პანდემიის დროს რამდენიმე ათეული ათასი ტონა სამედიცინო ნარჩენი წარმოიქმნა, რაც ადამიანის ჯანმრთელობასა და გარემოს პოტენციურ საფრთხეს უქმნის. ამის შესახებ ჯანდაცვის მსოფლიო ორგანიზაციის ანგარიშში წერია.

ანგარიშის მიხედვით, 2020 წლის მარტიდან 2021 წლის ნოემბრამდე, გაეროს ერთობლივი საგანგებო ინიციატივის ფარგლებში, ქვეყნებისთვის დასახმარებლად, დაახლოებით, 87 000 ტონა პირადი დამცავი საშუალება იქნა შეძენილი. ჯანმო-ს ინფორმაციით, ამ საშუალებების უმეტესობა გამოყენების შემდეგ ნარჩენებად გადაიქცა. ანგარიშის ავტორები ხაზგასმით აღნიშნავენ, რომ ამ მონაცემებში არ შედის გაეროს ინიციატივის მიღმა შეძენილი საშუალებები და ერთჯერადი ნიღბები, რომლებსაც მოქალაქეები ყიდულობდნენ და ბოლოს აგდებდნენ.

გარდა ამისა, კვლევის პერიოდში მთელ მსოფლიოში შეძენილ იქნა, დაახლოებით, 140 მილიონი COVID-19 ტესტის კომპლექტი, რომელიც შესაძლოა, 2,6 ათას ტონა არაინფექციურ და 732 ათას ლიტრ ქიმიურ ნარჩენად გადაიქცეს.

ამასთან, მთელ მსოფლიოში გავრცელებული ვაქცინების 8 მილიარდმა დოზამ, გამოყენებული ნემსების, შპრიცებისა და კონტეინერების სახით, შესაძლოა, 144 ტონა დამატებითი ნარჩენი წარმოქმნას.

მითუმეტეს, ამ დროისთვის სამედიცინო დაწესებულებების, დაახლოებით, 30%-ს არათუ COVID-19-ის, არამედ სტანდარტული სამედიცინო ნარჩენების გადასამუშავებელი მოწყობილობაც კი არ გააჩნია.

„ერთი მხრივ, სამედიცინო მუშაკებს უნდა ჰქონდეთ პირადი დამცავი აღჭურვილობა, მაგრამ მეორე მხრივ, უნდა დავრწმუნდეთ, რომ ამ საშუალებებს უსაფრთხოდ, გარემოსთვის ზიანის მიყენების გარეშე იყენებენ,“ - აცხადებს ჯანმო-ს საგანგებო სიტურაციების პროგრამის აღმასრულებელი დირექტორი, მაიკლ რაიანი.

BPN.GE