ლარის კურსის ანალიტიკისთვის სამი ძირითადი მიმართულება გამოიყენება, ესენია სავალუტო შემოდინებები, ლარის საშუალო კურსი ყველა ვალუტასთან მიმართებაში და ინფლაციის პროგნოზი - ამის  შესახებ, რადიო „კომერსანტის“ გადაცემაში, „კომერსანტის დილა“ TBC Capital  - ის მთავარმა  ანალიტიკოსმა ოთარ ნადარაიამ ისაუბრა.

მისი თქმით, საქართველოში სავალუტო დინებები ძლიერია, რისი მიზეზი მიგრაცია, ექსპორტი და სხვა  ფაქტორებია, თუმცა მისივე  განცხადებით, ძლიერი სავალუტო შემოდინებები, რამდენად წინააღმდეგობრივადაც არ უნდა ჟღერდეს, აუცილებლად ლარის გამყარებას არ ნიშნავს.

„ჩვენ ვხედავთ, რომ ეროვნული ბანკი ვალუტას ძალიან აქტიურად ყიდულობს, მაგალითად იანვარში 155 მილიონი აშშ  დოლარი შეისყიდა, თებერვლის მაჩვენებლები ჯერ არ გვაქვს,  თუმცა ეგეც საკმაოდ მასშტაბური იქნება, ისევე როგორც საშუალოდ თვეში 100 მილიონი დოლარის  შესყიდვები იყო, აღნიშნული  რიცხვი საქართველოს  ეკონომიკისთვის საკმაოდ  დიდი მაჩვენებელია, “ - აღნიშნა  ოთარ ნადარაიამ.

რაც შეეხება საშუალო კურსს, ნადარაია ამბობს, რომ ლარი 5-დან 6%-მდე არის გამყარებული და ლარის კურსის  გავლენა ექსპორტსა და იმპორტზე არც ისე ცალსახაა, რადგან საქართველოს არ აქვს იმდენი სახის პროდუქცია, რომელიც ლარის კურსის გამო გაიაფების შემდეგ ექსპორტზე მეტი რაოდენობით გავა, შესაბამისად ექსპორტი ლარის კურსზე ხშირად დამოკიდებული არ არის, თუმცა ნადარაია იმასაც აღნიშნავს, რომ ეს ყველა ინდუსტრიას არ ეხება.

„სავალუტო შემოდინებები პოზიტიურია და სხვათა შორის, აქ გაუარესებას ველოდით და ვფიქრობთ, რომ შემოდინებები  გაგრძელდება,“ - აღნიშნა ოთარ  ნადარაიამ.

რაც შეეხება ინფლაციის პროგნოზს ნადარაია განმარტავს, რომ ინფლაცია 8,1%-მდე  კი  შემცირდა, მაგრამ მაინც მაღალი მაჩვენებელია, რაც მნიშვნელოვანი გამოწვევაა. თუმცა მისივე თქმით, კურსის კუთხით არა დღეს არსებული ინფლაცია, არამედ პროგნოზია მნიშვნელოვანი.

„ჩვენთან ეროვნულ ბანკს უნდა, რომ ინფლაციის მაჩვენებელი ან  3% იყოს, ან მასთან ახლოს. იმ შემთხვევაში თუ ლარი  გაუფასურდება, კიდევ მეტი ინფლაცია იქნება და პირიქით, ჩვენ ახლა ვხედავთ, რომ ინფლაცია წელში გატეხილია და ქვევით ჩამოდის და ამან  გრძელვადიან პროგნოზში  შესაძლოა, ინფლაცია დეფლაციაში გადაიყვანოს.

პარალელი რომ გავავლოთ  2022  წელთან, ჩემი  აზრით, რომ  არ  ყოფილიყო ასეთი მაღალი ინფლაცია, ლარი ასე არ გამყარდებოდა და  ეროვნული ბანკი კიდევ უფრო მეტს იყიდდა.

სავალუტო  შემოდინებები რომ  არ იყოს, რაც  არ  უნდა ინფლაციის პროგნოზზე  ვისაუბროთ, ლარი სავალუტო  შემოდინებების გარეშე ვერ გამყარდება, დღე უკვე კიდევ  ერთხელ  რომ გავიმეოროთ, ინფლაციის პროგნოზი ლარის მხარდამჭერი აღარ არის,“ -  აღნიშნა ოთარ ნადარაიამ.

ნადარაია პროგნოზირებს, რომ მომდევნო 12  თვეში ლარს გამყარების კიდევ უფრო მეტი პოტენციალი აქვს, რაც რა თქმა უნდა, ლარის და დოლარის  წყვილში  პოზიტიურია.

„უახლოეს მომავალში,  2-3 თვეში  განსაკუთრებულ ცვლილებებს არ ველოდებით, უფრო  მეტიც,  მცირე გამყარებასაც  არ გამოვრიცხავ. “ - აღნიშნა ოთარ ნადარაიამ.

თაკო კვაჭანტირაძე