რადიო „კომერსანტის“ დილის ეთერში სამედიცინო ექსპერტმა აკაკი ზოიძემ სამედიცინო სექტორში DRG-ის სისტემის დანერგვაზე, ხარვეზებსა და რისკებზე ისაუბრა.

როგორც ცნობილია, სამედიცინო დაწესებულებებში დაფინანსების ახალი მოდელის საპილოტე ვერსია 2022 წლის ნოემბრიდან ამოქმედდა. 2023 წლის იანვრიდან კი DRG-ი სრული სანქცირებით ჩაერთვება პროცესში.

აკაკი ზოიძის თმით, დაფინანსების ახალი მოდელის ძირითადი ხარვეზი ისაა, რომ მის მომზადებას ნაკლები დრო დაეთმო, ვიდრე სჭირდებოდა და 3-თვიანი საპილოტე პერიოდი საკმარისი არ არის. „როგორც ბავშვს ჩააგდებენ წყალში და მიუშვებენ, რომ ცურვა ისწავლოს, დაახლოებით ასეთივე პროცესი განვითარდება DRG-სთან მიმართებაში. ვინც მოერგება და ალღოს აუღებს და შეისწავლის, პრობლემები სავარაუდოდ არ შეექმნება,“- აცხადებს აკაკი ზოიძე.

„ამ სისტემის დანერგვა 2014 წლიდან იგეგმება იმიტომ, რომ ის სექტორში შედარებით სამართლიან ფასწარმოქმნას უზრუნველყოფს. რეფორმის ძირითადი ხარვეზი არის ის, რომ მის მომზადებას ნაკლები დრო დაეთმო, ვიდრე სჭირდებოდა. მთლიან სექტორში უნდა ჩატარებულიყო მოსამზადებელი სამუშაოები, იგივე ფინანსური მენეჯერების გადამზადების კუთხით. 3-თვიანი საპილოტე რეჟიმი არ მგონია საკმარისი იყოს. რახან რეალობამ მოითხოვა, როგორც ბავშვს ჩააგდებენ წყალში და მიუშვებენ, რომ ცურვა ისწავლოს (ეს ერთი შეხედვით სასტიკი მეთოდია), დაახლოებით ასეთივე პროცესი განვითარდება. მათ, ვინც მოერგება, ალღოს აუღებს და შეისწავლის, არ მგონია პრობლემები შეექმნას“, - განაცხადა აკაკი ზოიძემ.

მისი თქმით, რეფორმას პაციენტებისთვისაც დადებითი შედეგების მოტანა შეუძლია, რადგან მათ თანაგადახდა და ზედმეტის გადახდა აღარ მოუწევთ. თუმცა, ხარვეზები აქაც არის. პაციენტს არჩევანის უფლება ეზღუდება, რადგან ქირურგიული ოპერაციისას ერთი და იგივე თანხის გადახდა უწევს იაფფასიანი და ძვირიანი მასალების გამოყენებისას.

როგორც აკაკი ზოიძე ამბობს, ზოგიერთ ქვეყანაში ასეთი ოპერაციები ან გამონაკლისის სახითაა DRG-ის სისტემაში ან პაციენტები, DRG-სთან ერთად, დამატებით იხდიან ამერიკული წარმოების შუნტის ან, თვალის ოპერაციების დროს, ბროლის თანხას. მნიშვნელოვანია ის ფაქტორი, რომ პაციენტს ჰქონდეს არჩევანის საშუალება ისე, რომ საყოველთაო ჯანდაცვის პროგრამიდან არ ამოვარდეს.

„დღეს თითქოს კეთილშობილური მიზნით სურთ, რომ ზედმეტი ტვირთი არ დააწვეს პაციენტის ჯიბეს მაგრამ, მეორეს მხრივ, მათი არჩევანი იზღუდება, როცა ადამიანს ერთკაციან პალატაში უნდა იწვეს და არა 8-კაციანში. თუმცა, კიდევ ვიმეორებ, რომ პრინციპი და მიდგომა სწორია, მთავარია ადეკვატურად განხორციელდეს და როგორც კლინიკებმა, ისე პაციენტებმა ახალ მოდელს სწრაფად აუღონ ალღო“, — აცხადებს აკაკი ზოიძე.