„ჯანდაცვის ასოციაცია“ მზადაა ჯანდაცვის მინისტრს შეხვდეს და „მყარი არგუმენტები“ მიაწოდოს, თუმცა ჯანდაცვის სამინისტრო ასოციაციას ისევ არ ხვდება.
ასოციაციის ხელმძღვანელი ამბობს, რომ „მყარი არგუმენტებია“ ის სტატისტიკური მაჩვენებლები, რომლის ამოღებაც სამინისტროს სტატისტიკის ეროვნული სამსახურის მონაცემებიდან შეუძლია.
ნინო კიკნაძის განმარტებით, ასოციაციამ საკუთარი „მყარი არგუმენტები“ წერილობით უკვე წარმოადგინა, თუმცა მეტი დეტალისთვის ჯანდაცვის მინისტრთან შეხვედრაა საჭირო, რომელიც თავის მხრივ ასოციაციას არ ხვდება.
გუშინ ჯანდაცვის მინისტრმა განაცხადა, რომ „ტარიფები შესაძლოა გადასახედი იყოს, მაგრამ ამისთვის საჭიროა მყარი არგუმენტაცია, რადგან ხდება ბიუჯეტის თანხების ხარჯვა“.
შეგახსენებთ, რომ „ჯანდაცვის ასოციაცია“ საყოველთაო ჯანდაცვის პროგრამაში ჩართული კერძო კლინიკებისთვის 2013 წელს დადგენილი ტარიფების გაზრდას ითხოვს.
როგორც მინისტრი ამბობს, დარწმუნებულები უნდა ვიყოთ, რომ ის თანხები, რომლებიც ამა თუ იმ სერვისზე იხარჯება, არის ადეკვატური და სამართლიანი და ეს ტარიფი არის იმდენი, რომ ამ ტარიფის მიხედვით ესა თუ ის კლინიკა ორიენტირებული იყოს პაციენტის მომსახურების ხარისხზე.
ზურაბ აზარაშვილის განცხადებით, ის სტანდარტები, რის დაკმაყოფილებასაც სახელმწიფო ითხოვს კლინიკებისგან, ელემენტარულია – ესაა სტანდარტები ინფექციების კონტროლის კუთხით. სხვა დანარჩენი კი, რაც შეიძლება დაკავშირებული იყოს ძვირადღირებული მედიკამენტებით მკურნალობასთან ან „განსაკუთრებული ჰონორარის მქონე ექიმების მიერ ოპერაციების ჩატარებასთან“, ეს სხვა ეტაპია. ახლა კი, მინისტრის თქმით, მოწმდება ელემენტარული სტანდარტი, რაც აუცილებელია, რომ ქვეყანაში არსებობდეს და მკაცრად კონტროლდებოდეს ეს მიმართულება. მისივე განმარტებით, სწორედ ამ პროცესს მიყვება ტარიფების სამართლიანი დაანგარიშება.