ერთი თვის წინ კომპანია „ვილლა მოსავალმა“ $5 მილიონიანი ინვესტიციით კატარის დედაქალაქ დოჰაში პირველი პრემიუმ კლასის ქართული რესტორანი „მოსავალი“ გახსნა. რესტორანი ერთ-ერთ ყველაზე დიდ სავაჭრო ცენტრში Oasis Mall-ში მდებარეობს.

როგორც კომპანიაში აცხადებენ, რესტორანი სრულად ქართული კონცეფციისაა, ინტერიერი ქართული ორნამენტებით არის გაფორმებული, მომსახურე პერსონალს კი ქართული სამოსი აცვია. დოჰაში ქართული რესტორნის გახსნის იდეა საქართველოში ჩამოსული კატარელი სტუმრების მხრიდან გაჩნდა, რომლებიც ქართული სამზარეულოთი აღფრთოვანდნენ.

ქართულ-კატარული ინვესტიციით გახსნილი რესტორანი 250 ადამიანზე არის გათვლილი, რაც შეეხება პერსონალს, დღეს კატარის რესტორანში 80 ადამიანია დასაქმებული, რომელთა უმრავლესობა ქართველია.

კომპანიას დოჰაში რესტორნის მართვის გამოცდილება აქამდეც ჰქონდა. „ვილა მოსავალი“ მეორე რესტორანს „ალ ტერასს“ ფლობს, რომელიც ტურისტულ ქუჩაზე ერთი წლის წინ გაიხსნა და საშუალო სეგმენტზეა გათვლილი. 

რაც შეეხება სამომავლო გეგმებს, კომპანიაში აცხადებენ, რომ „ვილა მოსავალი“ ქსელის გაფართოებაზე მუშაობს და რამდენიმე ქვეყნის ბიზნესწრეებთან მოლაპარაკებებს აწარმოებს.

კომპანია „ვილლა მოსავალი“ საქართველოში 2018 წელს დაფუძნდა. დღეისთვის კომპანია თბილისთან ახლოს სოფელ ახალუბანში სასტუმრო კომპლექსს მართავს, რომელიც რესტორნებს და მეღვინეობას აერთიანებს.