პროფესორ ვლადიმერ პაპავას განცხადებით, „საქსტატის“ მიერ გამოქვეყნებული, ოფიციალური სტატისტიკის მიხედვით, სოციალური უთანასწორობის მაჩვენებელი (იგივე „ჯინის კოეფიციენტი“), შემცირებულია, რაც იმას ნიშნავს, რომ წინა წლებთან შედარებით, მოსახლეობაზე უფრო თანაბრად ხდება შემოსავლების განაწილება.
„ამ კუთხით, 2020 წელს, 2010 ან 2012 წლებთან შედარებით სიტუაცია აშკარად გაუმჯობესებულია. თანაც, 2019 წელს სიღარიბის ზღვარს ქვემოთ მყოფი მოსახლეობა, 2007 წელთან შედარებით, 768 ათასით, 2010 წელთან შედარებით 684 ათასით, ხოლო 2012 წელთან შედარებით 392 ათასით შემცირდა. 2019 წელს სიღარიბის დონემ ისტორიულ მინიმუმს მიაღწია და 19,5% შეადგინა. ეს ოფიციალური სტატისტიკაა, რომელსაც ჩვენ ყველა, განსაკუთრებით, თანამდებობის პირები, მათ შორის ეკონომიკის მინისტრიც, რა თქმა უნდა, უწინარეს ყოვლისა ვეყრდნობით“, - აღნიშნა ლადო პაპავამ. მისივე თქმით, საქსტატის მონაცემებით, 2007 წელს სიღარიბის ზღვარს ქვემოთ იყო 1,5 მილიონი ადამიანი, 2010 წელს 1,4 მილიონი, 2012 წელს 1,1 მილიონი, ხოლო 2019 წელს 725 ათასი ადამიანი. „ინკლუზიურობაში გარღვევის მიზნით, მთავრობა ნაბიჯებს ნამდვილად დგამს. აქ აუცილებელია, ქვეყანაში ხელი შეეწყოს ეკონომიკის რეალური სექტორის განვითარებას ანუ, ხელი უნდა შეეწყოს მრეწველობის და სოფლის მეურნეობის განვითარებას. ამ თვალსაზრისით, მთავრობა ახორციელებს საინტერესო პროექტს „აწარმოე საქართველოში“ და მე ვურჩევდი მას, ეს პროექტი მეტწილად ორიენტირებული იყოს მრეწველობასა და სოფლის მეურნეობაზე, ნაკლებად - ტურისტულ სექტორზე, რადგან ტურიზმი მთვარობის მხარდაჭერის გარეშეც შედარებით ადვილად შეძლებს განვითარებას, მრეწველობას და სოფლის მეურნეობას კი, მთავრობიდან მხარდაჭერა ნამდვილად ესაჭიროება. ამ შემთხვევაში, ინკლუზიურობა კიდევ უფრო გაიზარდება“ - განაცხადა ვლადიმერ პაპავამ.
მისივე თქმით, ქვეყანამ ისწავლა გარკვეული რეგულაციებით ცხოვრება და ამ პირობებში მოხდა ის, რომ თუ 2020 წელს მთავრობა იყო ფრთხილი და ეკონომიკის სერიოზული ჩაკეტვა გვქონდა, 2021 წელს კორონავირუსთან თანაარსებობის შესაძლებლობის პირობებში გახსნა ეკონომიკა და ამან მისცა ძალიან სერიოზული ზრდა, რაც, გარკვეული აზრით. მოსალოდნელიც იყო. ლადო პაპავას შეფასებით, თუ ეკონომიკური ზრდა მოსახლეობის კეთილდღეობაზე ყოველთვის სათანადო დონეზე ისე ვერ ისახება, როგორც რიცხვებშია გამოსახული, იმის გამო ხდება, რომ ინფლაცია აჭარბებს ეკონომიკური ზრდის მაჩვენებელს.
გულწრფელად გითხრათ, პირადად მე ამხელა ზრდას არ ველოდი, მაგრამ ეკონომიკური ზრდის ის რიცხვი, რომელიც დაფიქსირდა „საქსტატის“ მიერ, საკმაოდ მნიშვნელოვანია. ბევრს სწორად არ აქვს აღქმული ეკონომიკური ზრდა. ზოგს ის ეკონომიკური კეთილდღეობის სინონიმი ჰგონია. ეკონომიკური ზრდა და ეკონომიკური კეთილდღეობა ორი განსხვავებული მაჩვენებელია - ეკონომიკური ზრდა არის, თუ რამდენად გაიზარდა ეკონომიკა, ეკონომიკური კეთილდღეობა კი არის ის, რამდენად გაუმჯობესდა ადამიანების ცხოვრება ეკონომიკური თვალსაზრისით. პრობლემა არ არის ეკონომიკურ ზრდაში. პირიქით, ეკონომიკური ზრდა პოზიტიურ სიგნალს იძლევა, პრობლემა არის ინფლაციაში,“ - აღნიშნა პაპავამ.
წყარო: ბიზნესპრესნიუსი