რეგიონში ყველაზე მასშტაბური DIY ფორმატის ჰიპერმარკეტი „დომინო“ - შპს „ტერმინალ ვესტ თრეიდინგის“ ბრენდი, მეხუთე წელია ზარალზეა. ამის შესახებ კომპანიის 2020 წლის ინდივიდუალური ანგარიშიდან ირკვევა. დოკუმენტის მიხედვით, პანდემიური 2020 წელი კომპანიამ 7,1 მლნ ლარიანი ზარალით დაასრულა. 2019 წელს კომპანიის ზარალი 7.2 მლნ ლარს შეადგენდა.
„დომინომ“ გასულ წელს 55,8 მლნ შემოსავალი მიიღო, რეალიზებული პროდუქციის თვითღირებულება 40,1 მლნ იყო. შესაბამისად, 2020 წლის განმავლობაში კომპანიის მთლიანმა მოგებამ 15,7 მლნ ლარი შეადგინა.
კომპანიის მიერ დასაქმებული პირების საშუალო რაოდენობა 2020 წლის განმავლობაში 405 ადამიანს შეადგენდა, მათი სახელფასო ხარჯი 7,2 მლნ ლარი იყო.
აღსანიშნავია, რომ 2020 წლის 31 დეკემბრით დასრულებული წლის მდგომარეობით კომპანიის ვალდებულებებმა მის აქტივებს 22,5 მლნ ლარით გადააჭარბა, რაც ძირითადად განპირობებულია გადაუხდელი სესხის ძირი თანხითა და დარიცხული პროცენტის ნაშთით მისი მშობელი კომპანიის მიმართ, რაც შეადგენს 28,982 ათას ლარს. კომპანიამ მიიღო ფორმალური მხარდაჭერის წერილი, რომელიც ადასტურებს, რომ მშობელი კომპანია გააგრძელებს კომპანიისთვის ფინანსური დახმარების გაწევას, რათა მან განაგრძოს საქმიანობა.
2021 წლის 1-ელ თებერვალს შპს „ტერმინალ ვესტ თრეიდინგმა“ თავის მშობელ კომპანიასთან „TERMINAL WEST (DIY) HOLDINGS LIMITED“ დამატებითი სესხის ხელშეკრულება გააფორმა, 8 საპროცენტო განაკვეთით წელიწადში, 5 მილიონი აშშ დოლარის ოდენობის ჯამური ლიმიტით, ათვისების პერიოდით - 2025 წლის 31 დეკემბერი, ხოლო დაფარვის ვადით - 2035 წლის 31 დეკემბერი. მომზადებული დოკუმენტიდან ირკვევა, რომ სესხის ხელშეკრულების მიზანი იყო ძირითადი საშუალებების შესყიდვისა და სამუშაო კაპიტალის დაფინანსება ახალი მაღაზიის გასახსნელად, რომელიც გლდანი-დიღმის დამაკავშირებელი მაგისტრალის ჩრდილოეთით განთავსდება.
ანგარიშის მიხედვით, 2021 წლის 3 მარტს, შპს „ტერმინალ ვესტ თრეიდინგმა“ დამატებით შეამცირა მშობელი კომპანიისგან „TERMINAL WEST (DIY) HOLDINGS LIMITED“ არსებული სესხის ხელშეკრულების ფარგლებში აღებული სესხი 200 ათასი აშშ დოლარის ოდენობით.
2018 წელს ხელმძღვანელობამ გადაწყვეტილება მიიღო, კომპანიის საქმიანობა გაეფართოებინათ და 1,000 – 3,000 კვ.მ. ფართის მაღაზიების ახალი ფორმატი შეიმუშავა. „დომინო მარკეტი“-ს სავაჭრო დასახელებით 2019 წელს ისანში პირველი მაღაზია გაიხსნა. ამავე წელს კომპანიამ მეორე მაღაზია დიდ დიღომში გახსნა. აღსანიშნავია, რომ 2020 წელს, იჯარის ხელშეკრულების ვადის ამოწურვისას ისანში მდებარე მაღაზია დაიხურა.
შეგახსენებთ, რომ დომინოს პირველი ჰიპერმარკეტი „ისთ ფოინთის“ ტერიტორიაზე 2015 წლის 23 მაისს გაიხსნა და მისი საერთო ფართი 12,000 კვ.მ.-ს შეადგენს. კომპანიის ძირითადი საქმიანობაა სამშენებლო მასალების და საყოფაცხოვრებო საქონლის საცალო და საბითუმო ვაჭრობა. რაც შეეხება შპს „ტერმინალ ვესტ თრეიდინგს“, იგი 2014 წელს დაფუძნდა. კომპანიის უშუალო მშობელ კომპანიას წარმოადგენს „Terminal West (DIY) Holdings Limited“ (კვიპროსი), კომპანიის საბოლოო მაკონტროლებელ მხარეს წარმოადგენს „Quadrum Investment Management Limited“ (კაიმანის კუნძულები), რომელიც მართავს კომპანიას ინვესტორების სასარგებლოდ და რომლის საბოლოო 100% წარმოადგენს ოლეგ პავლოვის საკუთრებას.
ბაჩო ადამია