ჯანდაცვის მინისტრის მოადგილის, ილია ღუდუშაურის განცხადებით, სამედიცინო დაწესებულებების დაფინანსების ახალი მექანიზმის (DRG) შესახებ კლინიკების 80-90 % პაციენტებს არასწორ ინფორმაციებს აწვდიდა.
როგორც მინისტრის მოადგილემ „ინტერპრესნიუსს“ განუცხადა, არასწორი და არასრულყოფილი ინფორმაციის გამო, მოქალაქეები ჯანდაცვის სამინისტროს საყოველთაო დაზღვევის პროგრამიდან გათიშვის მოთხოვნით მიმართავდნენ, რადგან მიიჩნევდნენ, რომ პროგრამაში დარჩენით საჭირო სერვისის მიღებას ვერ შეძლებდნენ.
ილია ღუდუშაურის განმარტებით, შექმნილ ვითარებაზე ჯანდაცვის სამინისტრომ რეაგირება მოახდინა, კერძოდ კი, პაციენტსა და კლინიკას შორის ურთიერთობაში ჩაერთო და ამ დროისთვის პაციენტების არასწორად ინფორმირების პრობლემა შედარებით მოგვარებულია.
„როგორც იცით, DRG-ის პრინციპი გულისხმობს მეთოდს, როდესაც პაციენტის მკურნალობის დაფინანსება მიმდინარეობს დიაგნოზიდან გამომდინარე. მნიშვნელობა აღარ აქვს, რა ჩარევა სჭირდება პაციენტს გამოსაჯანმრთელებლად. სახელმწიფო საყოველთაო პროგრამაში ჩართულ კლინიკაში, ნებისმიერი დიაგნოზით მისული პაციენტის ერთი და იგივე ტარიფით მკურნალობას ანაზღაურებს. განსხვავებაა მხოლოდ თანაგადახდის პრინციპებზე, კერძოდ, როგორც არის დაშვებული საყოველთაო პროგრამით მხოლოდ იმის გადახდა უწევს და არა სხვა დამატებით სერვისების.
რაც შეეხება უშუალოდ პროცესს, ყოველდღე ვაკვირდებით სტატისტიკას და DRG-ის პრინციპის მიმდინარეობს. ფაქტობრივად, შეგვიძლია ვთქვათ, რომ კლინიკებმა დაიწყეს ახალი სისტემით სარგებლობა და დარღვევებს ადგილი არ აქვს.
ერთადერთი საკითხი, რაც ხაზგასასმელია, არის ის, რომ პირველ დღეებში, 50-დან 100 შემთხვევა ფიქსირდებოდა, როდესაც პაციენტები მომართავდნენ ჯანდაცვის სამინისტროს საყოველთაო პროგრამიდან გათიშვასთან დაკავშირებით. ძირითადი მიზეზი იყო კლინიკაში მიწოდებული ინფორმაცია, რომ საყოველთაო დაფინანსებით გათვალისწინებული პროგრამით გათვალისწინებული სერვისი არ იყო ხარისხიანი ან არ ახორციელებდნენ გარკვეულ სერვისს. ყველა ასეთ შემთხვევაში ჯანდაცვის სამინისტროს რეაგირება ჰქონდა და უშუალოდ პაციენტსა და კლინიკას შორის ურთიერთობაში ჩაერთო. აღმოჩნდა, რომ 80-90% შემთხვევაში კლინიკა არასწორ ინფორმაციას აწვდიდა პაციენტს, შესაბამისად, სამინისტროს ჩართულობით, მათ ეს ოპერაციები შემდგომში ჩაუტარდათ.
მხოლოდ 10% იყო ისეთი შემთხვევა, როდესაც ნამდვილად სურდა პაციენტს VIP სერვისი, რის გამოც საყოველთაო პროგრამას ერთჯერადად ეთიშებოდა. მსგავსი შემთხვევები ყურადსაღებია“, - განაცხადა ჯანდაცვის მინისტრის მოადგილემ.
ამასთან, ილია ღუდუშაურმა კიდევ ერთხელ განმარტა, რომ საპილოტე რეჟიმის პირობებში, გამოვლენილ ხარვეზებზე კლინიკებისთვის სანქციების დაწესება არ ხდება, თუმცა ჯარიმები მომავალი წლიდან ამოქმედდება.
„როგორც იცით, საპილოტე რეჟიმის დროს ფულად სანქციებს არ ვაწესებთ, მაგრამ მომავალი წლიდან, როდესაც საპილოტე სისტემა აღარ იქნება, კლინიკები დაჯარიმდებიან. ამიტომ მნიშვნელოვანია ყველა კლინიკას მივცეთ ინფორმაცია. პაციენტიც ინფორმირებული იყოს, რომ შესაძლებელია კლინიკა VIP სერვისს სთავაზობდეს, მაგრამ ვალდებულია, რომ საყოველთაო პროგრამის ფარგლებში საბაზისო სერვისი ყველა პაციენტს შესთავაზოს. აქ არის ძირითადი პრობლემა, თუმცა ბოლო 2 კვირის განმავლობაში ტენდენცია კლებადია, თუ დღეში 100-150 შემთხვევა იყო, ბოლო დღეებში 15-20 დაფიქსირდა. ვფიქრობ, მომართვების ძირითადი ნაწილი კლინიკების პერსონალის გაურკვევლობით არის გამოწვეული“, - აღნიშნავს ილია ღუდუშაური.
ცნობისთვის, 1-ელი ნოემბრიდან საქართველოში კლინიკების დაფინანსების მექანიზმი შეიცვალა. კერძოდ, სამედიცინო დაწესებულებებში, მომსახურების დიაგნოზთან შეჭიდული ჯგუფებით დაფინანსების ახალი მოდელი ამოქმედდა. DRG სისტემით დაფინანსების მოცულობას პაციენტის დიაგნოზი, ასაკი, ჰოსპიტალიზაციის ხანგრძლივობა და სხვა კრიტერიუმები განსაზღვრავს. ცალკეული მომსახურებისთვის კლინიკებს პაციენტებისთვის დამატებითი ანაზღაურების მოთხოვნის უფლება აღარ ექნება. DRG სისტემის დანერგვის შემდეგ, სამედიცინო მომსახურების მიღებისას, პაციენტი მხოლოდ იმ თანხას გადაიხდის, რასაც საყოველთაო ჯანდაცვის პროგრამის ფარგლებში, თანაგადახდის წილი ითვალისწინებს (0-დან 30%-მდე, საყოველთაო ჯანდაცვის პროგრამის პაკეტების შესაბამისად).
შეგახსენებთ იმასაც, რომ აღნიშნული მოდელი მხოლოდ საყოველთაო ჯანდაცვის პროგრამას ეხება და არ ვრცელდება კერძო სადაზღვევო კომპანიებსა და კლინიკებზე. აღნიშნულ პროგრამამდე სახელმწიფო ჰოსპიტალს კონკრეტულ შემთხვევაზე დადგენილი ტარიფების მიხედვით უხდიდა ანაზღაურებას.
DRG
