"როგორც საპატრიარქომ, ასევე სახელმწიფომ და საერთაშორისო პარტნიორებმა ერთობლივად დავაფიქსირეთ, რომ მნიშვნელოვანია ბავშვის საუკეთესო ინტერესი და მათი უფლებების დაცვა." — ამის შესახებ ჯანდაცვის მინისტრის მოადგილემ თამარ ბარკალაიამ განაცხადა.
მისი თქმით ქვეყანაში არსებობს ბავშვის უფლებათა კოდექსი, ოჯახის გაძლიერების პოლიტიკა, რომელიც მიმართულია დიდი ზომის ინსტიტუციების ნაცვლად ოჯახის გაძლიერებაზე და ოჯახთან მიახლოვებული ალტერნატიული ზრუნვის სერვისების ჩამოყალიბებაზე.
"შევთანხმდით, რომ დიდი ინსტიტუცია აღარ არის ქვეყნისთვის პრიორიტეტი და არ შეიძლება, ის წახალისებული იყოს.
ჩვენ იმავე ფორმატში გავაგრძელებთ თანამშრომლობას, როგორც ნინოწმინდაში, ასევე სხვაგან, რომ დიდი ზომის ინსტიტუციებში ბავშვების შეფასება, მათი საუკეთესო ინტერესების გამოვლენა და ოჯახში ინტეგრაცია იყოს წახალისებული.
ნინოწმინდის ბავშვთა პანსიონატში 23 ბავშვი რჩება. ჩვენ ვმუშაობთ ოჯახების მოძიებაზე, მათ გაძლიერებაზე იმისთვის, რომ მოხდეს პირველ რიგში, ოჯახში ინტეგრაცია და ეს პროცესი გაგრძელდება. ადგილზე სახელმწიფო ზრუნვის სააგენტოს შესაბამისი სპეციალისტები ამ დრომდე მუშაობენ.“ - განაცხადა თამარ ბარკალაიამ.
დღეის მდგომარეობით, სახელმწიფო ზრუნვის სააგნეტომ ნინოწმინდის პანსიონატიდან 30 ბავშვის გაყვანა უზრუნველყო." — აღნიშნა თამარ ბარკალაიამ