„მიმდინარე წელს დადებითი მოლოდინებია, თუმცა მთავარ გამოწვევად ფინანსებზე ხელმისაწვდომობა რჩება, ძირითადი პრობლემა არის ის, რომ ქვეყანაში ფულის დეფიციტი იგრძნობა“ - ამის შესახებ, რადიო „კომერსანტის“ გადაცემაში „კომერსანტის დილა“ მცირე და საშუალო ბიზნესის ასოციაციის ხელმძღვანელმა მიხეილ ჭელიძემ ისაუბრა.
„მცირე ბიზნესზე უნდა კეთდებოდეს აქცენტი და სახელმწიფოს მხრიდან სტარტაპები უფრო ინტენსიურად უნდა ფინანსდებოდეს, დღეს სტარტაპები სახელმწიფო პროგრამებში კი ფინანსდება, მაგრამ ეს დაფინანსება გაიცემა უზრუნველყოფით. სტარტაპების დაფინანსება უნდა მოხდეს უზრუნველყოფის და შემოსავლების გარეშე. ასეთ ბიზნესებს ნაკლები გამოსავლიანობა ექნება, მეტ რისკს აიღებს, მაგრამ ვინც გადარჩება მეტი შესაძლებლობა ექნება იმისა, რომ მეტი კადრი დაასაქმოს“, - აღნიშნა მიხეილ ჭელიძემ.
რაც შეეხება კადრების დეფიციტს მიხელი ჭელიძე აღნიშნავს, რომ ეს არის განათლებასა და ბიზნესის მოთხოვნა/მიწოდებას შორის დისბალანსი. ბაზარზე ხდება უმაღლესდამთავრებული კადრების მიწოდება, თუმცა ამაზე ბიზნესის მხრიდან მოთხოვნა არ არის.
„დღეს პროფესიული სასწავლები პრესტიჟული ხდება, სახელმწიფო დაფინანსებით უფრო მეტი ადამიანი აბარებს პროფესიულ სასწავლებელში, თუმცა აქაც სამუშაოა იმ კუთხით, რომ უფრო მეტი პროფესიული კადრი დავასაქმოთ. მეორე პრობლემა ქვეყნიდან გადინების თემაა, ადამიანები ცდილობენ, რომ უფრო მაღალ შემოსავალზე ქვეყნის გარეთ დასაქმდნენ, ეს ყოველთვის ასე იყო, უბრალოდ, ახლა უფრო მეტი ადამიანი უფრო ინტენსიურად გაედინება, რასაც ტექნოლოგიების განვითარებამ და ვიზალიბერალიზაციამაც შეუწყო ხელი, რადგან ქვეყნის დატოვება უფრო მარტივი გახდა, თუმცა ჩვენი ქვეყანა უფრო მიმზიდველი გახდა ჩვენზე უფრო განუვითარებელი ქვეყნებისთვის, ამიტომ კადრების გადინება კი არის, მაგრამ არის შემოდინებაც.
ჩარევაა საჭირო, რომ პროფესიული სასწავლებლები უფრო პრესტიჟული გახდეს და უფრო მეტმა ახალგაზრდამ მოინდომოს პროფესიული განათლების მიღება. ახალგაზრდა როდესაც სკოლას ამთავრებს ჯერ უმაღლესში კი არ უნდა მიდიოდეს, უნდა მიდიოდეს პროფესიულ სასწავლებელში, დაიწყოს მუშაობა და შემდეგ თუ მოუნდება, სწავლა უმაღლესში გააგრძელოს. ჩვენთან სკოლის მერე პირდაპირ უმაღლესში მიდიან და შემდეგ ბიზნესის მხრიდან ამ კადრებზე მოთხოვნა აღარ არის და უწევთ ქვეყნის დატოვება,“- აღნიშნა მიხეილ ჭელიძემ.
რაც შეეხება ანაზღაურებას, ჭელიძე აღნიშნავს, რომ ანაზღაურება საქართველოში დაბალია და იგივე საქმეში რასაც აქ აკეთებს დასაქმებული, სხვა ქვეყანაში უფრო მაღალ ანაზღაურებას იღებს. მისივე თქმით დღეს ტექნოლოგიები ისეა განვითარებული, რომ ადამიანები საქართველოდან უცხო ქვეყნის კომპანიებში მუშაობენ და იქიდან იღებენ ანაზღაურებას. ჭელიძე ასევე ფიქრობს, რომ ქვეყანაში მინიმალური ხელფასის დაწესებას ეფექტი არ ექნება, რადგან დღევანდელი ხელფასები მინიმალურ ხელფასზე გაცილებით მაღალია.
„ჩვენ არ ვართ იმის მომხრე, რომ სახელმწიფო საკანონმდებლო დონეზე ჩაერთოს ამა თუ იმ პროფესიაში და მინიმალური ხელფასი დააწესოს, ამას ბაზარი ისედაც დაარეგულირებს, უბრალოდ დეფიციტი სადაც არის და სადაც ვერ ხდება ამ დეფიციტის შევსება, იქ უნდა მოხდეს ძალისხმევის დახარჯვა , იმისთვის, რომ ეს დეფიციტი შეივსო.“ - აღნიშნა მიხეილ ჭელიძემ.
თაკო კვაჭანტირაძე