პოლონეთის გარდა, კრიზისი ლიეტუვას და ლატვიასაც შეეხო.
ბოლო დღეებში მდგომარეობა თითქოს დამშვიდდა - მიგრანტების არაბული ქვეყნებიდან მინსკიდან სამშობლოში ეტაპობრივად გადაგზავნის პროცესი უკვე დაიყო, ასევე პირდაპირი რეისები დამასკოდან და ბაღდადიდან გაუქმდა, სტამბოლის მიმართულებით ძველ ნიშნულამდე შემცირდა...
მანამდე კი გერმანიის კანცლერმა ანგელა მერკელმა ლუკაშენკოს და პუტინს დაურეკა და საზღვარზე შექმნილი მდგომარეობა განიხილა. ეს ყველაფერი ვითარების დეესკალაციის შთაბეჭდილებას ქმნის და ევროპის საზოგადოებრიობას ეს პრობლემა წინა დღეებთან შედარებით ბევრად ნაკლებად ახსოვს.
თუმცა, რეალურად კონფლიქტი არსად არ გამქრალა - მიგრანტები მინსკში სხვა ქალაქებიდან - თბილისიდან, ბაქოდან, შარმ-ელ შეიხიდან, ხურგადიდან და დუბაიდან ჩადიან.
ოფიციალური მონაცემებით, ბელარუსულ მხარეზე ლოგისტიკურ ცენტრში ამ დროისთვის 2000-ზე მეტი მიგრანტი იმყოფება. მათ ტაქტიკა შეიცვალეს - ისინი საზღვარს ძალით უკვე არ უტევენ, და მცირე, შეუმჩნეველი ჯგუფებით ევროპაში გადასვლას ხმაურის გარეშე ცდილობენ.
მხოლოდ 25 ნოემბერს პოლონელმა მესაზღვრეებმა საზღვრის უკანონო გადაკვეთის 267 მცდელობა აღკვეთეს და ეს მხოლოდ 1 დღეში.
პოლონელი მესაზღვრეების ინფორმაციით, ბელარუსი სამხედროები, რომლებიც მიგრანტების საზღვრის მიმართულებით ერეკებიან, სულ უფრო აგრესიულები ხდებიან - ისინი ჰაერში ისვრიან, მიგრანტების ღამის ხედვის მოწყობილობებით ამარაგებენ, პოლონელ მესაზღვრეებს ლაზერებით ან სტრობოსკოპებით აბრმავებენ.
თავად მიგრანტები ძალიან მძიმე მდგომარეობაში რჩებიან - მხოლოდ მცირე ნაწილი ახერხებს საზღვრის გადაკვეთას და პოლონეთში გადასვლას, უმრავლესობა რამდენიმე კვირას პოლონეთის ტყეებში ატარებს.
ოფიციალური ბერლინის ცნობით, გერმანიამდე 10 000-ზე მეტმა არალეგალმა ჩააღწია, როგორც მინიმუმ 13 ადამიანი დაიღუპა. დამკვირვებლები შიშობენ, რომ უახლოეს კვირებში დაღუპულთა რაოდენობა გაიზრდება - ბელარუსთან მოსაზღვრე რეგიონები პოლონეთში ყველაზე ცივია - დეკემბერში იქ ტემპერატურა მინუს 20 გრადუსამდე ჩამოდის.
24 ნოემბერს პირველი თოვლიც მოვიდა, ასე რომ კრიზისის არანაირ ამოწურვაზე და ვითარების რეალურ შეცვლაზე საუბარი არ მიდის.
ბალტიის ქვეყნებში ვიზიტის დროს პოლონეთის პრემიერ-მინისტრმა მატეუშ მორავეცკიმ განაცხადა, რომ მიგრაციული კრიზისი არის უფრო მასშტაბური პოლიტიკური კრიზისის ნაწილი, რომელიც მეზობელ უკრაინასაც შეეხება.
„სხვადასხვა წყაროებიდან ჩვენ ვიცით, რომ უკრაინის ირგვლივ კარგად შეიარაღებული რუსული ძალები გროვდებიან“, - განაცხადა მორავეცკიმ.
ვარშავა მიიჩნევს, რომ ბელარუსული კრიზისი მოგვარებისგან შორსაა და ხანგრძლივი დაპირისპირებისთვის ემზადება - საზღვარი დახურულია პრესისთვის, მთელს პერიმეტრზე გაძლიერებულია კონტროლი, მობილიზებული საჯარისო ნაწილები არსად არ წასულან.