მსოფლიოში კომერციული დრონების უდიდესმა ჩინურმა მწარმოებელმა, DJI-მ რუსეთსა და უკრაინაში ყველანაირი ბიზნესსაქმიანობა შეაჩერა. ინფორმაციას BBC ავრცელებს.

ომის დაწყების დღიდან უკრაინამ კომპანიას მოუწოდა, მიიღოს ზომები, რომ რუსეთმა მისი უპილოტო თვითმფრინავები არ გამოიყენოს.

თავის მხრივ, ჩინურ კომპანიაში აცხადებენ, რომ ეს გადაწყვეტილება რომელიმე ქვეყანას არ უკავშირდება, უბრალოდ, მისი დრონები სამხედრო გამოყენებისთვის არ არის განკუთვნილი.

თუმცა უკრაინის უპილოტო საფრენი აპარატების მფლობელთა ფედერაციის თავმჯდომარემ, ტარას ტროიაკმა BBC-ის განუცხადა, რომ საეჭვოა, ამ გადაწყვეტილებამ რუსეთის სამხედრო ძალებს DJI დრონების გამოყენება გადააფიქრებინოს. მისი თქმით, მაღაზიებში თვითმფრინავების მარაგი შესაძლოა, რამდენიმე თვეში ამოიწუროს, მაგრამ დრონებს ჩინეთიდან რუსეთში კონტრაბანდით ადვილად შეიტანენ.

ტარას ტროიაკი ამბობს, რომ უპილოტო თვითმფრინავებს რუსეთის სამხედრო ძალები მოკლე დისტანციური დაზვერვისთვის, ირგვლივ უკრაინელი ჯარისკაცების გამოსავლენად იყენებენ. მისი თქმით, მართალია, DJI-ს სურს, კონფლიქტში ნეიტრალური გამოჩნდეს, მაგრამ მან მიწოდება უკრაინაში კი არა, მხოლოდ რუსეთში უნდა შეწყვიტოს.

„...იმიტომ, რომ ჩვენ ვიცავთ ჩვენს ქვეყანას და ვიყენებთ ყველა სახის სამოქალაქო მანქანას, სამოქალაქო მობილურ ტელეფონებსა და სამოქალაქო დრონებს. ეს იმიტომ კი არ ხდება, რომ დრონების გამოყენება სამხედრო მიზნებისთვის გვსურს, არამედ რეალურად სხვა არჩევანი არა გვაქვს," - აცხადებს ტროიაკი.

DJI-მ BBC-ს განუცხადა, რომ მისი მოწყობილობის სამხედრო მიზნებისთვის გამოყენება კომპანიის პრინციპებს ეწინააღმდეგება. თუმცა, BBC-ის შეფასებით, მსოფლიოში კომერციული დრონების უმსხვილესი მწარმოებლის მიერ ოპერაციების შეჩერება მსხვილი ჩინური კომპანიების საქციელს არ შეესაბამება, რადგან ჩინეთი, თითქოსდა, კონფლიქტის მიმართ ნეიტრალურ პოზიციაზე დარჩენას ცდილობს და მშვიდობიან მოგვარებას ემხრობა, მაგრამ უკრაინაში რუსეთის შეჭრა აქამდე არ დაუგმია.

მარტში უკრაინის ვიცე-პრემიერ მიხაილო ფედოროვმა DJI-ს ტვიტით მოუწოდა, დაებლოკა პროდუქცია, რომელიც „რუსეთს უკრაინელების დახოცვაში ეხმარებოდა.“ მის ტვიტზე თანდართული ღია წერილი ამტკიცებდა, რომ რუსეთი DJI დრონებს რაკეტების დასამიზნებლად იყენებდა, რაზეც კომპანიამ უპასუხა, რომ მისი პროდუქცია მხოლოდ სამოქალაქო გამოყენებისთვის არის გამიზნული. ასევე, კომპანია მზად იყო, უკრაინის მოთხოვნის შემთხვევაში, გეოზონის ფუნქცია ჩაერთო, რომელიც დრონის მუშაობას გეოგრაფიულად ზღუდავს, რათა თავიდან აეცილებინა DJI-ს ნებისმიერი გამოყენება რუსული თუ უკრაინული მხრიდან.

ტარას ტროიაკმა BBC-ის გაუზიარა ბმული ვიდეოთი, რომელზეც რუსული ძალების მიერ მარიუპოლის საბრძოლო მოქმედებებში DJI-ლოგოიაინი დრონის გამოყენება ჩანს.

„ჩვენ შეშფოთებული ვართ ჩვენი პროდუქციის სამხედრო გამოყენების გამო, რაც 2022 წლის 21 აპრილსაც განვაცხადეთ. ბიზნეოპერაციების შეჩერება ჩვენი პრინციპების გამოხატვაა. DJI თავის პროდუქციას ყოველთვის მხოლოდ სამოქალაქო გამოყენებისთვის აწარმოებს და ისინი სამხედრო მიზნებისთვის არ არის განკუთვნილი. ასეთი გამოყენება ჩვენს პრინციპებს ეწინააღმდეგება და სამართლებრივად უნდა დაისაჯოს,“ - ნათქვამია კომპანიის განცხადებაში.

წყარო: "ბიზნესპრესნიუსი"