22 მარტს საგანმანათლებლო და სამეცნიერო ინფრასტრუქტურის განვითარების სააგენტომ 53 432 955 ლარის ტენდერი გამოაცხადა.

ტენდერი ითვალისწინებს სსიპ „საგანმანათლებლო და სამეცნიერო ინფრასტრუქტურის განვითარების სააგენტო“-ს მიერ 2023-2024-2025 წლების სახელმწიფო ბიუჯეტის დაფინანსების ფარგლებში აღმოსავლეთ პარტნიორობის ევროპული სკოლის შენობის სრული სამშენებლო-სარემონტო და საინჟინრო სამუშაოების სახელმწიფო შესყიდვას.

სამუშაოს შესრულების ადგილია ლისის ტბის მიმდებარე ტერიტორია, მიმწოდებელი ვალდებულია სამუშაოების დასრულება უზრუნველყოს ხელშეკრულების გაფორმებიდან 420 კალენდარული დღის (14 თვე) ვადაში.

ტენდერის ფარგლებში უნდა ჩატარდეს შენობის დასრულების სამუშაოები, მობათქაშება, კარებისა და ფანჯრების და მათთან დაკავშირებული კომპონენტების მონტაჟი, სხვა ლითონკონსტრუქციების მონტაჟი, არალითონის კონსტრუქციების მონტაჟი, იატაკისა და კედლის საფარის დაგება,ღებვა და შემინვა.

როგორც ფინანსთა სამინისტროს მხრიდან განათლების სამინისტროსთვის მიწერილი წერილიდან ხდება ცნობილი აღმოსავლეთ პარტნიორობის ევროპული სკოლის სრული სამშენებლო-სარემონტო და საინჟინრო სამუშაოების მრავალწლიანი შესყიდვისთვის 2023 წელს გათვალისწინებული უნდა იყოს 16 029 886.66 ლარი, 2024 წელს 26 716 477.77 ლარი, ხოლო 2025 წელს 10 686 591.11 ლარი (ჯამური ღირებულება 53 432 955.54 ლარი).

პროექტი ორენოვანია, შესაბამისად სავალდებულოა ყველანაირი დოკუმენტაციის წარმოება ორივე ენაზე - ქართულად და ინგლისურად.

პრეტენდენტს საქართველოს ტერიტორიაზე ან/და სხვა ქვეყნის ტერიტორიაზე (გარდა იმ ქვეყნის ტერიტორიისა, სადაც რეგისტრირებულია პრეტენდენტი) 2019 წლის 1 იანვრიდან მოცემულ ტენდერში წინადადებების მიღების დასრულების დღემდე შესრულებული უნდა ჰქონდეს:

ა) სამოქალაქო დანიშნულების შენობ(ებ)ის მშენებლობის ან რეკონსტრუქციის ან რეაბილიტაციის სამუშაოებისათვის საჭირო საპროექტო-სახარჯთაღრიცხვო დოკუმენტაციის მომზადების გამოცდილება, ჯამური ღირებულებით არანაკლებ 500 000 (ხუთასი ათასი) ლარი; საპროექტო მომსახურება სავალდებულოდ უნდა მოიცავდეს საინჟინრო კომუნიკაციების პროექტირების ნაწილს;

ბ) სამოქალაქო ან საზოგადოებრივი დანიშნულების შენობ(ებ)ის  მშენებლობის ან რეკონსტრუქციის ან რეაბილიტაციის სამუშაოების შესრულების გამოცდილება ჯამურად არანაკლებ 110 000 000 ლარის ღირებულებით, მათ შორის ერთი ხელშეკრულების ფარგლებში არანაკლებ 10 000 000 ლარის ოდენობით;

წინადადებების მიღება 19 აპრილს იწყება და 24 აპრილის 12:30 საათზე დასრულდება.