თუ ადამიანების დიდი რაოდენობა ნებისმიერ ქვეყანაში არ იქნება ვაქცინირებული, ეს პანდემია არ დასრულდება, - ამის შესახებ ჯანდაცვის მსოფლიო ორგანიზაციის წარმომადგენელმა, ევროპის ბიუროს ინციდენტობის მენეჯერმა ჰეზერ პაპოვიცმა „ინტერპრესნიუსის კითხვის საპასუხოდ აღნიშნა, პანდემიის დასრულების კეთილსაიმედო პროგნოზი, გავრცელდება თუ არა იმ ქვეყნებზე, სადაც მოსახლეობის დიდი ნაწილი ჯერ კიდევ არ არის ვაქცინირებული.
როგორც ჰეზერ პაპოვიცმა აღნიშნა, ჯანდაცვის მსოფლიო ორგანიზაციაში იმედოვნებენ, რომ 2022 წელს პანდემიის „საგანგებო მდგომარეობის ფაზა“ დასრულდება, მაგრამ ეს მხოლოდ იმ შემთხვევაში მოხდება, თუ ჩვენ გავაგრძელებთ ჩვენს ხელთ არსებული ყველა შესაძლებლობის გამოყენებას ვირუსზე წნეხის შესანარჩუნებლად.
„როგორც ჩვენ უკვე ვნახეთ, იმან, რაც ხდება ერთ ქვეყანაში, შეუძლია სწრაფად მოახდინოს გავლენა რეგიონსა და მსოფლიოში არსებულ მდგომარეობაზე. პანდემია, სავარაუდოდ, 2022 წლის ბოლოსთვის არ დასრულდება, განსაკუთრებით იმის გათვალისწინებით, რომ ჩვენ ჯერ კიდევ ვაკვირდებით ვაქცინების განაწილების არათანასწორობას ჩვენს რეგიონში, ისევე როგორც მსოფლიოში.
ვაქცინების განაწილება რადიკალურად განსხვავებულია ქვეყნების მიხედვით ჩვენს რეგიონშიც და მერყეობს 95%-დან 32%-მდე. ჩვენ უნდა შევავსოთ ვაქცინის განაწილებისას არსებული ეს სხვაობა, თუ გვსურს, რომ ამ პანდემიიდან გამოვიდეთ.
იმედი გვაქვს, რომ 2022 წელს შევძლებთ პანდემიის „საგანგებო მდგომარეობის ფაზის“ დასრულებას, მაგრამ ეს მხოლოდ იმ შემთხვევაში მოხდება, თუ ჩვენ გავაგრძელებთ ჩვენს ხელთ არსებული ყველა შესაძლებლობის გამოყენებას ვირუსზე წნეხის შესანარჩუნებლად.
აქვე უნდა ვთქვა, რომ ჯანდაცვის მსოფლიო ორგანიზაცია აფასებს ევროპის რეგიონში ქვეყნების მიერ გამოხატულ სოლიდარობას, რომლის დროსად 330 მილიონი დოზა ვაქცინის განაწილება მოხდა საჭიროების მქონე ქვეყნებისთვის. კრიტიკულად მნიშვნელოვანია, რომ ყველა ქვეყანაში მოწყვლადი საზოგადოებას, შემოსავლის დონის გაუთვალისწინებლად, მიეწოდებოდეს ვაქცინის ყველა დოზა უფასოდ,“- განაცხადა ჰეზერ პაპოვიცმა.
ამასთანავე, როგორც მან განმარტა, არ უნდა შევადაროთ COVID-19 გრიპს. მისი თქმით, COVID-19 ძალიან გადამდებია და ჯერ კიდევ შეიძლება იყოს მომაკვდინებელი, გაცილებით მეტად, ვიდრე გრიპი.
„კოვიდის გრიპის მსგავსად განხილვა მხოლოდ უბიძგებს ადამიანებს თავდაცვის საშუალებები შეასუსტონ და მათზე უარი თქვან, რაც უკანასკნელი რამ არის, რაც შეიძლება ახლა გავაკეთოთ.
გრიპისა და SARS-CoV-2 ვირუსი ორ ძალიან განსხვავებულ ოჯახს წარმოადგენენ სიმძიმის, გადადების სისწრაფის, მოწყვლადი ჯგუფებისა და სამკურნალო საშუალებების მიხედვით.
აქედან გამომდინარე, ძალიან ადრეა COVID-19 გამოვაცხადოთ ენდემურ დაავადებად. აქამდე ჯერ კიდევ საკმაო გზაა გასავლელი. დაავადების ენდემურობა განისაზღვრება ცირკულირების სტაბილურობითა და გავრცელების დონის წინასწარ განსაზღვრის შესაძლებლობით. კოვიდის შემთხვევაში კი ჩვენ ჯერ კიდევ გვაქვს დიდი დოზის განუსაზღვრელობა,“- განაცხადა ჯანდაცვის მსოფლიო ორგანიზაციის წარმომადგენელმა.
წყარო: ipn.ge