„კაპიტალის ბაზრის რეფორმის გარეშე, ვერანაირ მდგრად ეკონომიკურ ზრდაზე და ინკლუზიურობაზე ვერ ვისაუბრებთ. ადამიანების თანამონაწილეობა ეკონომიკაში კაპიტალის ბაზრის საშუალებით ხდება, მაგრამ დღეს საქართველოში ამის მექანიზმი არ არსებობს,“ - ამის შესახებ BMG-ის ეთერში, გადაცემაში „წერტილი“ თელარა გელანტიასთან ერთად ბიზნეს-კონსულტანტმა ლევან კობერიძემ განაცხადა. მისი თქმით, რთულია 1-2 წელიწადში ეკონომიკური ზრდა იგრძნოს მოსახლეობამ, მაგრამ ამ შემთხვევაში გადამწყვეტი — სწორი ეკონომიკური ხედვა და ეკონომიკის სტრუქტურაა.

„ის ორნიშნა ეკონომიკური ზრდა, რასაც ვუყურებთ არის დადებითი ტენდენცია და ეს ზრდა თუ მდგრადი იქნება და განვითარდება შემდეგ წლებშიც, მეტად აისახება მოსახლეობაზეც. განწყობა დღეს ასეთია, „ეს რიცხვები კი კარგია, მაგრამ რაღაც ხდება“. მოსახლეობა უყურებს, რომ ეს რიცხვები კარგად გამოიყურება, მაგრამ ამას ნაკლებად გრძნობს საკუთარ ჯიბეზე. ძნელია, რომ 1-2 წელიწადში ეკონომიკური ზრდა იგრძნოს მოქალაქემ, მაგრამ აქ მნიშვნელოვანია, როგორია ეკონომიკის სტრუქტურა. როცა შენი ეკონომიკის ძირითადი ნაწილი მთლიან შიდა პროდუქტში რეექსპორტია, ბუნებრივია რომ ამას მოსახლეობა ასე ადვილად ვერ იგრძნობს“, - განაცხადა ლევან კობერიძემ.

მისი თქმით, წყლის რესურსებით ისეთ მდიდარ ქვეყანას, როგორიც საქართველოა კარგად რომ გვქონდეს გააზრებული ენერგეტიკული პოლიტიკა, მაშინ ქვეყანაში ინვესტიციები შემოვიდოდა და ეკონომიკურ ზრდას მოსახლეობაც იგრძნობდა. 

„ჩვენ რომ გვქონდეს კარგად გააზრებული ენერგეტიკული პოლიტიკა და ისეთი რესურსების მქონე ქვეყანაში, როგორიც საქართველოა სწორად იყოს დალაგებული კომუნიკაცია მოსახლეობასთან, საქართველოს გახდებოდა ქვეყანა, სადაც ელექტროენერგია გაცილებით იაფი ეღირებოდა, რადგან ეს ჩვენი რესურსია. სახელმწიფომ ხელი უნდა შეუწყოს კერძო ინვესტიციების შემოდინებას, რომ ელექტროენერგია იყოს ყველაზე იაფი რეგიონში. მაშინ ეკონომიკურ ზრდას მომენტალურად იგრძნობს მოსახლეობა, რადგან საწარმოები გაიხსნება, სამრეწველო პოტენციალი ამუშავდება. ეს უკვე არის ხედვა  ეკონომიკაში, რომელსაც ინკლუზიურობის თვალსაზრისით უკეთ იგრძნობს მოსახლეობა და არა ის, რაც დღეს ხდება, როცა საბანკო სექტორშია კონცენტრირებული მთელი ფინანსური ოპერაციების და აქტივობის ძირითადი ნაწილი,“ - განაცხადა ლევან კობერიძემ.

მისი თქმით, კაპიტალის ბაზრის რეფორმის გარეშე, ვერანაირ მდგრად ეკონომიკურ ზრდაზე და ინკლუზიურობაზე ვერ ვისაუბრებთ, რადგან ადამიანების თანამონაწილეობა ეკონომიკაში სწორედ კაპიტალის ბაზრის საშუალებით ხდება.

„კაპიტალის ბაზარი საერთოდ არ არსებობს. ბევრი ადამიანს აქვს დაგროვილი კაპიტალი და უნდა ეს თანხა სადმე წაიღოს, მაგრამ ქვეყანაში კაპიტალის ბაზარი არ არსებობს. არ მოვერიდები და პირდაპირ ვიტყვი - სამარცხვინოა, როცა საფონდო ბირჟაზე საქართველოში დღეს ივაჭრება 127 ლარი. კაპიტალის ბაზრის რეფორმის გარეშე, ვერანაირ მდგრად ეკონომიკურ ზრდაზე და ინკლუზიურობაზე ვერ ვისაუბრებთ. ადამიანების თანამონაწილეობა ეკონომიკაში სწორედ ხდება კაპიტალის ბაზრის საშუალებით, მაგრამ დღეს საქართველოში ამის მექანიზმი არ არსებობს. არსებობს მხოლოდ საბანკო. ძველი ხელისუფლების დროსაც და ახლანდელი ხელისუფლების დროსაც მე მეჩვენება, რომ ხელოვნურადაა დამუხრუჭებული კაპიტალის ბაზარი. მეც ვიყავი ხელისუფლებაში და ბევრი მცდელობა გვქონდა, მათ შორის საპენსიო რეფორმა სწორედ ერთ-ერთი ნაწილი იყო კაპიტალის ბაზრის. დღეს ამ მიმართულებით მკაფიოდ გადადგმულ ნაბიჯებს ვერ ვხედავ“, - განაცხადა ლევან კობერიძემ.