„ძირეული ცვლილებები თუ არ მოხდა, შესაკრებთა გადანაცვლებით ჯამი არ იცვლება,“- ასე ეხმაურება დისტრიბუტორთა ბიზნეს ასოციაციის ხელმძღვანელი ივა ჭყონია სამთავრობო ცვლილებებს რადიო „პალიტრასა“ და „პალიტრანიუსის“ გადაცემაში „საქმე“. მისივე შეფასებით, ძირეული ჩარევების საჭიროება დგას.

„ნათია თურნავას ვიცნობ, პიროვნულად სიმპატიით ვარ განწყობილი და მომავალ საქმიანობაში წარმატება მინდა ვუსურვო. მე რომ არ შევაფასო მისი მინისტრობის პერიოდი, ნათელია ქვეყანა როგორ მძიმე ეკონომიკურ მდგომარეობაშია, შესაბამისად, სად იყო ჩავარდნა, რატომ იყო და როგორ იყო, ამას ალბათ უფრო კარგად დავინახავთ. ვფიქრობ ძირეული ჩარევაა საჭირო და ძირეული ცვლილებები თუ არ მოხდა, შესაკრებთა გადანაცვლებით ჯამი არ იცვლება.

რაც შეეხება ლევან დავითაშვილს, მასაც წარმატებას ვუსურვებ. ფაქტობრივად „ფორით არის“ მოსული, შეიძლება ითქვას, რადგან პანდემიის პერიოდი გავლილია და შედარებით სტაბილური/აქტიური ეკონომიკური პერიოდი იწყება. პანდემიის დასაწყისში ლევან დავითაშვილს ჩაბარებული ჰქონდა ერთ-ერთი მიმართულება - ქვეყნის სურსათით მომარაგების სტაბილურობა, ამ პროცესში მჭიდროდ ვიყავით ჩართული და ვფიქრობ, ეს პროცესი ერთად ვმართეთ. შემიძლია ვთქვა, რომ საკმაოდ სმარტია მისი ხედვა ბიზნესის მიმართ და კარგად ესმის თუ რა სჭირდება,“-განაცხადა ჭყონიამ.

შეგახსენებთ, რომ პრემიერ-მინისტრის გადაწყვეტილებით, ეკონომიკის მინისტრის პოსტზე ნათია თურნავა გარემოს დაცვისა და სოფლის მეურნეობის (აწ უკვე ყოფილმა) მინისტრმა ლევან დავითაშვილმა ჩაანაცვლა.

bpn.ge