„ვცდილობთ, რომ სწრაფ რეჟიმში დავიმატოთ პარტნიორი კურიერები, მაგრამ დიდ მასშტაბებზეა საუბარი და ამ ყველაფერს დრო დასჭირდება. არსებული რაოდენობის სრულად შევსების საშუალება სავარაუდოდ არც გვექნება.“ - ამის შესახებ „კომერსანტს“ კომპანია „ვოლტის“ საზოგადოებასთან ურთიერთობის სამსახურში განუცხადეს.
საქართველოს ხელისუფლებამ ახალი კორონავირუსის გავრცელების საწინააღმდეგო ღონისძიებების ფარგლებში, 17 აპრილს მსუბუქი ავტომობილებით გადაადგილება აკრძალა, შეზღუდვა 22 აპრილიდან 27 აპრილამდე გახანგრძლივდა და ამჯერად ის მიტანის სერვისსაც შეეხო, საკურიერო მომსახურების კომპანიებს შეუმცირდათ მომსახურების არეალი და მასშტაბები, რადგან მათი თქმით სკუტერით ყველა სახის მომსახურება და შორ მანძილზე პროდუქტების მიტანა ვერ ხორციელდება.
„ძალიან შეზღუდული არეალით და შეზღუდული არჩევანით ვაგრძელებთ საქმიანობას. სუპერმარკეტებიდან მიტანის ნაწილში ძალიან დიდი სირთულეები გვაქვს მოცულობითი შეკვეთების გადატანისას. დაახლოებით 50 პროცენტით შეგვიმცირდა ხელმისაწვდომი, პარტნიორი კურიერების რაოდენობა. ვიმედოვნებთ, რომ მალე მოიხსნება ეს შეზღუდვა. ამ ეტაპზე, ვმუშაობთ იმაზე, რომ დავიმატოთ უფრო მეტი კურიერი, რომლებიც მოტოთი შეძლებენ გადაადგილებას.უმეტესი შეზღუდვა არის მიტანის არეალზე, რადგან სკუტერებით ვერ მიგვაქვს შორ მანძილზე, ასევე სუპერმარკეტებიდან სურსათის მიწოდება გვიჭირს მისი მოცულობის გამო, სკუტერს უჭირს მისი ტრანსპორტირება. ჩვენი მომხმარებელი საკმაოდ ბევრი ადამიანი იყო დ ყველა ვინც გასვლას ვერ ახერხებს, მსგავს მომსახურებას იყენებს. ჩვენთვის მთავარია, რომ იმ მომხმარებლის მოთხოვნა დავაკმაყოფილოთ, ვის ქუჩაზეც არ არის მარკეტი, ვისაც არ აქვს საშუალება, რომ მოამზადოს, მზა საკვები მივუტანოთ.“ - აცხადებს კომპანია „ვოლტის“ გენერალური მენეჯერი ნატალია ხიზანიშვილი.
მიტანის სერვისის კიდევ ერთი კომპანია „გლოვო“ აღნიშნულ შეზღუდვებთან დაკავშირებით ოფიციალურ გვერდზე სტატუსს აქვეყნებს, სადაც განმარტავს, რომ მანქანიან კურიერებზე შეზღუდვამ შეამცირა კურიერების რაოდენობა, ხოლო ქუთაისში სრულიად შეჩერდა კომპანიის მომსახურება.
„ახალი სამთავრობო რეგულაციების თანახმად, დღეიდან, 22 აპრილიდან 27 აპრილამდე გადაადგილების შეზღუდვა ვრცელდება ჩვენს პარტნიორ მანქანიან კურიერებზეც. რაც ნიშნავს, რომ
- პარტნიორი კურიერების დაახლოებით 30% სამწუხაროდ ვერ აგრძელებს მუშაობას;
- შესაძლოა მიტანის დრო გაიზარდოს და რესტორნების/მაღაზიების დაფარვის არეალი შემცირდეს;
- ქუთაისში, სადაც მხოლოდ მანქანიანი კურიერები გვყავს, სამწუხაროდ, შეკვეთებს ვერ განვახორციელებთ;
- თბილისში, ბათუმსა და რუსთავში კი დიდი მოცულობის შეკვეთებს ვერ წავიღებთ.
ბოდიშს გიხდით შექმნილი უსიამოვნებისთვის.
ჩვენ და ჩვენი სუპერგმირი პარტნიორი კურიერები მაქსიმალურად ვცდილობთ მოვერგოთ ახალ რეალობას და თქვენს გვერდით ვდგავართ.მადლობას გიხდით მოთმინებისთვის“ - წერია „გლოვოს“ ვებგვერდზე.
როგორც „კომერსანტს“ ეკონომიკის სამინისტროში განუცხადეს, ჯერჯერობით უცნობია გახანგრძლივდება თუ არა აღნიშნული შეზღუდვა 27 აპრილის შემდეგაც, თუმცა, ამ ეტაპზე ავტომობილებით მომსახურება ე.წ. „დელივერის“ სერვისს კიდევ 5 დღე ეკრძალება.
მარიამ მორგოშია