„საყოველთაო ჯანდაცვის პროგრამაზე გადასვლისთანავე, ანუ 2013 წლიდან, იყო დაფიქსირებული კონკრეტული ტარიფები, რომლითაც წლების განმავლობაში ოპერირებენ კლინიკები“,- ამის შესახებ ჯანდაცვის ასოციაციის აღმასრულებელი საბჭოს თავმჯდომარემ მაია მახარაშვილმა რადიო პალიტრისა“ და „პალიტრანიუსის“ გადაცემაში „საქმე“ განაცხადა.
მისი თქმით, ვითარება კიდევ უფრო დაამძიმა 2019 წელს მიღებულმა 520-ე დადგენილებამ, რომელმაც არსებული ტარიფები ფაქტობრივად, გაანახევრა. შესაბამისად, კლინიკებს გადაუდებელი მომსახურების თანხის დაფარვა, სხვა გეგმიური მულტიპროფილური მომსახურების თანხით სუბსიდირების ხარჯზე უწევთ.
სწორედ ამიტომ, როგორც მაია მახარაშვილმა აღნიშნა, აუცილებელია, საყოველთაო ჯანდაცვის ტარიფების ინდექსაცია და ახალი ტარიფების დადგენა.
„საყოველთაო ჯანდაცვის პროგრამაზე გადასვლისთანავე, ანუ 2013 წლიდან, იყო დაფიქსირებული კონკრეტული ტარიფები, რომლითაც წლების განმავლობაში ოპერირებენ კლინიკები. დადგენილი წესი იყო, რომ ამ ტარიფების ცვლილება კლინიკებს არ შეეძლო, თუმცა, ამ 10 წლის განმავლობაში იხსნებოდა ახალი კლინიკებიც, რომლებსაც შეეძლოთ თავიანთი ფასი წარედგინათ სახელმწიფო პორტალზე. ისინი ხვდებოდნენ ამ რეგულირების არეალში, თუმცა, აქ დაყოფილია გადაუდებელი მიმართულებები, რომლებიც არის ფიქსირებული სახელმწიფოს მიერ და არის მიმართულებები, რომელზეც სახელმწიფო განაცხადია, რომ მე ამ მომსახურებაში ვიხდი კონკრეტულ თანხას, თუმცა კლინიკას აქვს საშუალება თვისი ფასი ჰქონდეს და ის სხვაობა არის სწორედ ის, რისი გადახდაც პაციენტს უწევს საკუთარი ჯიბიდან.
კიდევ უფრო მწვავე და კრიტიკულია ის გადაუდებელი მომსახურება, როგორიც არის რეანიმაცია, ინტენსიური მოვლა, კარდიო ქირურგი და ა.შ. ბევრჯერ გვიხსენებია 520-ე დადგენილება, რომელმაც კიდევ უფრო დაამძიმა სიტუაცია. იმიტომ, რომ 2013 წელს დადგენილი ტარიფი შეამცირა. ამასთან, შეამცირა კრიტიკულ მიმართულებებში, მაგალითად, რეანიმაციულ პაციენტს, რომელსაც სრულად სახელმწიფო ფარავს, და რა თქმა უნდა, ეს ერთის მხრივ ძალიან კარგია, რადგან კატასტროფული რისკებისგან იცავს პაციენტს, მაგრამ მეორეს მხრივ, სტაციონარისთვის და კლინიკისთვის არის ძალიან მძიმე ტვირთი, იქიდან გამომდინარე, რომ ის ტარიფი, რომელიც 2013 წელს იყო დადგენილი, ფაქტობრივად, განახევრდა და განახევრებული ტარიფით უნდა შეძლოს კლინიკამ ოპერირება.
ეს როგორ ხდება, წარმოდგენა რომ შეგექმნათ - იმისთვის, რომ ხარისხი არ გაუარესდეს, ამ კონკრეტული სერვისების დაფარვა ხდება ფაქტობრივად, სუბსიდირების ხარჯზე, სხვა მომსახურების. მულტიპროფილურ კლინიკაში არსებობს გეგმიური მომსახურება, რაც გაცილებით უფრო მარტივია, რადგან პაციენტი გეგმავს მისაღებ მომსახურებას და თანაგადახდის კუთხით, უფრო მობილიზებულია. შესაბამისად, იქ სადაც რჩება რაღაც შემოსავალის მიღების შესაძლებლობა, ფარავს ასეთი კრიტიკული მიმართულების სერვისებს.
ამ საკითხის დროში გაწელვის მიზეზი, რა თქმა უნდა, იყო პანდემია. ჩვენ და თვითონ სექტორიც გადაერთო პანდემიასთან ბრძოლაზე. შესაბამისად, პრიორიტეტი გადავწიეთ შეგნებულად. იმდენად მწვავე სიტუაცია იყო, რომ ამისთვის არავის აღარ ეცალა. თუმცა, როგორც კი ვითარება დამშვიდდა და ამასობაში ასოციაციაც დაფუძნდა (გაერთიანდა საკმაოდ დიდი რაოდენობა სამედიცინო დაწესებულების) და ჩვენი პრიორიტეტი გახდა სწორედ ის, რომ გვესაუბრა ტარიფების ინდექსაციაზე და არა სრულად გადახედავაზე. ინდექსაციაზე იმიტომ, რომ დაანონსდა დაფინანსების ახალი მოდელი. აქაც ჩვენ კონსტრუქციულად მივუდექით საკითხს და ვთქვით, რომ რადგან ახალ მოდელზე გადავდივართ, უკეთესი გამოსავალი იქნება 520-ე დადგენილებით გათვალისწინებული ტარიფის ინდექსაცია.
საკმაოდ ბევრი სამუშაო შეხვედრა გვქონდა სამინისტროსთან. პოზიტიურია ის, რომ ორივე მხარე ვთანხმდებით, მართლაც, 2013 წლის ტარიფით და შემდეგში უკვე 2019 წლის 520-ე დადგენილებით არსებული ტარიფით ოპერირება, უბრალოდ, შეუძლებელია. პირდაპირ ხარჯსაც ვერ ფარავს აღნიშული ტარიფი. ამავე დროს, ველოდებით ახალი დაფინანსების სისტემასაც, რომელიც ჩვენი შეფასებით, გაცილებით პოზიტიური უნდა იყოს“,- განაცხადა მაია მახარაშვილმა.
ჯანდაცვა 
