სადისტრიბუციო კომპანიები ხელისუფლებას უპარკინგობით გამოწვეული ჯარიმების გამოწერაზე მორატორიუმის დაწესებას სთხოვენ. ამ მიზნით, მომავალ კვირაში, ქვეყნის ვიცე-პრემიერთან შეხვედრა გაიმართება, სადაც საქართველოს დისტრიბუტორთა ბიზნეს ასოციაცია ლევან დავითაშვილს და საპატრულო პოლიციის ხელმძღვანელობას დისტრიბუტორთა პრობლემებზე დეტალურად მიაწვდის ინფორმაციას, რადგანაც ჯარიმების გაზრდის შემდეგ, მათ საკმაოდ მძიმე ფინანსური ტვირთი დააწვათ და ამა თუ იმ მაღაზიისთვის პროდუქციის მიწოდება პარკინგის არარსებობის შემთხვევაში, ჯარიმების სახით, საკმაოდ ძვირი უჯდებათ.

როგორც საქართველოს დისტრიბუტორთა ბიზნეს ასოციაციის პრეზიდენტმა ივა ჭყონიამ გადაცემაში „ბიზნესი რუსთავი 2-ზე“ ისაუბრა, ასოციაციამ ოფიციალური წერილებით შესაბამის უწყებებს უკვე მიმართა და იმედი აქვს, რომ დადებითი გადაწყვეტილების მიღწევა პრობლემა არ იქნება, მით უმეტეს, რომ სადისტრიბუციო კომპანიები ამის გამო კადრებს კარგავენ და მალე მაღაზიაში პროდუქციის შეტანა შესაძლოა, ცალკე, პრობლემად იქცეს.

„არ არსებობს ჩვენთვის ადგილი, არ არსებობს ფიქსირებული ტარიფი, რომ გადაიხადონ და სადისტრიბუციო მანქანებს ქონდეს პარკინგის საშუალება. ჩვენ საუბარი პრობლემებზე 5 წლის უკან დავიწყეთ, როდესაც ქულების დაკლება იყო და მაშინ აქტიურად ვიმუშავეთ საპატრულო პოლიციასთან და რომ ეს ჩვენს ქულათა სისტემაზე არ ასახულიყო, რადგანაც უკვე თანამშრომლების გარეშე დავრჩებოდით. რაც სახელმწიფომ გაითვალისწინა.

ბოლო პერიოდში თანამშრომელთა გადინების ერთ-ერთ მიზეზად იქცა პარკირების ჯარიმები. ჩვენ წერილი გავუგზავნეთ საქართველოს ვიცე-პრემიერს ლევან დავითაშვილს, საპატრულო პოლიციის ხელმძღვანელობას და ქალაქ თბილისის მერს და საკრებულოს თავმჯდომარეს. დაახლოებით 10 დღის წინ ჩვენ შეხვედრა გვქონდა გიორგი ტყემალაძესთან, ავუხსენით სიტუაცია და მივიღეთ დაპირება, რომ აქტიურად ჩაერთვებიან. უკვე დაიწყო მუშაობა, რათა მივაწოდოთ ინფორმაცია, ჩვენთვის კრიტიკული ადგილები სად არის, შევაჯეროთ და შემდეგ საპარკინგე ადგილები გამოიყოს. ჩვენ წევრ კომპანიებთან, რითეილ ასოციაციასთან ინტენსიურად ვმუშაობთ და ვიღებთ ინფორმაციას, ვამუშავებთ და უახლოეს დღეებში გადავუგზავნით. მაგრამ ეს არის გრძელვადიანი პერსპექტივა და ამას მინიმუმ 1 წელი დასჭირდება, რომ ადგილები გამოიყოს. მომავალში, როდესაც ქუჩების რეაბილიტაცია დაიწყება მივიღეთ დაპირება, რომ ჩართული ვიქნებით აქტიურად, რათა იქ სადაც მაღაზია გაიხსნება იყოს საპარკინგე ადგილი. წინააღმდეგ შემთხვევაში არასწორია ჯარიმის გამოწერა. თუ არ არსებობს საპარკინგე ადგილი მაშინ ჯარიმა არ უნდა გამოიწეროს“, - აცხადებს ივა ჭყონია.

მისი თქმით, გრძელვადიანი გეგმის პარალელურად მუშავდება მოკლევადიანი გეგმა, რაც ამ დროისთვის ხელისუფლებასთან შეთანხმების საგანს წარმოადგენს. ივა ჭყონია მიიჩნევს, რომ სადისტრიბუციო მანქანებისთვის ჯარიმების გამოწერაზე, მოკლევადიან პერიოდში გარკვეული მორატორიუმი უნდა გამოცხადდეს.

„რომ ჯარიმები, ვიდრე მდგომარეობა არ გამოსწორდება, არ დაიწეროს. წინააღმდეგ შემთხვევაში მაღაზიების მომარაგებას ფიზიკურად ვეღარ შევძლებთ. ერთი პრობლემა ისაა, რომ კადრების გადინება იქნება ძალიან მაღალი და მეორე, კომპანიები მაღაზიებამდე ფიზიკურად პროდუქტის მიტანას ვერ შეძლებენ.

ევროპაში არის ასეთი პრაქტიკა, ვიდრე გაიხსნება სავაჭრო წერტილი, ხდება მუნიციპალიტეტთან შეთანხმება და მათი ნებართვის შემდეგ ხდება სავაჭრო ობიექტის გახსნა. ამისთვის შემდგომ ცალკე საპარკინგე ადგილია გამოყოფილი და კომპლექსურად მიდის მუშაობა. კარგი იქნება თუ ჩვენს ქვეყანაშიც გარკვეულწილად ნაბიჯებს გადავდგამთ.

ჩვენ ჯარიმებს კი არ ვაპროტესტებთ, კი ბატონო ჯარიმა იყოს, მაგრამ სანამ ჯარიმას დაწერ უნდა არსებობდეს რაღაც რაც გამორიცხავს იმას, რომ დისტრიბუტორები ტყუილად არ დაჯარიმდნენ. დღეს დისტრიბუტორები აბსოლუტურად ტყუილად იღებენ ჯარიმებს“, - აღნიშნა ივა ჭყონიამ.

დისტრიბუტორთა ბიზნეს ასოციაციის პრეზიდენტი ამბობს, რომ როდესაც ჯარიმა შეადგენდა 10 ლარს ეს თანხა ასე თუ ისე „ასატანი“ იყო, თუმცა დღეს ჯარიმების ოდენობა გახუთმაგებულია.

„თუ თვის განმავლობაში გამოიწერებოდა 5 ან 10 ჯარიმა ანუ თანხა 100 ლარის ფარგლებში იყო და ახლა წარმოიდგინეთ როდესაც შენი ხელფასი არის 1500 ლარი და გიწევს 500 ლარის ჯარიმებში გადახდა ძალიან რთულია. მიუხედავად იმისა, რომ კომპანიებიც რიგ შემთხვევაში თავის თავზე იღებენ და თანამშრომლებს ეხმარებიან, მაინც წარმოუდგენელია. როდესაც კომპანიას ჰყავს ავტოპარკში 100 და 150 მანქანამდე წარმოიდგინეთ რამდენად სერიოზულ პრობლემაზე გვაქვს საქმე“, - აღნიშნა ივა ჭყონიამ.