1-ელი იანვრიდან დიზელის საწვავის ხარისხობრივი და ეკოლოგიური მახასიათებლები გამკაცრდა და ის  „ევრო 5“-ის შესაბამისი სტანდარტის საწვავს გაუთანაბრდა. ეს ნიშნავს იმას, რომ თუ ადრე ბაზარზე სხვადასხვა სტანდარტის დიზელის საწვავის რეალიზაცია ხდება და ფასიც ხარიხის გათვალისწინებით განსხვავებული იყო, უკვე მიმდინარე წლიდან ყველა ნავთობიმპორტიორი ვალდებულია ქსელში  „ევრო 5“ სტანდარტის შესაბამისი საწვავი გაყიდოს.

„გლობალური სავაჭრო ჯგუფის“ გენერალური დირექტორი ვანო მთვრალაშვილი „კომერსანტთან“ ამბობს, რომ ახალი დადგენილება ბაზარზე ჯანსაღ კონკურენციას გააჩენს, თუმცა დაბალფასიანი პროდუქციის გაქრობასაც გამოიწვევს.

„ბაზარზე ყველას ერთი სტანდარტის საწვავის ვალდებულება უჩნდებათ, რაც ჯანსაღი კონკურენციის მხრივ ვითარებას გამოასწორებს. ბაზარზე ყველა შემომტანი მეტ-ნაკლებად ჩადგება თანაბარ პირობებში. „ევრო 5“ სტანდარტის შემოსვლა იქნება წინგადადგმული ნაბიჯი ასევე გარემოსდაცვითი მიმართულებითაც.

აღნიშნული დადგენილებიდან გამომდინარე მკვეთრად ფასების ცვლილება არ მოხდება, უბრალოდ აღარ იქნება და ბაზრიდან გაქრება დაბალფასიანი პროდუქტი, რომელიც აქამდე ქსელებში იყო წარმოდგენილი, რასაც ძირითადად ძველ სატრანსპორტო საშუალებებში იყენებდნენ. დარჩება ერთი, მაღალი ხარისხის პროდუქტი, რომელიც ავტოპარკის დიდი ნაწილისთვის მისაღებია.

საქართველოში  „ევრო 5“ სტანდარტის დიზელის იმპორტი დღეს ძირითადად რუსეთიდან ხორციელდება, მაგრამ დიზელის მომწოდებლები ასევე რუმინეთი, ბულგარეთი და თურქმენეთი არიან. მნიშვნელოვანია, რომ  „ევრო 5“ სტანდარტის დიზელის საწვავის ექსპორტის დაწყებას აზერბაიჯანიც შეძლებს“,- ამბობს ვანო მთვრალაშვილი.

მთავრობის შესაბამისი დადგენილება თავდაპირველად 2021 წლის 1 იანვარს, შემდეგ კი 2022 წლის იანვარში უნდა შესულიყო ძალაში. აზერბაიჯანის სათანადო საწარმოო სიმძლავრეების არარსებობა იყო ერთ-ერთი მთავარი არგუმენტი, რის გამოც ნავთობიმპორტიორებმა მთავრობას დიზელის  „ევრო 5“ სტანდარტზე გადასვლის გადავადება რამდენჯერმე სთხოვეს.