ჯანდაცვის სფეროს სპეციალისტები აცხადებენ, რომ ფარმაცევტულ საცალო ბაზარზე თურქული მედიკამენტების ფასი რეალურად არ შეცვლილა. ამ თვალსაზრისით პრემიერ-მინისტრ ირაკლი ღარიბაშვილის განცხადებას, რომ უმეტეს შემთხვევაში, ფასები მედიკამენტებზე შემცირებულია 60-80 პროცენტით, ჯანდაცვის ეკონომისტი კახა ჯაყელი უსაფუძვლოდ მიიჩნევს.

მისი თქმით, შესაძლოა,  საბითუმო ბაზარზე ცვლილება რაღაც დონეზე იყოს, თუმცა ამას საცალო გაყიდვებზე არსებითი გავლენა ჯერჯერობოთ არ მოუხდენია და სექტორს კმაყოფილი მომხმარებელი არ ჰყავს.

,,წამლების გაიაფებაზე საუბარი ჯერ ძალიან ძნელია. მომხმარებლები ისევ განიცდიან მაღალ ფასებს და მათი ხარჯი ამ მიმართულებით ფაქტობრივად უცვლელია. ასეთ ფონზე მიჭირს თქმა, რას ემყარება პრემიერის ასეთი ოპტიმისტური განცხადება, რასაც არ აქვს საფუძველი, ჩვენ ვერ ვხედავთ და ვერც დავადასტურებთ, რომ წამლები გაიაფდა და ამით ვინმე კმაყოფილია. რეალურად ეს არ ჩანს საცალო ფასების დონეზე. რეალურად რასაც ვაკვირდებით,  სერიოზულ გაიაფებას ვერ ვხედავთ, თუნდაც ლარის გაუფასურების ფაქტორიდან გამომდინარე. ბოლო პერიოდში ლარის მსყიდველუნარიანობა უფრო დაეცა. შესაბამისად, ფასებთან დაკავშირებით არაფერი არ იცვლება“, - აცხადებს ,,კომერსანტთან“ კახა ჯაყელი და დასძენს, რომ რეალურად რთულია წამლის გაიაფების ტენდენცია დაიწყოს, როცა ბაზარზე მაღალი მონოპოლიაა და ამ პრობლემის მოგვარებას არავინ ცდილობს.

,,წამლები ხუთ მთავარ კატეგორიად იყოფა. ყველა მათგანი დღესდღეობით ძალიან ძვირად იყიდება. ფასებთან დაკავშირებით ძირეული ცვლილება არ არის და ვერ დავადგინეთ, რის საფუძველზე აცხადებენ, რომ მედიკამენტები გაიაფდა. მით უმეტეს, ბაზარი მონოპოლიურია  და სანამ ეს საკითხი არ მოგვარდება, წამლის ფასის პრობლემა მუდმივად იქნება საქართველოში. სხვა  შემთხვევაში, გაიაფება რომ იყოს, მომხმარებელი ამას იგრძნობდა, რეალურად ვერავინ დაგიდასტურებთ, რომ  მოსახლეობას მოაკლდა გადასახდელი წამლის გაიაფების გამო. თუკი ვინმე ამბობს, რომ  გარკვეული მედიკამენტები უფრო იაფად შემოიტანეს, ჯერ ციკლი უნდა დასრულდეს და საცალო ქსელში გაიყიდოს, ვერ ვგრძნობთ, რომ ეს ტენდენცია დაწყებულია“, - აცხადებს ჯაყელი.

შეგახსენებთ, რომ საქართველოს პრემიერ-მინისტრმა ირაკლი ღარიბაშვილმა მთავრობის ორშაბათის სხდომაზე წამლების გაიაფების შესახებ განაცხადა.

მისივე თქმით, უმეტეს შემთხვევაში, ფასები მედიკამენტებზე შემცირებულია 60-დან 80 პროცენტით და როგორც მინიმუმ, ფასები განახევრებულია.

მარი ჩიტაია