პრემიერ მინისტრმა პარლამენტის დამოუკიდებელი კანდიდატის ლევან კობერიძის მიერ 100 მლნ ლარის ყალბი დღგ-ს კორუფციული სქემასთან დაკავშირებულ შეკითხვას უპასუხა და აღნიშნა, რომ საქმეზე გამოძიება და სამართლებრივი პროცესები მიმდინარეობს და პროცესში ჩართული ყველა კომპანიის რესურსი დაყადაღებულია.

„თქვენ ხო ჩემზე უკეთესად იცით, ჩვენ არა ვართ იმ სტილის და იმ ესთეტიკის ხალხი, რომ ყველა დავიჭიროთ და ვაწამოთ და რაღაცა გავაკეთებინოთ , რეალურად სამართლებრივი პროცესები მიმდინარეობს, დაყადაღებულია იმ კომპანიების ყველა საჭირო რესურსი, რომლებიც ამ პროცესში იყვნენ ჩართული. შეიძლება ამაზე ვიღაცას კითხვის ნიშნები ჰქონდეს, რამდენიმე ადამიანს 9 თვიანი წინასწარი ვადა გაუვიდა და დროებით გარეთ არიან , მაგრამ პროცესი მიმდინარეობს და მერწმუნეთ,  რომ სახელმწიფოს რესურსულად დაყადაღებული აქვს ყველა ის აქტივი,  რომელმაც უნდა დააკომპენსიროს ბიუჯეტის ეს დანაკლისი.“-განაცხადა გახარიამ. 

პრემიერმა ასევე ლევან კობერიძის მიერ ჯანდაცვის სამინისტროსა და ექიმების გარშემო დასმულ შეკითხვებსაც უპასუხა და აღნიშნა, რომ ადამიანები ერთი სტილით მუშაობას არიან მიჩვეულები და ეხლა წესების ცვლა დისკომფორტს უქმნის. თუმცა, მისივე განმარტებით, მდგრადობის შენარჩუნებისთვის გარკვეული ცვლილებები და რეფორმები აუცილებელი იყო.

„ორი ძირითადი დაპირება გავეცი - სახელმწიფოს მხრიდან ბიუჯეტის გადახდების დაგვიანება იყო ზოგ შემთხვევაში 5-6 თვე, ეს თემა ჯანდაცვის სამინისტროსთან ერთად დეტალურად შევისწავლეთ და გარწმუნებთ, რომ იქ იყო განსხვავებული მიდგომები სხვადასხვა კომპანიასთან. ზოგს 2 თვე ჰქონდა, ზოგს - 6 თვე. ამას დრო სჭირდებოდა. წელს იქნება პირველი წელი, როდესაც ჯანდაცვის სისტემა, ყელა ეს ჰოსპიტალი, 12 თვის განმავლობაში 13 თვის ანაზღაურებას მიიღებს. პროგრესი უკვე მიმდინარეობს, 3 თუ 4 თვეა იქ უკვე დარჩენილი, 1 თვე უკვე შევამცირეთ და წლის ბოლომდე, მაშინ, როდესაც ეს ხალხი გულწრფელად მხარში გვიდგას კოვიდ-19-თან ბრძოლის ნაწილში, ეს საკითხი მოგვარდება. შეიძლება არის ცალკეული დისკომფორტის შემქმნელი წუხილები, მაგრამ ამასაც ვუპასუხებთ", - განაცხადა გიორგი გახარიამ.

პრემიერ-მინისტრის განმარტებით, მეორე თემა, რომელზეც შეთანხმება ვერ შედგა, იყო ტარიფების ნაწილი და ფასი დეფიბრილატორებზე.

„იმისთვის, რომ ეს პრობლემა გვერდზე გაგვეწია და არ გამხდარიყო სამინისტროსა და ბიზნესს შორის კონფლიქტის საგანი, შევთანხმდით, რომ ჯანდაცვის სამინისტრო შესყიდვების მექანიზმით საუკეთესო დეფიბრილატორებს თვითონ შეიძენს და ეს რომ დავის საგანი არ გახდეს, სტაციონარებსა და კარდიოლოგიურ კლინიკებს დაურიგებს, რაც უნდა გახდეს გარკვეული კომპრომისული ვარიანტი. ჯანდაცვის სამინისტრომ უკვე მოახდინა ამ დეფიბრილატორების იდენტიფიცირება, ახლა გადაუდებელი წესით მიმდინარეობს შესყიდვები. შესაძლოა, ეს დროსი გაიჭიმა, მაგრამ სისტემური რეფორმაა, რომელმაც უნდა შეგვინარჩუნოს საყოველთაო ჯანდაცვის მიღწევები. ეს იქნება მტკივნეული, არ იქნება მარტივი, ცოტა კერძო სექტორმა უნდა დათმოს, ცოტა - სახელმწიფომ და ასე საბოლოო შედეგამდე მივალთ", - განაცხადა პრემიერ-მინისტრმა.