მოლდოვას სეპარატისტულ რეგიონში ვითარება უკიდურესად მწვავდება. რუსეთის შეიარაღებული ძალების კონტროლს დაქვემდებარებულ არაღიარებულ რესპუბლიკაში დღეს, 28 აპრილს, საყოველთაო მობილიზაცია გამოცხადდა. მოლდოვას პრეზიდენტი მაია სანდუ კი თავისი ქვეყნის რუმინეთს მიერთებაზე ალაპარაკდა.
მიიღე ინფორმაცია უფრო სწრაფად „კომერსანტის“ Telegram-ზე.
უკრაინის გენერალური შტაბის ინფორმაციით, დნესტრისპირეთში ადგილობრივ ე.წ. ადმინისტრაციებს სპეციალურ სამხედრო შეკრებებზე რეზერვისტების მობილიზების ბრძანება გაეგზავნათ. შეკრება 90 დღეს გაგრძელდება. „გამოძახებული იქნება 55 წლამდე ასაკის ყველა მამაკაცი. ისინი მიიღებენ ფულად ანაზღაურებას, კვებას და საცხოვრებელს. ახალწვეულები 2800 რუბლს მიიღებენ“, – ნათქვამია დოკუმენტში, რომელიც უკრაინის დაზვერვამ მოიპოვა, წერს RBC-Ukraine.
უკრაინული დაზვერვის ცნობით, საყურადღებოა, რომ მობილიზაციის წერილი 21 აპრილით არის დათარიღებული, ანუ ერთი დღით ადრე, ვიდრე დნესტრისპირეთში სარეტრანსლაციო ანძებს და უშიშროების შენობას ააფეთქებდნენ, რომელთა დროსაც არავინ დაშავებულა.
თავად სეპარატისტული რესპუბლიკის ე.წ. პრეზიდენტი ვადიმ კრასნოსელსკი უარყოფს დნესტრისპირეთიდან წვევამდელი ასაკის კაცებისთვის გასვლის შეზღუდვისა და საყოველთაო მობილიზაციის შესახებ ინფორმაციას.
მოლდოვა–რუმინეთის გაერთიანების პერსპექტივა
მოლდოვას პროდასავლური პრეზიდენტი მაია სანდუ, რომელიც ამ პოსტზე მოსვლის დღიდან კატეგორიულად მოითხოვს დნესტრისპირეთიდან რუსეთის ჯარების გაყვანას, არ გამორიცხავს, რომ მოლდოვა და რუმინეთი შეიძლება გაერთიანდნენ ერ სახელმწიფოდ. თუმცა, მისივე თქმით, ამისათვის სულ მცირე ერთი პირობა უნდა შესრულდეს, იუწყება Jurnal TV.
მაია სანდუს თქმით, აუცილებელია მოქალაქეების სურვილი.
„ეს მოქალაქეებს უნდა კითხოთ. გაერთიანება მხოლოდ ხალხის მხარდაჭერით შეიძლება მოხდეს, როდესაც მოქალაქეები იტყვიან, რომ ასე სურთ და ასეც მოხდება“, – განაცხადა პრეზიდენტმა.
სანდუმ ნატოში მოლდოვას გაწევრიანების შესაძლებლობაზე კითხვასაც უპასუხა და აღნიშნა, რომ ასეთი გადაწყვეტილების მტკიცე მხარდაჭერის შესაძლებლობას საზოგადოებრივი აზრის კვლევის შედეგები ჯერ არ აძლევს.
მანამდე მოლდოვას ყოფილმა პრემიერ–მინისტრმა იური ლიანკემ განაცხადა, რომ მოლდოვა რუმინეთს უნდა შეუერთდეს, როგორც კი რუსეთის ჯარები მიუახლოვდება მის ქვეყანას.
უკრაინა საზღვარს ამაგრებს
ამასობაში, დნესტრისპირეთში დაძაბულობის გამწვავების ფონზე, უკრაინის შეიარაღებულმა ძალებმა მოლდოვას სეპარატისტულ რეგიონთან საზღვრების გამაგრება დაიწყო.
უკრაინის ტერიტორიული თავდაცვის ძალებმა ოდესის ოლქსა და დნესტრისპირეთს შორის საზღვარი გაამაგრეს. ამის შესახებ ხუთშაბათს, 28 აპრილს ოდესის ოლქის სამხედრო ადმინისტრაციის სპიკერმა სერგეი ბრატჩუკმა განაცხადა.