ფრანგი ფერმერებისგან ხილ-ბოსტნეულის მოსავალი მეტად მშრალი ამინდების გამო წელს, თითქმის, 35%-ით შემცირდა. ამის შესახებ საფრანგეთის ბოსტნეულის მწარმოებელთა ეროვნული ასოციაციის (Legumes de France) პრეზიდენტმა, ჟაკ რუშასემ რადიო Franceinfo-ს ეთერში განაცხადა.
ასოციაციის შეფასებით, ამ მომენტისთვის მოსავლის 25-35% არის დაზიანებული. ამდენად, ჟაკ რუშასე აუცილებელ პირობად მიიჩნევს, რომ „ფრანგების სასურსათო დამოუკიდებლობისა და უსაფრთხოების უზრუნველსაყოფად წყლის გამოყენებაზე მიღებული შეზღუდვები უკეთ იყოს ადაპტირებული.“
რუშასემ, ასევე, დასძინა, რომ მთავრობამ ფერმერებისთვის სახელმწიფო მხარდაჭერის პროგრამები უნდა დაიწყოს, წინააღმდეგ შემთხვევაში საფრანგეთი იძულებული იქნება, ყველა სახის ხილი და ბოსტნეული სხვა ქვეყნებიდან შეიტანოს.
„თუ ჯერ კიდევ გვინდა, რომ ხვალ ფრანგული წარმოება გვქონდეს, მწარმოებლების დახმარება მოგვიწევს, რომ ხალხის მომარაგება ფრანგული პროდუქტებით განვაგრძოთ, რასაც მომხმარებლები ითხოვენ,“ - აცხადებს ასოციაციის პრეზიდენტი.
მანამდე, 12 აგვისტოს საფრანგეთში, ქალაქ ბორდოსთან ძლიერი გვალვის გამო გაჩენილი ტყის ხანძარი აპოკალიფსს შეადარეს. გავრცელებული ინფორმაციით, ხანძრის ჩასაქრობად ევროპის ექვსი ქვეყნის სახანძრო ბრიგადა გამოიძახეს.
ივლისში, გვალვის გამო საფრანგეთში 100-ზე მეტი კომუნა სასმელი წყლის გარეშე დარჩა. საფრანგეთის ეკოლოგიის კომპლექსური გარდაქმნის მინისტრმა, კრისტოფ ბეშუმ განაცხადა, რომ ხელისუფლებამ დაზარალებული რეგიონებისთვის სასმელი წყლის მიწოდება სატვირთო მანქანებით უზრუნველყო.
გასული ივლისი ევროპის ექვს თვეს შორის მთელი დაკვირევების პერიოდის ყველაზე ცხელ თვედ გამოცხადდა. 9 აგვისტოს ცნობილი გახდა, რომ ბოლო ათწლეულის განმავლობაში ერთ-ერთი ყველაზე საშინელი გვალვის გამო, სურსათზე ფასების ზრდის ესპანელ ფერმერებსაც ეშინიათ.
გვალვა
