აშშ-ის პრეზიდენტ ჯო ბაიდენის ადმინისტრაცია მსოფლიოში ნავთობისა და გაზის მწარმოებლებს წარმოების გაზრდისკენ მოუწოდებს. ამის შესახებ აშშ-ის ენერგეტიკის მდივანმა, ჯენიფერ გრანჰოლმმა CNN-თან ინტერვიუს დროს განაცხადა.
მისი თქმით, ეს თხოვნა როგორც OPEC-ის, ისე აშშ-ის ნავთობისა და გაზის შიდა მწარმოებლებს შეეხება.
გრანჰოლმმა, ასევე, დააანონსა, რომ მომავალ კვირას აშშ-ის ნავთობისა და გაზის კომპანიების ხელმძღვანელებთან შეხვედრებს გეგმავს, ხოლო თავად პრეზიდენტი მომავალ თვეში საუდის არაბეთის ოფიციალურ პირებს, მათ შორის, სამეფოს გვირგვინოსან პრინცს, მუჰამედ ბინ სალმანს შეხვდება.
მინისტრის თქმით, საუდის არაბეთში ჯო ბაიდენის დაგეგმილი ვიზიტი და მემკვიდრე პრინცთან შეხვედრა სპარსეთის ყურის თანამშრომლობის საბჭოს სამიტის ფარგლებში იგეგმება.
„ვფიქრობ, ის საუდის არაბეთის მემკვიდრე პრინცსაც შეხვდება. პრეზიდენტი მოუწოდებს ყველა მიმწოდებელს მთელს მსოფლიოში, წარმოება გაზარდონ. ეს ეხება ნავთობის ექსპორტიორი ქვეყნების ორგანიზაციას, რომელიც, ასევე, ნავთობისა და გაზის ჩვენს შიდა მწარმოებლებს მოიცავს. პრეზიდენტი წარმოების გაზრდას, მსოფლიოს სხვა ლიდერების მსგავსად ითხოვს,“ - აცხადებს ჯენიფერ გრანჰოლმი.
CNN-ის კითხვაზე, იქნება თუ არა შეხვედრა ერთი-ერთზე, მინისტრმა განაცხადა, რომ სამმიტზე ბაიდენი ენერგეტიკის საკითხებზე შეხვედრების სერიას გამართავს.
თუმცა, CNN-ის შეფასებით, ენერგეტიკის მდივნის კომენტარი პარასკევს გაკეთებულ ბაიდენის განცხადებას ეწინააღმდეგება, როცა პრეზიდენტმა მუჰამედ ბინ სალმანთან შეხვედრა გამორიცხა.
„არ ვაპირებ მასთან შეხვედრას, მე საერთაშორისო შეხვედრაზე მივდივარ და მასთან საუბარი ამ დიდი დისკუსიის ნაწილი იქნება,“ - განაცხადა პრეზიდენტმა.
პრეზიდენტი, ჯო ბაიდენი საუდის არაბეთში მეფე სალმანის მიწვევით, რვა სახელმწიფოს მეთაურთან ერთად GCC+3-ის (Gulf Cooperation Council), ანუ სპარსეთს ყურის თანამშრომლობის საბჭოს სამიტზე ჩავა, რომელშც მონაწილეობას ეგვიპტე, იორდანია და ერაყიც მიიღებენ. ამერიკის ეროვნული უშიშროების საბჭოს წარმომადგენლის ცნობით, ორმხრივი შეხვედრა მეფე სალმანთან და მის გუნდთან გაიმართება, რომელშიც მემკვიდრე პრინცი და საუდის არაბეთის სხვა ოფიციალური პირები მიიღებენ მონაწილეობას.
ვიზიტის ფარგლებში, რომელიც ივლისის შუა რიცხვებში არის დაგეგმილი, ჯო ბაიდენი ჯერ ისრაელში, ასევე, პალესტინის დასავლეთ სანაპიროზე ჩავა.
გაპრეზიდენტების შემდეგ ჯო ბაიდენი მემკვიდრე პრინც მუჰამედთან პირდაპირ კავშირს თავს არიდებდა და მის ნაცვლად მამამისთან, მეფე სალმანთან საუბარს არჩევდა, რომელიც 86 წლისაა და ჯანმრთელობის პრობლემები აქვს. 2021 წლის თებერვალში თეთრმა სახლმა განაცხადა, რომ ჯო ბაიდენი ერ რიადთან ურთიერთობის „გადატვირთვას“ მემკვიდრე პრინცის გვერდის ავლით გეგმავს, რომელსაც აშშ-ს სადაზვერვო სააგენტო 2018 წელს ჟურნალისტ ჯამალ ხაშოგის მკვლელობზე პასუხისმგებლად მიიჩნევს.
თუმცა რუსეთის მიერ უკრაინაში შეჭრის შემდეგ ენერგორესურსებზე ფასების გლობალური ზრდისა და ირანის მხრიდან მზარდი ბირთვული საფრთხის გამო, აშშ ცდილობს, საუდის არაბეთთან და სპარსეთის ყურის ქვეყნებთან ადრინდელი ურთიერთობები აღადგინოს.