რძის ნაწარმის ფასები უკვე რამდენიმე თვეა ზრდის ტენდენციით გამოირჩევა. როგორც ყველის მწარმოებელთა ასოციაციის თავმჯდომარე ანა მიქაძე „კომერსანტთან“ აცხადებს, ბაზარზე ნედლი რძის დეფიციტია, შესაბამისად გაძვირებულია ყველიც და სხვა რძის ნაწარმიც.
ანა მიქაძე ამბობს, რომ რძის დეფიციტი თვეების წინ დაიწყო და ძალიან მალე შესაძლოა საკუთარი რძე საერთოდ აღარ გვქონდეს, თუ სახელმწიფო მაღალპროდუქტიული საქონლის ჩამოყვანის პროგრამას არ განახორციელებს.
„პანდემიის დროს დაიწყო რძის დეფიციტი და ყოველდღიურად ვითარება რთულდება. პანდემიის დროს მესაქონლეობაში ფერმერებს გაუძვირდათ საკვები, რადგან ქერზე და ხორბალზე ფასებმა მნიშვნელოვნად მოიმატა. ამ პრობლემების გამო, გამოსავალი საქონლის სახორცედ გაყიდვაში ნახეს. დღეს არის რამდენიმე ორგანიზებული ფერმა, მაგრამ ეს ამინდს არ ქმნის და ზღვაში წვეთია. ამ ყველაფერმა მაშინვე გააჩინა რძის დეფიციტი, შესაბამისად ადგილობრივი ბაზარი შეივსო რძის ფხვნილით და იმპორტირებული სხვადასხვა გაუგებარი რძით. დღეს ვართ ასეთ მძიმე მდგომარეობაში და არც მომავალი ჩანს საიმედო, ვფიქრობ რომ ფასები რძეზე და რძის პროდუქტებზე კიდევ გაიზრდება. ძალიან მალე შესაძლოა საკუთარი რძე საერთოდ აღარ გვქონდეს, წლების მანძილზე ის ისედაც ცოტა იყო და ჩვენი ბაზრის მხოლოდ 30%-ს ვაკმაყოფილებდით, ახლა კი ეს მაჩვენებელი ალბათ განახევრდა, შეიძლება კიდევ უფრო შემცირდა კიდეც.
გამოსავალი არის ერთადერთი და ეს არის რომ როგორმე მესაქონლეობის პროგრამის ამუშავდეს, როგორც ეს გააკეთა არაერთმა ქვეყანამ. სახელმწიფომ და ყველა ამ სფეროს მცოდნემ იცის რომ ეს არის გასაკეთებელი, ამაზე წლებია ვსაუბრობ, მაგრამ მე ჯერ ამ მიმართულებით გადადგმული ნაბიჯები არ მინახავს. ეს არის სახელმწიფოს მიერ მაღალპროდუქტიული საქონლის ჩამოყვანა და მისი დარიგება, ისე რომ 50% გადაიხადოს მეურნემ დანარჩენი 50% სახელმწიფომ, ასე გაკეთდა არაერთ ქვეყანაში, სხვა გამოსავალი არ არის. ჩვენ არასდროს არ გვყავდა მაღალპროდუქტიული საქონელი და ეს ახლა საჭიროა, რადგან სხვა შემთხვევაში მთლიანად გადავალთ იმპორტზე“,— განმარტავს ანა მიქაძე.
საქსტატის 2022 წლის III კვარტლის წინასწარი მონაცემებით, საქართველოში 165 მლნ ლიტრი რძე იყო წარმოებული. წინა წლის ანალოგიურ პერიოდთან შედარებით, წარმოება 6.3%-თაა შემცირებული. რაც შეეხება ფასებს, რძის პროდუქტების ღირებულება წინა წლის ანალოგიურ პერიოდთან შედარებით თითქმის 40%-ით გაიზარდა.