ევროკავშირს არ სურს უკრაინის დამარცხება ომში, ამიტომ გააგრძელებს იარაღის მიწოდებას და სანქციებს რუსეთის ფედერაციის წინააღმდეგ, - ამის შესახებ ევროკავშირის უმაღლესმა წარმომადგენელმა პოლიტიკისა და უსაფრთხოების საკითხებში ჯოზეფ ბორელმა განაცხადა.
მისი თქმით, ევროკავშირი უკრაინას იარაღის მიწოდებით უნდა დაეხმაროს. ამასთან, ბორელმა აღნიშნა, რომ ევროკავშირმა თავიდან უნდა აიცილოს პირდაპირი კონფლიქტი რუსეთთან.
„ჩვენ უნდა გავაგრძელოთ უკრაინის შეიარაღება ესკალაციის გარეშე, რომელშიც სულ უფრო მეტი ქვეყანა ერთვება. ამ ტიპის კონფლიქტებში იმარჯვებს იარაღი და მტრის ეკონომიკური დასუსტება. ჩვენ ბალანსის რთულ მდგომარეობაში ვართ. ჩვენ გვინდა დავეხმაროთ უკრაინას, მაგრამ არ გვინდა ომში ჩარევა. ევროკავშირი არ არის სამხედრო ალიანსი, მაგრამ მე მჯერა, რომ ჩვენ უნდა დავეხმაროთ უკრაინას. ჩვენ ყველაფერს ვაკეთებთ, რაც შეგვიძლია. მაგრამ წითელი ხაზების გადაკვეთის გარეშე, რათა კონფლიქტი არ გავრცელდეს“, - განაცხადა ბორელმა.
ბორელმა აღნიშნა, რომ ახლა პრიორიტეტი უკრაინელი მშვიდობიანი მოსახლეობის ხოცვა-ჟლეტის აღკვეთაა.
„რაც უნდა გავაკეთოთ არის ის, რომ არ განმეორდეს ისეთი მოვლენები, როგორიცაა ბუჩას მოვლენები. ომის შემდეგ ყოფილ იუგოსლავიაში, მრავალი წელი დასჭირდა დამნაშავეების გასამართლებას. თუმცა, ისინი გაასამართლეს ჰააგაში და სასჯელი მიუსაჯეს“, - განაცხადა ბორელმა.
ბორელის თქმით, უკრაინას სჭირდება დახმარება, რათა შეინარჩუნოს მტკიცე პოზიცია ოკუპანტების წინააღმდეგ.
„ყველა ომი მთავრდება ცეცხლის შეწყვეტით და შემდეგ სამშვიდობო შეთანხმებით. რუსეთმა სცადა კიევის ოკუპაცია, მაგრამ წარუმატებელი აღმოჩნდა. მან ასევე ვერ შეძლო უკრაინის ზღვიდან იზოლირება“, - დასძინა ევროკავშირის უმაღლესმა წარმომადგენელმა.